Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.
"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Sabtu, 16 September 2017

Iban...oh...Iban

Iban...oh...Iban
54 taun nuan udah meredika
Dalam Serakup Malaysia
Segulai sejalai enggau raban pupu bansa
Ukai serebana merinsa
Tang gaga kediri kaya

Iban...oh...Iban
Suba dikenangi ketegal pemerani
Suba dikenakut ketegal penyulut
Ambis menua ambis dunya
Nemu jerita bansa Iban
Jelai nama tampak rita.

Iban...oh...Iban
Kelia Iban sigi chukup pegari
Jelai nama tampak rita
Bujang berani semampai dipebasa belama
Enda mudah surut pama agi enseput di dada

Iban...oh...Iban
Menya ditemu mayuh orang
Enda ulih ditagang pama udah mansang
Enda mudah larat pama udah ngenat
Enda sengapa tumbang pama udah ngadang

Iban...oh...Iban
Diatu udah tepawah tepejuh jauh
Ketegal duit ringgit majak bepekit bebala mayuh
Ketegal pangkat Iban majak balat
Udah kelupa enda ingatka adat

Iban...oh...Iban
Majak mit mih bansa Iban dipeda dunya
Majak tinggal semampai dudi belama
Penyulut nyau baka seput ambis di dada
Pemerani semina didinga sejarah jerita

Iban...oh...Iban
Sinu mih ngenang bansa Iban
Neritik ga tudah ai mata naya
Ngenangka penyadi raban bala
Mudah diinang enggau jaku enda nyegenda
Mudah ditimang enggau leka semaya

Iban...oh...Iban
Enti maya ingatka bansa Iban diatu
Melundai ga ai mata labuh nerutu dagu
Chukup nyamai ninga sebana tang diri enda dipeda
Chukup  deka nitih peneka bala
Taja diri majak enda dipebasa

Nya alai...
Iban...oh...Iban
Aram angkat mih kasihka tudah diri
Badu duduk nyerungkung bekerendut dada
Aram angkat mih enggau jampat
Ngeleda ari lina awak badu beserebana
Rapitka genggam jari kanan sepiak jari kiba
Sama beripai begelumu enchelakka mata
Ngerupan sesama bansa
Kesuhka sintak dada enggau juluk ati
Awakka enda terus di baruh nimbun teda
Kesaika bulu siga nuan Iban
Bantaika bintihka purih besi
Pasangka taji pemerani
Awakka Iban enda mudah disabung ngapa
Enda melukuk di menalan sabung menua

Iban...oh...Iban
Dinga mih bala Iban
Agi idup agi ngelaban
Prinsip idup menya nyadika teladan
Anang mudah ngasuh jaku nya teberayan
Enggaika nuan diketawa bala kaban

Iban...oh...Iban
Aram mih Iban angkat memagang
Aram angkat enggau berumban
Angkat ngenaka ngepan
Pasukka jaku lalau
Dingaka jaku teladan
Ngambika Iban tetap idup
Semampai meruan.

Posted by at
Labels:

Tiada ulasan:

Catat Ulasan

Langgan: Catat Ulasan (Atom)