Kala tauka enda bala nembiak terundingka deka nulis
berita tauka ripot bechelak dalam surat berita tauka blog? Bisi tauka enda bala
nembiak ngembuan juluk ati deka nyadi siku pengarang berita tauka penulis blog
jemah ila?
Ngagai sida ke bisi juluk ati deka nyadi pengarang
berita, nemu tauka enda kita, pengawa tu ulih berengkah dikereja maya umur kita
agi biak. Chara dikena ngulihka kereja tu iya nya ngilirka pengelandik nulis
berita enggau ripot. Pengelandik tu mega sebagi ari tanya dalam peresa
perintah, ambika banding ba peresa UPSR Bahasa Inggeris.
Pengelandik nulis berita enggau ripot ukai semina nyaup
nembiak dalam karang tang mega ngelatih sida ngena format ti betul sereta leka
jaku ti engkeman dalam sesebengkah pekara. Pengelandik tu meri mayuh pengelebih
ngagai nembiak maya sida nyaut tanya peresa.
Kelimpah ari nya, pengelandik tu mega mantu sida nulis
enggau manah agi dalam media sosial. Pengelandik nulis berita deka meransang
nembiak ngena lebas jaku ti engkeman sereta jalai jaku ti betul lebuh
ngenataika sesebengkah penerang. Media sosial kemaya hari tu muka mayuh peluang
ngagai sida ke bisi penau dikena sida ngayanka pengelandik sida nya nulis blog.
Bala nembiak sekula mega ulih nulis dalam surat berita tauka majalah sekula.
Pengelandik tu ukai semina mantu sida nyaut tanya peresa
tang mega mantu bala nembiak ngerembaika
pengelandik nulis sida.
Tukuh tulis berita enggau ripot ti manah nya mesti nitihka format ti nemban
lalu jaku ti dikena nya mudah diperetika raban pemacha. Kelimpah ari nya, genap
iti penerang ti ditulis nya enda tau enda nemban sereta logik. Taja pan berita enda nyadi ba mua nembiak ke
nulis tang sida patut berundingka mesej tauka reti ti deka dikenataika sida
ngagai raban pemacha.
Tiada ulasan:
Catat Ulasan