Kemaya hari tu mudah bendar alai mensia
mayuh deka meri komen pasal sesebengkah pekara ketegal segang pemansang
teknologi pemadah. Geragayak raban pengajar ti dikenataika dalam komen sida seruran dipunggah niki ke laman sosial Menteri
Pelajar. Mayuh orang nyukung pengawa transformasyen pelajar ti dipejalaika Opis
Menteri Pelajar ari baruh Pelin Pemansang Pelajar Malaysia (PPPM) 2013–2025. Bisi
mega sida ke bekunsi mayuh leman peneleba ti balat ngeruga raban pengajar ba abad ke-21 tu.
Komunikasyen dua arung entara raban pelajar
enggau menteri tu diterima enggau chukup manah. Platform digital ti dikena Menteri
Pelajar baka Facebook, Twitter, Instagram enggau laman web iya empu ngangkat
iya nyadi tuai pemesai menua ti regas ba media sosial. Pemai ulah iya ti tebuka
sereta ulih nerima komen pasal mayuh leman pekara ngasuh iya ulih meri respon
terus ngagai komen ti diterima iya. Nyata
amat peneleba iya ke kala nyadi tukang tarak ngasuh iya ngembuan empati ngagai
raban pengajar ti napi mayuh macham penguji lebuh narak anak nembiak jeman
Revolusyen Industri 4.0 tu.
Nembiak kemaya hari tu tau dikumbai digital
natives ketegal lebuh sida ke enchelak aja mata sida lalu terus bepegaika gajet
dulu. Nya alai, pengidup nembiak jeman tu endang balat bekaul enggau guna
teknologi ti majak dikena tang patut tauka enda langkah rapat ngajar enggau belajar
agi nitih chara lama iya nya bepusat ba pengajar. Sekula diatu ukai agi palan
alai ‘ngauk lelemu’ baka fungsi maya pengajar nya suba ke agi digelar nembiak, belas tauka puluh taun suba.
Maya nya suba sanding penemu semina sekula laban mayuh apai indai maya nya suntuk
endur nyediaka kereban bacha ba rumah. Librari mih nyadi tempat nembiak ke aus penemu
begelumu deka nambahka penemu ti dibagika raban pengajar. Bup mega nyadi tawing
bala nembiak ke nemu nasit sida jemah ila endang balat bepanggai ba pemutus
akademik ti lati.
Tang taja pia, jeman udah balat berubah
ketegal segang pemansang teknologi. Penemu kemaya hari tu ulih diambi ngena
ujung tunjuk ke semina nyulik telefon pintar ti dikembuanka mayuh nembiak sekula
enda kira dini endur sida diau. Ba sekula di kandang endur ke enda ulih nerima teknologi
wifi, perintah nengah Opis Menteri Pelajar bisi nyediaka perengka jaring kereja
tauka network nengah Very Small Aperture
Terminal tauka VSAT dikena mai dunya luar ke menua pesisir. Utai ti beguna amat
iya nya nembiak peranak menua kitai enda tinggal arus pemansang ti regas amat
nyadi kemaya hari tu. Tanggung pengawa bala pengajar mega sama berat enggau
tanggung pengawa bala apai indai enggau komuniti dikena nentuka bala anak tu
enda tinggal tauka anyut dalam arus teknologi ti regas nyegang.
Endang amat tanggung pengawa individu ke
dikumbai pengajar balat bendar ngeruga sida ba pelajar alaf kediatu. Kemaya hari
tu, pengajar ukai semina nyadi subject matter expert tauka tebangkar dalam
bidang diri empu, tang mesti bepikir jauh ke mua sereta berundingka penyadi
bala nembiak ke ditarak sida dalam timpuh sepuluh tauka dua puluh taun ti deka datai.
Bah baka ni penau enggau pengulih ke bisi ulih dikilir ngambika sida mujur
nyadi peranak menua ti lati? Bah nama penemu, pengelandik enggau ukur pemanah
ti patut dikemisika nembiak dikena sida meri pulai ngagai pemansang menua?
