Jerita rayat dalam jaku Melayu baka jerita Pak Pandir,
Bawang Putih Bawang Merah enggau Nujum Pak Belalang balat bendar dianti bala
nembiak menya ketegal jalai jerita ti narit ati sida sereta penuh ajar manah. Tang
sayau amat situasyen 30 tauka 40 taun nya suba udah enda agi nyadi kemaya hari
tu. Nembiak maya nya suba angkun bendar nganti apai tauka indai sida becherita
lalu jerita nya dikenataika sida semina nengah mulut aja.
Enti ditanya ngagai sida ke serak tu diatu, tentu bisi
sida ke enda nemu sapa nya Pak Pandir? Baka nya mega cherita dua iku indu,
Bawang Merah enggau Bawang Putih tauka jerita ngelugi Pak Kadok.
Enda nemu dini endur penyilap, jerita baka nya nyau
majak lenyau setipak enggau pemansang ubah dunya. Cherita ari menua luar baka
Snow White, Cinderella enggau Frozen nya ke balat agi ditemu bala nembiak
ngujungka sida udu obses enggau karakter animasyen nya.
Bisi beratus-ratus jerita rayat ti dikenataika nengah
sangah dilah, ukai semina ba Semenanjung aja, tang mega di Sabah enggau Sarawak
mega bisi jerita rayat sida empu.
Jerita rayat ulih mai pemujur akademik enggau
pengelantang emosyen bala nembiak nengah sistem pelajar jaku. Jerita rayat tu
engkeman nyadika kereban becherita enggau kereban belajar dikena meransang sida
nembiak nyidi penyelai diri.
Kelimpah ari nya, iya mega ulih ngangkatka tikas
pengulih bekomunikasyen bala nembiak nengah chara sida bepikir, geragayak lalu
ngenataika iya betukuhka oral ti teratur. Ba dunya kemaya hari tu ti balat
bendar mansang sereta sofistikated, aktiviti becherita ulih nyadika kereban
dikena nerenak sereta nanam ulah nembiak ngasa jaku ti betul, betelipi sereta
manah didinga tauka dibacha.
Kelimpah ari nya, iya mega ngasuh sida nemu pemesai
reti kitai ke mesti ngembuan pengelandik mending ti manah ngambika bisi komunikasyen
ti semitan entara individu.
Nembiak ti enda ditelebaka enggau identiti budaya komuniti
Melayu dipelabaka tusah deka ngaitka jerita rayat tu nyadika malin enggau suri
teladan sida. Pekara tu mayuh amat nyadi kelebih agi ba komuniti Orang Asli ba
menua kitai tu ketegal penanggul buta urup ti tinggi. Pansik ti udah dipejalaika
bekaul enggau Pelajar Anak Orang Asal madahka siti ari faktor ti mai penanggul
tu iya nya nembiak Orang Asli enda tentu rindu ke sekula sereta enda ulih ngaitka pengidup besehari-sehari
sida enggau pekara ti dipelajar sida di sekula. Ambika banding, nembiak Orang
Asli diajar macha leka jaku baka bas, bilun, komuter enggau kereta api ti
seruran dikena dalam konteks kereban pengangkut besehari-sehari mensia mayuh.
Tang ba nembiak Orang Asli, ti asal penatai
tirai juru pengidup sida ti bebida, nama bansa kereban pengangkut nya
udah tekelalu mar sereta nadai kala didinga sida. Nya kebuah, pengajar patut
nemu ngena bansa kereban pengangkut bukai baka perau, rakit, bot, enggau ti
bukai ke semak enggau pengidup sida besehari-sehari. Indah ngumpul siti siri
modul jerita rayat ti bepelasarka jerita Orang Asal Sabah ulih mantu nutarka
penanggul nya.
Ambika banding, Modul Belajar Pugu Literasi bepelasarka
Jerita Rayat digaga belalauka tesis Dr Mohd Nazri Abdul Rahman, ‘Model
Homeschooling Orang Asli berasaskan nilai dan amalan masyarakat bagi
kanak-kanak Orang Asli’ (2014). Modul nya ngundan lima jerita komuniti Orang
Asal Sabah (Kadazan-Dusun) iya nya Ikan enggau Tupai, Hominodun (Asal Penatai
Padi), Tikus enggau Kundur, Si Anak-Anak enggau Si Konomulok sereta Ligot
Liou enggau Yanak Anak. Jerita tu
berengkah digumpul sereta ditempa baru dalam taun 2014. Pengawa ngaga modul nya
dibantu pengelicha ari IPG Kent, Lajiwin nengah chara jaku sebut. Jerita rayat
dipilih seraban orang ti tebangkar nengah siti proses lalu sida tu dichiri nengah langkah rapat ti
dikumbai Fuzzy Delphi. Udah nya jerita tu ditulis baru nitihka tikas bacha
nembiak prasekula. Pengawa nya dibantu raban ke tebangkar ari Universiti Malaya
(UM).
Pengawa ti ngaga Modul Belajar Pugu Literasi bepelasarka
Jerita Rakyat Orang Asal Kadazan-Dusun dimunka seraban sida ti tebangkar ngena teori
Experiental Learning (Kolb, 1984) iya
nya belajar nengah peneleba, meri respons nengah chara kritis, ngaga generalisasyen
tauka simpul penemu ari pekara ti dipelajar lalu ngena pekara ti dipelajar nya
ngagai pekara ti baru. Kelimpah ari nya, iya mega meri fokus ngagai langkah
rapat ti betukuhka Pugu Jerita Kreatif-Tradisyen Komuniti Orang Asal. Pekara tu
dipejalaika lebuh ngasuh bala nembiak nya masuk chara aktif dalam pengawa ngajar
enggau belajar pasal ngelala munyi enggau urup.
Pengawa tu mega dipejalaika ari baruh bantu Pusat
Komuniti dan Kelestarian UM (UMCares) sereta kerejasama ari Fakulti Pendidikan UM
dan Institut Pendidikan Guru, Kampus Kent, Tuaran Sabah. Program modul pelajar pugu
literasi ti bepelasarka jerita rayat komuniti Orang Asal tu dipejalaika ba
sekeda endur di Sabah. Tabika Perpaduan Kampung Lohan, Ranau, Sabah enggau
Prasekolah Institut Pendidikan Guru Kampus Kent, Tuaran Sabah udah dipilih nyadi
sekula projek modul tu.
Pengajar ti enggau bejalaika modul pelajar tu diberi
latih ngena tiga teknik becherita Jerita Rakyat iya nya ‘Grab Bag’ Story
Telling, ‘Round Robin’ Story Telling enggau ‘Pictorial’ Story Telling. Kelimpah
ari nya, sida (pengajar) mega diajar langkah rapat Phonics enggau Whole Language
ti nyadika pugu pelajar literasi. Kebuah pia, laban modul ti digaga tu ngena
langkah rapat Phonics enggau langkah rapat whole language. Taja pia bisi sekeda
pekara ti diubah baru ke meri fokus ngagai mayuh leman teknik belalauka mayuh
leman penatai jerita rayat baka adat asal, rampa menua, chara idup, jaku enggau
ti pekara bukai dalam komuniti Orang Asal.
Projek tu bisi ngayanka asil nembiak Orang Asli ti tinggi
dalam pengulih sida macha. Nengah modul tu, pengajar ulih ngena mayuh macham
langkah rapat ngajar enggau belajar lalu ulih ngaitka peneleba pengidup besehari-sehari
nembiak Orang Asli.
Tiada ulasan:
Catat Ulasan