3.1 Teknik Nguji Pemereti Macha Sengian
Teknik ti ulih dikena nguji pemereti macha sengian nya
baka ke dibaruh tu:
|
(a)
|
Teknik
Tanya Tebuka
|
|
(b)
|
Teknik
Tanya Objektif
|
|
(c)
|
Teknik
Tanya Pilih betul – salah
|
|
(d)
|
Teknik
Tanya kloz
|
3.1.1
Teknik Tanya Tebuka
Teknik tanya chara tebuka nya teknik tanya meretika
teks ti pengabis lama udah kala dikena enti dibandingka enggau teknik bukai.
Teknik tu ngembuan pemanah ari sukut kualiti belajarka sesebengkah jaku. Ngena teknik
tu, nembiak mesti nyaut tanya meretika teks ngena jaku diri empu. Reti nya, kelimpah
ari nyaut nitihka pengingin tanya, nembiak mesti ngaga ayat lalu ngena jaku
nitihka jalai jaku ti betul sereta lebas jaku ti nemban. Reti nya, teknik tu nguji daya ngenataika penemu sida nembiak
lalu tu terang amat ngayanka pemereti nembiak senentang pekara ti dikedeka
tanya ti bekaul enggau kereban bacha nya tadi. Nya kebuah, teknik tu suah agi
dikena pengajar jaku maya latih nyaut tanya meretika teks bacha sereta dikena
maya peresa formal ti betukuh formatif tauka diagnostik.
Ari sukut kualiti pelajar jaku, teknik tu endang
dipeda nadai ngembuan pengelemi. Semina ari sukut pemeresa aja bisi pengelemi
mimit laban pengawa meri mark ngagai saut nembiak nya bisi deka lama mimit enti
dibandingka enggau teknik tanya objektif. Faktor jam tu deka balat agi diasaika
pengajar enti penyampau nembiak ti diuji iya nya mayuh amat. Enti faktor jam tu
ukai penanggul, dia teknik tu dikira chukup manah ketegal iya ulih meri respons
ti betukuh diagnostik ngagai pemereti nembiak sentang reti tanya, teks ti
dibacha disempulang enggau pengelebih sereta pengurang daya jaku nembiak.
Enti teknik tu dikena maya peresa ti besai ti mungkur
penyampau nembiak ti mayuh amat sereta beratus pemeresa, dia teknik tu tau
nyadi penanggul ba sukut reliabiliti (kebolehpercayaan)
entara pemeresa. Kiraka dipeda ari sukut konsistensi mark ti diberi tang iya
ulih diputarka nengah skima mark ti standard.
Siti agi pengelebih tanya chara tebuka iya nya mudah
ngagai raban pengajar nyediaka tanya kelebih agi ari sukut ngaga tanya nitihka peringkat
pemereti macha. Enti ulih, sesebengkah peresa nguji pemereti macha mesti
ngundan tanya ti nguji mayuh macham peringkat pemereti (ambika banding
peringkat literal,interpretation enggau kritikal/kreatif). Ni naka sereta
pemayuh tanya tu digaga bepanggai ba sekeda faktor baka:
-
tema enggau isi
tibak teks ti dibacha nya
-
pemanjai tibak teks
nya
-
pom pelajar nembiak
nya
Ari sukut praktis,
sukut pemanjai sesebengkah tekske diagih kena nguji nembiak disekat ngagai
beberapa paragraf tauka beberapa genteran aja. Enti nitih iya ke amat, nembiak
dipinta macha siti bab tauka siti topik tang dalam pelajar jaku Iban jarang
amat kitai nanya sampai siti bab. Bepanggai ba tikas nembiak ti diuji (
sekalika di sekula primari tauka sekondari baruh, sekondari atas), pemanjai tibak
karang ti dikena nguji pemereti teks kira-kira entara 200-500, 300-350, 400-500
tauka 500-550 leka jaku.
Teks ti dipilih mega
mesti engkeman ari mayuh aspek baka tema enggau isi, lebas jaku ti dikena,
tikas pengemar ari sukut bepikir ti dalam teks nya (baik nya ari sukut konsep,
idea enggau fakta) bepanggai bendar ba pengelandik sereta peneleba pengajar ti
milih. Suah agi teks diambi-bali ari bup tauka majalah ti betukuh geografi,
sejarah, sains sosial ngundan pekara ti ngayanka kaul entara kebuah enggau
empas mensia enggau mensia, rampa menua, entara mensia enggau rampa menua.
Tibak teks ari pun penatai tu ngulih pengajar ngaga tanya meretika teks chara
tebuka ba mayuh bengkah peringkat.Peratika chunto chara ngaga tanya meretika
teks chara tebuka:
(a)
Peringkat Literal
(i)
Nama ...
(ii)
Sapa ...
(iii)
Kemaya ...
(iv)
Dini ...
(b)
Peringkat Interpretasyen
(I)
Nama kebuah / Lapa
...
(II)
Kati baka ...
(III)
Terangka ...
(IV)
Bandingka ...
(V)
Bidaka/ Nama bida
...
(VI)
Ba penemu nuan ...
(c)
Peringkat Kritis / Kreatif
(i)
Pejuraika chara
kritis ...
(ii)
... . Beri penemu
nuan
(iii)
Kelikuhka ...
(iv)
Nama simpul penemu /
Beri simpul penemu nuan ...
(v)
Gaga simpul penemu
...
Tiada ulasan:
Catat Ulasan