Raban pengajar enda tentu ibuh bepikir panjai
laban saut tu udah diterangka enggau lenak dalam PPPM 2013-2025. Pelin operasyen
enggau strategik ti udah dilangkarka sida ke tebangkar ba pelajar bepelasarka
data ti diambi ari pansik antarabansa enggau lokal, sereta input ari mayuh lapis
komuniti tu udah ngerintaika Enam Aspirasyen ti patut diterenakka ngagai nembiak
awakka setimbang ari sukut penemu enggau ulah bepelasarka Filosofi Pelajar
Bansa. Ba bala nembiak tu sida napi penguji jemah ila ke bedau temu gaya. Nya kebuah
bala nembiak sekula patut diiri enggau penemu, pengelandik bepikir, pengelandik
bejaku dua bansa jaku, pengelandik nyadi tuai, etika enggau pengarap sereta
disempulang enggau identiti nasional.
Pengawa ngemasukka Enam Aspirasyen tu ukai
pekara ti mudah laban iya begunaka penyerakup kaul enggau ubah
dalam sistem pelajar nya empu. Nya alai, ketegal nya Opis Menteri udah
ngengkahka Lima Aspirasyen ti patut dijapai sistem pelajar menua. Tu nyengkaum Akses,
Kualiti, Ekuiti, Penyerakup enggau Penyikar. Ubah dalam chara gawa patut dipejalai
ngena chara kaul jaul nengah 11 Singkang
ti udah ditentuka. Tu mungkur mayuh bengkah pekara ti udah dianggurka nyengkaum
pengawa nyediaka kurikulum betikas antarabansa ti dikamatka nengah mayuh leman
inisiatif; mungkur pengawa ngemasukka Pengelandik Bepikir Tikas Tinggi (PBTT) ti dipejalaika nengah Kurikulum
Standard Sekula Primari enggau Sekondari ba kelas abad ke-21 ti ditisih nengah
Tisih Bepelasarka Sekula (TBS).
Niat tuchi ke deka nyediaka nembiak ungkup
jemah ila endang patut nyadi visyen genap iku pengajar. Nya kebuah kitai selalu
macha geregayak enggau serebana bala pengajar ti seruran , dikungsi ba media
sosial ke madah munyi tu – “Biar mih kami enggau pengawa kami ke narak nembiak,
kami nemu nama utai ti manah ungkup nembiak kami”.
Ari nya kitai beratika endang terang amat
pengawa tukang tarak ukai semina narak nembiak dalam konteks meri penemu aja. Pengawa
pengajar kemaya hari tu sama-sama enggau apai indai sereta komuniti nukuh siti pelajar
dikena ngasilka nembiak ti ngembuan seregah diri ti manah ngambika sida nemu
mida entara iya ti betul enggau salah. Kerekai penerang ti nyadi kemaya hari tu
ngayanka pengelati akademik aja ukai agi penentu pemujur nembiak jemah ila.
Peluang belajar sepemanjai maya sedandang tebuka ungkup semua anak peranak
menua tu. Iya ti patut dikemeratka nya pengawa nukuh nembiak ti setimbang
ngambika sida ulih meri pengelantang ngagai menua.
Nya alai, beserimbai enggau pemutus UPSR ti
deka dipadahka kena 23 November 2017, bala pengajar enggau nembiak enda patut
bendar dilempai enggau pengawa ngeramika sida ke bulih 6A aja. Pengajar enda ibuh kiruh ngatur
pengerami naburka gerah penyampau nembiak ti lati ba akademik nya sereta ngasuh
sida niki ke panggau laban beratus-ratus calon UPSR ke bukai semina merati aja pangan
sida ti diramika. Tu ke ngasuh geregayak ati sida nya berasai nadai berega ba
mua orang mayuh. Ingat, UPSR semina singkang keterubah dalam pejalai pengidup
sida.
Tiada ulasan:
Catat Ulasan