Raun nemuai nya pengawa digaga maya pemisi tauka
ngelantangka ati ke sesebengkah
endur. Tuju tu laban deka makai angin tauka ngelapangka runding baik nya enggau
diri sebilik tauka enggau bala tawing. Kemaya hari tu, palan nemuai ti ditapat
ba dalam menua nya nyau majak diterima mensia mayuh baik nya ari peranak menua
Malaysia tauka orang luar. Hal baka tu
nyadi ketegal ari pengawa perintah ti seruran ngaturka kimpin enggau pengawa
ngelakuka palan ditapatka temuai baka Pulau Langkawi, Pulau Pangkor, Pulau
Tioman, Melaka enggau palan bukai ti dituju ngagai rayat asal Malaysia enggau
rayat menua luar. Nitihka penemu Menteri Budaya, Arts enggau Heritage ke dulu
suba madahka industri dagang temuai ba dalam menua tu empu ulih ngerembai setipak
enggau palan ti ditapat temuai ba menua luar baka Pulau Bali, Disneyland enggau
ke bukai enti pengawa mantaika menua Malaysia dipejalaika enggau regas sereta disukung
mensia mayuh. Besenutuk enggau nya, siti ari obligasyen ti patut dilempai
ngagai raban apai indai iya nya ngasuh sida mai diri sebilik suah agi nemuai
ngagai palan temuai ba dalam menua kitai
empu dikena ngangkatka industri dagang temuai menua kitai ngagai tikas global. Raun
nemuai enggau diri sebilik ba menua kitai empu endang mai mayuh penguntung.
Aram kitai sama-sama belemati sereta betatika empas aktiviti raun nemuai enggau diri sebilik tu ba
menua kitai empu munyi ku jaku orang kemaya hari tu, ”enti enda ngelala kati
tau tak bisi pengerindu”.
Pemanah ti keterubah iya nya kaul entara diri sebilik
ulih dirapitka agi. Dalam sesebuah institusyen diri sebilik, pengiruh bejalaika
aktiviti diri empu besehari-sehari endang enda ulih disakal kelebih agi kemaya
hari tu. Apai enggau indai gagau enggau karier sereta kereja sida lalu bala anak
mega kiruh enggau pengawa sekula. Situasyen baka tu ngasuh awak ke patut alai
begulai enggau diri sebilik nya serekat amat. Nya alai, besenutuk enggau nya, aktiviti
raun nemuai enggau diri sebilik ba dalam menua kitai empu tentu bendar ulih ngerapitka
kaul ke majak lunggar nya. Kenu ku orang, iya ke jauh asuh kitai semak. Nya
kebuah, apai indai ulih mai bala anak maya kemisi, raun nemuai ba dalam menua
kitai empu kelebih agi maya peremisi sekula baka ngagai Kampung Budaya,
Kinabalu National Park, Tanah Tinggi Cameron, Genting Highlands enggau Bukit
Fraser. Program kemisi baka tu ulih ngelapangka runding diri sebilik laban sida
jauh ari pengiruh pengawa sida besehari-sehari. Ukai semina nya aja, awak maya
kemisi nya ulih mega diguna kena mutarka penanggul diri sebilik. Sida ulih
berandau entara sida empu pasal penanggul ti ditapi sekeda ari sida sebilik. Apai
indai enggau bala anak nemu sereta ulih meretika enggau dalam agi ati enggau
ulah pangan diri. Enggau nya, bala anak sereta apai indai deka berasai tebuka
agi berandau pasal hal diri sebilik. Pekara baka tu dipeda enda sengaja ulih nyelamatka
kaul diri sebilik sereta institusyen diri sebilik nya ari pechah belah tauka runtuh.
Reti nya, raun nemuai ba dalam menua kitai ulih ngerapitka kaul diri sebilik
awakka baka isi enggau kukut.
Kelimpah ari nya, raun nemuai maya kemisi enggau diri
sebilik ba menua kitai empu ulih ngurangka
penyakit sosial ke suah bendar nyadi ba raban nembiak redak kemaya hari tu. Makai
angin nya siti ari chara ti semitan dikena ngisi maya lepa sida. Maya pemisi
sekula bala anak ngembuan mayuh awak ke alai sida nadai bisi pengawa ti meruan.
