Dunya pelajar ukai
sebengkah bidang ti mudah deka diatur. Dunya pelajar enda ulih lari ari napi
mayuh leman isu, insah enggau penguji sekalika nya ari sukut nasional tauka
global. Leka jaku insah ke dikena aku ditu mai reti stress dalam jaku English.
Insah emosional ba
raban nembiak sekula mega entara faktor ti patut bendar dikeibuhka kemaya hari
tu. Penanggul enda ulih belajar ke enda ulih diterang ketegal faktor
intelektual, pengerai mega tau dikumbai ngeregau pengasai ati. Reti nya gangguan emosi tauka regau emosyen ulih
dikumbai penanggul ti diterima nembiak ke ngujungka emosyen sida enda stabil.
Nembiak ke bisi
penanggul emosyen deka ngayanka ulah ti siga, ganas, enda liat ati, selalu deka
ngamuk sereta ngembuan ulah ti enda engkeman enggau situasyen selama. Ulah baka
tu semampai dibantai nembiak ke bepenanggul emosyen taja pan dalam kelas iya pendiau.
Entara faktor ti
ngasuh orang nya berasai kena tekan ari sukut mental iya nya penanggul pengidup
ba ruang bilik tauka ba sukut pelajar iya. Penanggul ruang bilik enggau penusah
seranta ngasuh runding enda tegap sereta semampai kena insah.
Insah ari sukut
pelajar mega nyadi ketegal nembiak dipejal ngulihka pengelati. Insah nembiak
bepun ari apai indai ti deka ngasuh anak sida mujur dalam pelajar tauka ari sida pengajar ti deka nentuka
objektif belajar enggau ngajar sida ulih dijapai.
Kelimpah ari nya,
peneleba lama ti ngenakutka mega entara faktor ngasuh insah mental nyadi.
Pekara tu nyadi lebuh orang nya betapi enggau tragedi ti ngenakutka diri. Empas
ari tragedi tu ngujungka orang nya seruran napi pengasai ati ti bechampur baur.
Enti orang nya diau diri lalu enda rindu mantaika pengasai ati iya deka napi ati
ti semampai kusang dalam timpuh ti panjai.
Nangkanka nya, rampa
sosial mega entara faktor ti ngasuh nembiak ngasaika diri kena insah. Kaul ti
nadai besekat entara nembiak lelaki enggau indu ngasuh sida mudah dirampit
penyakit sosial baka bebuaika anak, nyempit, bayam sereta bebaika motosikal ke
ulu ke ili enggau mayuh agi penyakit sosial ti bukai.
Nambahka nya mega,
nembiak seruran agi ke bepikir negatif; ambika banding ngembuan runding ti
nadai pengarap enggau pengulih diri dikena mutarka penanggul, enda berasai
sebaka tikas enggau orang bukai lalu malu nerima jaku puji tauka jaku pejah ari
orang.
Faktor rampa pendiau
mega pun penatai penanggul insah tu. Nembiak deka ngasaika ubah gaya idup ari
peringkat sekondari ngagai peringkat institut pelajar tinggi. Sida berasai kena
pejal enti enda ulih nerima sereta napi ubah besai lebuh begelar nembiak
universiti.
Nya kebuah, ajar
pengarap tauka moral ulih napi penanggul insah tu sereta meri penemu ngagai
sida ngambika ulih ngelaban pengingin ati ti
tekelalu nya. Enggau tu, tiap-tiap iku nembiak sekula mesti diberi peluang
ngemanahka ulah ngambika berubah manah.
Tiada ulasan:
Catat Ulasan