Baru-baru tadi dunya
akademik begau baru munyi ke ngalahka empatan lebuh Opis Menteri Pelajar Malaysia
ngeluarka siti rintai ngundan 402 buah sekula sekondari ba serata menua ti dikategorika
sekula angat tauka sekolah panas. Tu ukai semina nyengkaum sekula ke betapi
enggau isu disiplin aja tauka gempung isu disiplin tang mega mungkur pengawa nyalah
guna dadah ba raban nembiak.
Insiden nembiak berumur 14 taun malu siku pengajar indu
ngena kerusi ba sebuah sekula di Melaka baru-baru tu ngujungka pengajar nya
bakal ba jari. Tu entara pekara ke nambah penyampau krisis disiplin nembiak
sekula di Malaysia ti bisi nyadi kemaya hari tu.
Insiden baka tu tau dikiraka enda manah amai laban
nembiak kemaya hari tu nyau udah nadai bebasaka orang ke nguji deka nempa sida
nyadi mensia sereta narak sida enggau penemu sereta pengelandik. Tu bedau agi
ngira nembiak ke malut diri enggau pengawa gangsterisma sereta kongsi gelap,
kes majau indu, buli enggau penyalah bukai. Enti dikira rintai tu udu panjai,
enda ulih ditusun ngena jari sepuluh aja.
Hal dunya sekula ke majak betapi enggau pengawa jai tu
mejal Polis Diraja Malaysia (PDRM) kena parit
sama enggau raban sekula sereta opis pelajar dipinta mutar sekeda kes ti
dikategorika kes kriminal. Kemaya hari tu, nembiak sekula udah berani amat
ngereja pengawa ti lebih ari patut ke enda kala kitai pikir ulih digaga nembiak
munya.
Pengawa nyadi pengajar kemaya hari tu udah nyadi entara
pengawa ti majak ngeruga pengidup sida ke nyadi pengajar, tang ketegal juluk
ati ke deka nempa sereta ngasilka anak bansa ti beguna ngagai bansa enggau menua, dia raban pengajar
tu tetap enggai ngalah ngapa maya ke bejalaika misyen sida nyadi tukang tarak.
Kelia pengawa nyadi pengajar tu chukup dipebasaka mensia mayuh enda ngira
pangkat sida apai indai. Ukai semina nya aja, pengajar mega ditipak sama enggau
orang ke besai sereta ngembuan status ti manah dalam tikas penuduk komuniti
sereta dibela enggau chukup penyiru. Enti mensia mayuh bisi betemu enggau sida
maya ba luar jam sekula, sida mesti ditanya sereta dikerandau enggau penuh basa.
Indah bala apai indai ke bisi anak indu endang meruan
bisi juluk ati deka bemenantuka pengajar lalu enti amat nyadi, nya dikira bonus
sereta benasit amat laban nya utai ke amat nyadi. Nembiak ke ngelaban pengajar kelia
dianggap bedosa besai nama agi enti iya ngelaban pengajar nya ngena chara
fizikal sereta kasar. Penyalah sida nya sama baka sida ke ngelaban apai indai
sida. Enti diukum tauka dirutan pengajar di sekula, sida mega deka nerima ukum tambah
maya sida pulai ke rumah. Bisi mega raban apai indai meri pemendar ngagai bala
pengajar minta anak sida dirutan enti sida bisi ngereja penyalah di sekula.
Dunya udah berubah. Diatu kitai udah nyingkang ngagai
abad ke-21. Apai indai mayuh udah ngembuan pelajar tinggi. Ulah enggau chara
mensia nimbang penemu sereta mutuska pekara mega berubah. Kemaya hari tu, kitai
nadai agi ulih meda rutin di sekula baka ke dipeda kitai 30 taun suba. Kemaya
hari tu, enti bisi anak sekula dirutan, apai indai deka begaut nyerang raban
sekula.
Bisi sekeda nya sampai mai pekara nya ngagai court enti
anak sida bisi buya kena ditegu bala pengajar. Engka mensia kemaya hari tu nyau
majak nemu pasal undang-undang ngujungka sida enda ngemendarka anak-anak ditegu
tauka dianu pengajar.
Sekeda pansik ti bisi udah dipejalaika madah kereja nyadi
pengajar nya entara pengawa ti penuh stres kemaya hari tu. Sida ukai semina
betapi enggau tanggung pengawa akademik aja tang mega dipejal napi penanggul
bukai ke bisi bekaul enggau nembiak sida. Modul pelajar nyau majak maju
ngujungka pengawa nyadi tukang tarak tu betambah bekali lipat.
Aku sigi ngaku raban pengajar nya diintu sereta dirami
belama ninting taun ketegal pengawa sida kelebih agi maya Hari Pengajar tiap-tiap
taun. Tang taja pia, chukup tauka enda hari bulan 16 Mei nya aja alai kitai
ngenangka pengawa raban pengajar? Kebuah pia, laban laluh 364 hari agi sida enda ulih enda napi mayuh
macham leman perangai nembiak sereta nanggung penusah emosyen laban ke deka
nentuka anak kitai nyadi orang ke beguna.
Tiada ulasan:
Catat Ulasan