Enti awak tu enda dilanggur apai indai enggau program ti manah iya tau bendar
ngujung bala anak deka anyut dalam dunya hedonisma ke ngujung ngerusakka
pengidup sida. Nya kebuah, peluang baka tu patut dikena apai indai merambu
program maya pemisi kelebih agi program dalam menua kitai empu. Sida patut ngena
peluang tu ngisi maya lepa raban diri sebilik enggau aktiviti ti bisi mai
penguntung. Palan ti seruran ditapat bala apai indai maya pemisi nya baka taman
tema ai ke mayuh amat digaga kemaya hari tu nyau baka kulat ti tumbuh sepengudah
ujan. Taman tema ti suah digusung raban diri sebilik nya baka Taman Tema Sunway
Lagoon, Taman Tema Bukit Gambang enggau Taman Tema Ai A’Famosa. Ari pengawa tu bala
anak ulih nyeliahka diri ari ngereja pengawa ti negatif kelebih agi maya pemisi
sekula. Tu ulih nyeliahka sida ari bechampur gaul enggau nembiak bukai ke
endang udah jai ulah. Apai indai mega ulih nemu aktiviti bala anak sida laban sepemanjai
maya ke raun nemuai, bala anak endang semampai enggau sida. Pekara ti baka tu
enda sengaja ulih nyelamatka kaul diri
sebilik ari pechah belah. Ari nya mega ulih iya ngasilka kaul diri sebilik ti harmoni.
Disimpulka enggau jaku pandak, reti nya pengawa bala anak dalam aktiviti ti enda
manah ulih diseliahka nengah aktiviti raun nemuai diri sebilik ba menua kitai
empu.
Sepekara agi ke patut diperatika kitai iya nya penemu
diri sebilik mega ulih betambah. Penemu ti berega nya penemu ti dikauk nengah
peneleba diri empu. Nya alai, mai raban diri sebilik raun nemuai ba menua kitai
empu ulih nambahka penemu sida sebilik ke
ngujungka penemuai nya deka semampai dikingatka sida. Anang kitai kelalu obses
enggau utai ke nyelai ba menua orang taja pan pekara ti sama bisi ba menua
kitai empu. Enti kitai enda nemu nama pekara ti nyelai sereta manah ba menua
kitai empu kitai tau disemaka baka pama ti ditangkup tachu. Enti pekara baka tu
nyadi, tentu kitai deka berasai malu lebuh temuai ari menua luar nanyaka pekara
ti unik ba menua kitai tang kitai enda nemu madah laban penemu ti serekat sentang
menua diri. Ambika banding, nemuai ngagai tempat besejarah baka Melaka enggau
Georgetown ulih meri mayuh penemu sejarah menua ngagai diri sebilik kelebih
ngagai nembiak rebak baru. Kitai enti nitih patut nerima sereta nyukung gela ’Tapak Warisan Dunia’ ti udah diberika UNESCO
ngagai Melaka enggau Georgetown. Bandar raya Melaka patut ditapat sereta dipatau
raban diri sebilik laban nengeri tu kaya
enggau sejarah ke udah ditinggalka ba Tanah Melayu baka Kota A’Famosa, Rumah Stadthuys,
Telaga Hang Li Po, Kubur Hang Tuah enggau ke bukai. Nemuai ngagai
nengeri besejarah baka tu tentu negapka penemu raban diri sebilik sentang sejarah menua ti bisi dipelajar bala
anak sida ba sekula. Reti nya enti
diperatika ari sukut implisit, kereban sejarah
tanah ai deka terus diintu sereta semampai lekat dalam memori genap iku peranak menua tu
ngambika enda retai ketegal panas, enda sebah laban ujan. Disimpulka ngena jaku
pandak, reti nya penemu diri sebilik sentang penyelai menua diri empu ulih dijapai
nengah aktiviti raun nemuai enggau diri sebilik ba menua diri empu.
Enti kitai mansik ari perspektif ti bukai, aktiviti raun
nemuai ba menua diri empu enggau diri sebilik mega ulih ngangkatka ekonomi menua ngambika menua kitai
ulih duduk sama pemaruh sereta bediri sama peninggi enggau menua bukai ti udah maju.
Kebuah pia, laban genap raban diri sebilik enda ibuh muai duit nemuai ke menua
luar; kitai sama nemu taja pan ujan mas ba menua orang, ujan batu ba menua diri
empu, manah agi mih ba menua diri. Nya kebuah, lebuh raban diri sebilik raun ba
menua diri empu aja, duit ringgit ulih diseliahka pansut ke menua bukai. Ukai
semina nya aja mega, menua kitai ulih ngena duit ke bepusin nya tadi dikena
ngemansangka sektor dagang temuai menua enggau manah agi. Nambahka nya mega,
indah penatai raban temuai ari menua luar ulih ngangkatka ratio betukar duit
lalu tu ulih nambah penyampau penatai pemisi menua. Sektor hotel nerima untung
ti besai lebuh temuai diau bemalam di hotel baka Hotel Seri Malaysia, Hotel
Vistana Kuala Lumpur, Hotel Bahagia Langkawi enggau Hotel Riverside di Kuching.
