3.1 Teknik Bukai
Kelimpah ari teknik nanya chara tebuka, obejktif, pilih betul-salah enggau teknik kloz bisi dua agi teknik ti kala dikena nguji pengelandik meretika teks. Teknik tu dikumbai:
(a) Nipak ayat enggau gambar
(b) Ngedutka karang
3.1.1 Nipak Ayat enggau Gambar
Teknik nipak ayat enggau gambar suah agi dikena nguji pengelandik meretika teks ba peringkat sekula primari baruh, kelebih agi ba peringkat taun satu enggau dua.
Bansa (a)
Ba genap iti item nguji pengelandik macha, nembiak diberi siti ayat ngambika dibacha sereta diperetika sida. Disempulang enggau ayat nya, nembiak lalu diberi tiga iti gambar. Siti ari gambar nya ngayanka cherita tauka reti ti sama enggau ayat ti diberi. Nembiak dipinta milih gambar ti sama cherita tauka reti enggau ayat ti udah diberi dulu ari tu.
Bansa (b)
Nitihka bansa tu, ba tetiap iti item dikena nguji pengelandik macha nembiak, sida diberi siti gambar ti mai cherita tau reti ti sama. Ba baruh gambar nya diberi tiga iti ayat. Genap iti ayat ngundan cherita tauka reti ti sama enggau gambar. Nembiak dipinta milih sereta nipak cherita ti sama enggau gambar nya. Sebedau sida ulih milih siti ayat ti engkeman, sida mesti macha sereta meretika genap iti ayat ti diberi nya. Semina siti ayat ti engkeman enggau sesebengkah gambar. Dua ayat ke bukai nya semina pengachau tauka distraktor.
3.1.2 Ngedutka Karang
Ba ngedutka karang tu, penemu raban tukang tarak enggau penguji tauka pemeresa jaku senentang guna iya nyadika latih enggau peresa pengelandik macha sereta meretika teks enda sama enggau pangan diri. Julian Dakin (1973) ambika banding kala mantaika tuduh penemu ti madahka karang kedut nya siti pengawa latih tauka peresa dikena nguji nembiak sentang pengelandik meretika teks. Taja pia, J.B.Heaton (1979) enda tentu nyukung penemu teknik tu laban ku iya pengawa ngedutka karang nya ngundan dua iti pengelandik, iya nya pengelandik macha enggau pengelandik nulis. Maya peresa karang kedut, nembiak dipinta macha sesebengkah tibak teks chara sengian, meretika teks nya lalu nuliska baru nitihka tukuh kedut ti pemanjai iya kurang lebih satu petiga ari teks asal. Ambika banding, enti tibak teks nya kurang lebih 300 leka jaku dia nembiak dipinta mereti sereta nuliska baru ngena jaku diri empu betukuh karang kedut enda lebih ari 100 leka jaku. Nitihka penemu Heaton (1979):
|
|
It can be argued that, if the paraphrase test is intended to test comprehension, this skill is much better tested by a reading comprehension test. If intended to test the student’s writing ability, again this is better done through a test of writing.
|
Patut dikingatka kitai pekara di atas nya semina kelikuh J.B. Heaton aja. Enti amat munyi ku iya baka ni dih validiti konstruk (konsep) nguji pengelandik macha ti ngena teknik tanya tebuka? Lebuh nembiak ngaga karang kedut ari kereban bacha, sida tentu macha dulu tibak teks nya, nguji meretika pekara dalam teks nya lalu nyaut tanya pasal teks nya nitihka penemu diri tauka ngena jaku enggau daya nulis diri empu. Nitihka garis logik ti sebaka, ditu mih nembiak mega diuji ukai semina pengelandik meretika kereban bacha tang mega mungkur pengelandik nulis lebuh sida nguji nyaut tanya meretika teks ti ditukuh ari tanya tebuka. Enti teknik tanya chara tebuka dikira siti kereban ti valid dikena nguji pemereti nembiak pasal kereban bacha, tentu teknik nguji pemereti nembiak nengah tanya karang kedut ti dibacha tau mega dikumbai siti ari chara ti valid mega.
Ba kedua-dua teknik ti dibanding; iya nya nanya chara tebuka enggau ngedutka tibak teks, fokus enggau objektif nguji iya nya ngagai pugu idea enggau isi pekara dalam kereban nya. Ba kedua-dua teknik nya, nembiak mesti nyaut tauka nulis saut sida laban dalam teknik nya aja respons ti engkeman nyadika medium komunikasyen sereta pelasar kitai nguji pemereti nembiak senentang sesebengkah kereban ti udah dibacha sida. Kedua-dua nya sebengkah ari teknik meresa tauka nguji ti bebida ari sukut tukuh iya. Taja pia, objektif enggau fokus iya tetap sama, iya nya deka nguji pemereti nembiak senentang sesebengkah kereban bacha. Lebuh ngedutka karang, nembiak tentu enda ulih ngasilka karang kedut ti manah enti iya enda meretika pekara ti dibacha iya nya, nangkap idea enggau isi pekara sereta nuliska baru ngena tukuh kedut ti agi nemban bepelasarka tibak teks asal nya. Nguji karang kedut suah agi dipejalaika ba tikas sekula sekondari.
Sanding Penemu
Abdul Aziz Abdul Talib 1983, “Menguji bacaan Bahasa Melayu Secara Diagnostik: Kaedah dan Tknik”, dalam Jurnal Dewan Bahasa, (Nov. 1983). Kuala Lumpur: Dewan Bahasa dan Pustaka.
Abdul Aziz Abdul Talib 1984, “Teknik Kloz Sebagai Alat Menilai dalam Bidang Pendidikan Bacaan Bahasa Malaysia”,dalam Jurnal Dewan Bahasa, (Feb. 1984). Kuala Lumpur: Dewan Bahasa dan Pustaka.
Abdul Aziz Abdul Talib 1984, “Psikolinguistik dan Pengajaran Bacaan Sekolah Rendah”,dalam Jurnal Dewan Bahasa, (Jun. 1984). Kuala Lumpur: Dewan Bahasa dan Pustaka.
Abdul Aziz Abdul Talib 1996, Menguji Kemahiran Bahasa:Prinsip. Teknik dan Contoh, Kuala Lumpur: Dewan Bahasa dan Pustaka.
Clay, M.M. 1982. The Early Detection of Reading Difficulties. Auckland: Heinemann Publishers.
Drummond, D. & Wignell, E. (eds.)., 1979. Reading: A Source Book. London: Heinemann Educational Books.
Ebel, R.L. 1979. Essentials of Education Measurement. New Jersey: Prentice Hall Inc.
Ebel, R.L. 1980. Practical Problems in Educational Measurement. Lexington: D.C. Heath.
Heaton, J.B. 1979. Writing English Language Tests. London: Longman Group Ltd.
Lamberg, W.J. & Lamb, C.E. 1980. Reading Instruction in the Content Areas. Boston: Houghton Mifflin Co.
Pusat Perkembangan Kurikulum, Kementerian Pelajaran Malaysia 2005. Bahasa Iban Tingkatan IV : Huraian Sukatan Pelajaran. Kuala Lumpur: Dewan Bahasa dan Pustaka.
Moseley, D. & Caroline, D. 1977. Language and Reading Among Underachievers : A Practical Review of Research. Windsor: NFER Pub. Co.
Ragget, M.S. et. al. (eds.) 1979. Assessment and Teaching of Reading. London: Wardlock Educational.
Smith, F. 1980. Reading Cambridge : Cambridge University Press.
Tiada ulasan:
Catat Ulasan