Pengelandik Nulis

Nulis nya siti chara ngenataika idea. Nembiak sekula dilatih nulis ayat ti nitithka jalai jaku ti betul kenyau ari sida ba sekula primari. Guna leka jaku dalam ayat ti betul atur jalai jaku ulih ngerembaika sesebengkah pekara enggau manah. Ambika banding dalam keretas peresa English UPSR, nembiak dipinta nyaut bepelasarka kereban tauka stimulus ti disempulang enggau tanya.

Kereban tauka stimulus tu ulih betukuhka gambar, ilustraysen, grafik, leka main, surat, e-mel, leka lagu, rekod diari, taga jam pejalai kereban pengangkut rama, notis, memorandum, taga program televisyen tauka grafik ti bukai.

Tulis tauka karang ti lati begunaka kitai ngasa jalai jaku enggau manah kelebih agi lebuh milih leka jaku ti engkeman. Milih leka jaku ti nemban baka jaku pengawa tauka jaku adjektif ti relevan ulih dikena ngerembaika seebengkah pekara enggau manah.

Ambika banding, ba keretas English Penulisan dalam Ujian Pencapaian Sekolah Rendah (UPSR), tanya ulih dibagi ngagai Bagi A, B, enggau C. Calon  UPSR mesti nemu langkah rapat ti engkeman dikena nyaut tanya nya enggau manah kelebih agi ba semua bagi tanya nya tadi.

Pugu pekara ti pengabis patut dikemeratka nya nemu pekara ti ditanya. Ba Bagi A enggau B, calon nadai ulih milih laban tanya semina siti aja disediaka. Ungkup Bagi C, nembiak patut macha enggau silik kedua-dua pilih tanya sereta nentuka iya ti ulih amat disaut sida. Pilih tanya ti ulih ngemansutka mayuh buah runding ngambika nyamai dikerembai.

Nembiak mega ulih ngena leka jaku diri empu tauka milih leka jaku ti diberi dalam tanya tauka nyampur leka jaku diri empu enggau jaku ke disediaka dalam keretas tanya.

Patut dikeingatka mega, penyampau leka jaku dalam karang ba Bagi C enda ulih lebih 100 leka jaku.  Karang ti kelalu panjai semina muai jam laban utai ti ditulis udah jauh lebih ari 100 leka jaku lalu enda diberi mark.

Nembiak mega ulih ngena leka jaku ti ngayanka mayuh leman situasyen lalu enda nandu leka jaku ti sama genap kali nulis ayat ti nangkanka nya. Ambika banding tanya ba Bagi C ngembuan mayuh pilih tanya ti disempulang enggau gambar aja tauka gambar besereta enggau tanya dikena mantu nembiak ngaga karang.

Nembiak diperansang ngena kretaiviti enggau imaginasyen diri empu laban karang ti manah nya ngembuan pekara tambah dari penemu rama. Enda mega salah enti sida enda ngena leka jaku ti diberi. Ungkup tanya ti bisi nama enggau watak dia nembiak mesti ngena nama ti disebut nya lalu enda ulih ngubah watak nya. Ambika banding, enti watak ti diberi nya Maria, karang mesti ngena watak Maria lalu ukai ngubah nya ngagai Inu, Kasa tauka Jaya.

Tip lebuh nyaut tanya karang

Bacha tanya enggau silik lalu tentuka pekara ti nyadi, diatu, ti deka datai enggau iya ti udah nyadi kelebih agi ba English ngambika ulih nentuka tenses  ti dikena.

Mesti ditulis dalam paragraf tauka genteran.

Nembiak diperansang ngaga langkar karang dulu sebedau nyaut tanya ulih ngulihka idea enggau naka pemayuh.

Ulih digulai enggau idea diri empu tang karang enda ulih keluar ari topik tauka pekara ti ditanya.

Kena leka jaku ti engkeman lalu ayat ti mudah dikena nyeliahka diri ari penyalah jalai jaku.