Pekara tu ulih dipeda nengah pemansang begagaka rumah hotel ke benung regas
bejalai ba serata menua kitai. Kelimpah ari nya, bisi mega motel enggau chalet
digaga raban tauke palan makai angin ungkup bala temuai ke bisi datai. Mayuh
agi tempat alai ngenduh digaga, mayuh agi peluang bekereja tebuka ngagai rayat
Malaysia. Tu ulih ngurangka penyampau rayat kitai ke nadai batang pengawa. Nya lai,
raun nemuai enggau diri sebilik ba menua kitai empu sigi ulih ngemansang
ekonomi menua.
Nengah aktiviti pakej temuai enggau diri sebilik ba menua
tu empu mega ulih ngangkatka tikas palan temuai menua tu ba mata dunya. Kebuah
pia, laban lebuh siti-siti palan endur temuai nya seruran ditapatka temuai ari
dalam enggau menua luar dia temuai bukai ke sebedau tu enda kala ngagai tempat
nya deka ngembuan pengingin ati tauka inkuiri deka meda palan ti nyelai sereta unik
sepengudah ninga berita ari sida ke udah nemuai kia. Nya kebuah, lebuh palan
nya semampai ditapat sereta nyadi buah mulut bala temuai baka Tanah Tinggi Genting enggau Tanah Tinggi
Cameron, tempat nya enda putus-putus nerima penatai temuai. Nya ngayanka tempat
nya deka diakun nyadi palan ke tebilang ti ditapatka temuai antarabansa. Nangkanka
nya, misteri enggau penyelai ti bisi ba menua kitai mega ngasuh bala temuai
deka matau rampa menua nya; ambika banding baka misteri bungai Rafflesia; iya
nya bungai ti pengabis besai di dunya. Ari nya tadi, pekara tu enda sengaja meri
tempias ngagai industri menua tu empu kelebih agi baka industri di menua
pesisir. Nya kebuah, kitai enda ulih nyakalka penemu ti madahka pengawa raun nemuai
ba dalam menua kitai empu nya sigi ulih ngangkatka menua kitai tu ngagai tikas antarabansa.
Dikena nyimpulka penemu, munyi ku orang tuai, udah terang
agi ga besuluh madahka pengawa raun nemuai ba menua kitai empu kelebih agi
enggau diri sebilk mayuh mai pemanah baik nya ngagai institusyen diri sebilik
nya empu tauka ngagai menua kitai Malaysia. Industri dagang temuai endang
napatka pemansang ekonomi siti-siti menua. Nambahka nya, industri dagang temuai
mega nyadi katalis ngagai industri bukai awakka sama-sama ngerembai mansang
lalu nambahka asil ekonomi menua. Nya kebuah, apai indai enggau raban diri
sebilik mesti nyukung industri dagang temuai menua tu empu dikena ngangkatka industi
tu ngagai panggau dunya antarabansa. Taja pan baka nya, pengawa tu enda patut
semina dilempai ngagai perintah enggau diri sebilik aja laban betempapka sepiak
jari aja tentu enda ngasilka sebarang bunyi. Nya alai, aram mih semua peranak
menua Malaysia berakup sempama baka jaku tuai; ke berat sama ngangkat, ke lempung
sama nanggung lalu besemangat tinggi ngeninggi Bukit Everest ngambika industri
dagang temuai kitai tebilang ba panggau dunya. Kitai sama bela ngarapka
komitmen ti tegap ari genap lapis rayat kitai dikena ngamatka pengadang kitai
nya awakka jemah ila palan ti ditapat temuai ke bisi di Malaysia deka bulih publisiti
ke besai lalu nerima perati ti serius ari semua peranak menua lalu nyadika
palan temuai ti jelai nama ba mata dunya. Nya kebuah, rayat Malaysia ke deka
ngabiska kemisi sida di menua luar patut bepikir dulu taja pan ujan mas di
menua orang, ujan batu di menua diri empu, manah agi mih ba menua diri. Kapa enda
pun kayu terus beguyat, matahari terus manchar, ngambika industri dagang temuai
menua kitai terus mansang di serata dunya.
Tiada ulasan:
Catat Ulasan