Literasi media mai reti pengulih kitai akses, mereti,
ngaga analisis sereta nyerenih sesebengkah isi mesej tauka penerang. Literasi
media mega bisi kaul rapit enggau pemansau runding kitai lebuh napi pekara nya.
Pemansau runding tu mih ke patut dikembuan genap iku
individu taja pan iya bisi deka tusah mimit ketegal bebida umur, endur diau
baik nya ba menua pesisir tauka pasar, tikas akademik, pemai-ulah sereta pengelandik
ngena teknologi pemadah. Lebuh nerima sesebengkah berita tauka isu kitai patut
mansik sereta nyidi penatai berita nya sereta agenda belalai ti disempulang
dalam berita nya. Tikas literasi ti manah ulih mantu mensia mayuh manding
sesebengkah ripot enggau sanding bukai sebedau ngaga peragam tauka mejah
sesebengkah pekara kelebih agi isu sensitif tauka isu politik empas ari berita
nya.
Endang enda ulih disakalka agi, media enggau teknologi
komunikasyen begansat enggau naka penyampat nengah mayuh leman platform media
sosial ditambah mega enggau isi pekara ti balat bebida. Semua tu ulih dikauk
sereta dikunsi enggau raban netizen ke bukai. Kompleksiti ari sukut rampa media
kontemporari ngujungka penanggul nyadi kelebih agi lebuh nyerenih sesebengkah
pekara laban ti nadai sekat maya ngenataika runding diri nengah media sosial.
Media sosial mega diperatika nyau nyadi instrumen dikena
ngakal mensia mayuh. Bisi aja raban ke enda betanggung jawab nguji deka ngajum
mensia mayuh enggau berita ti enda nemban lalu tu tau ngujungka penyarut nyadi.
Mensia mayuh kemaya hari tu enda tentu bepanggai ba
media mainstream agi baka surat berita enggau televisyen tang sida balat agi
nyadika media sosial baka Facebook, Twitter enggau Instragam alai sida bulih
berita. Ubah tu ngujungka persepsyen enggau runding mensia mayuh beba ketegal
mayuh leman penatai berita. Tu ulih ngasuh mensia mayuh ngayanka geregayak ati
ti bebida sereta nadai sempat meresa pun penatai berita baikka berita nya betul
tauka enda.
Penyampat penerang ba media sosial nyengkaum iya ti bisi
diselepak enggau elemen sensasionalisma endang enda tentu ulih diseliahka agi
tang patut diputar enggau patut. Ulah orang ti deka amai pechaya berita tauka
penerang ke bedau tentu temu pengamat ti dibantai ba media sosial tau ngujungka
empas ti negatif. Penyampat sesebengkah penerang diulih, disadung sereta
dikunsi nyadi faktor mensia mayuh balat agi milih media sosial enti dibanding
enggau media mainstream taja pan sida enda nemu pengamat pekara nya.
Ulah ke deka amat berumpak enggau pangan diri nyadi
orang ti keterubah mantaika berita mega udah nyadi siti budaya baru kemaya hari
tu. Tu mih ke selalu ngasuh sesebengkah berita tauka isu nya nyadi viral ba
media sosial.
Media sosial endang mayuh meri pengelebih enti dikena
enggau chara ti betul. Ba hal tu mih literasi media nya beguna amai awakka
mensia mayuh ngembuan penemu mida entara penerang ti manah enggau iya ti jai.
Pekara ti enda tau enda bisi nya lebuh nentuka pun
penatai berita baik nya ari primary
sources, secondary sources tauka
ari tertiary sources ngambika ulih mantu mensia mayuh nguna media
sosial nya ngena chara ti patut. Penemu tu ulih mantu sida nentuka pun penatai
sesebengkah penerang nya sebedau iya disadung ba media sosial.
Penau nentuka pun penatai berita ti amat nya ulih nagang
mensia mayuh ngarapka sengapa sesebengkah pekara lalu tau ngujungka sida
bekunsika berita tauka ripot pelesu nya.
Sebengkah undang-undang baka akta ti nyemetak dikena
mutarka penanggul salah guna media sosial kelebih agi iya ti bisi kaul enggau
ripot berita selebebu ngapa patut mega ditempa. Perintah patut meratika baru
undang-undang media ti udah sedia bisi. Ba rampa landskap media ti kompleks,
pekara tu udah meransang mensia mayuh ngenataika asai ati enggau nadai besekat.
Fenomena tu udah ngelangkah aris ti patut kelebih agi baka isu sensitif ti dibangkitka
sekeda keyboard warriors ke bekaul
enggau pengarap, bansa enggau skandal politik.
Undang-undang media patut diseruri manah agi kelebih agi
iya ti bisi kaul enggau media baru enggau media sosial dikena napi penguji ubah
pemansang teknologi komunikasyen kemaya hari tu. Naka ke diatu polisi media ba
menua kitai ditu dijaga mayuh bengkah institusyen ngujungka bisi akta enggau
undang-undang media nya belunjak.
Bisi akta ti enda relevan ketegal faktor teknologi ti
berubah. Kelimpah ari nya, bisi mega akta ti bisi dikena ba media chelak aja
lalu enda ulih dikena ba media baru baka
media sosial. Akta bukai ti dipejal dikena mutarka isu ti bekaul enggau media
sosial balat ngemediska Suruhanjaya Komunikasi Multimedia Malaysia (SKMM)
neritka adat. Sebengkah agi pekara ti patut dipikir nya numbuhka ejensi dikena
ngaga pemutus penemu senentang undang-undang media sosial nyengkaum pengawa
ngemata, nyaga sereta neritka adat.
Akta tauka undang-undang media ti rentang patut
dipejalai ngambika iya ulih mantu mensia mayuh bulih penerang tauka berita ti amat
lalu ulih ngenanka penyerakup rayat pupu
bansa enggau etnik di menua tu. Iya mega ulih nyeliahka mensia mayuh ari
ngeransi sereta ngeligan sengapa ketegal penerang ti bebida entara media
mainstream enggau media sosial. Akta tu mega ulih ngasuh media ngayanka
tanggung pengawa sida enggau manah agi lebuh ti ngaga ripot senentang
sesebengkah pekara.
Enti tuduh penemu baka tu ulih dipejalaika, dia industri
media ba menua tu deka ngasaika sintak seput ti baru nengah struktur
undang-undang ti manah agi ari selama setipak enggau pemansang teknologi
pemadah kemaya hari tu. Langkah rapat media literasi endang patut dikemeratka
raban politik sepemanjai maya ngambika penerang ti dikenataika nya nemban,
betul sereta amat.
Betul sereta amai ku nuan nya madi. Ulih meri email tauka lumur talipaun nuan madi?. Bisi utai deka kerandau ka kami enggau nuan.
BalasPadamNuan tau kuntik kami ba link pom tu: http://www.beritaiban.com/p/contact.html
Terima Kasih madi,
Admin BeritaIban.com