Langkah rapat bebida
berengkah ari taun 2017 tu lebuh ngeripot pemujur nembiak ke besekula ba tikas
sekula primari sepengelama enam taun. Pemujur nembiak ba sekula primari nitihka
atur tu ukai agi meri fokus ngagai pemujur pemutus UPSR aja. Pemujur nembiak
dipeda nengah ripot ti nyampun agi ari selama ke dikumbai Ripot Tisih Sekula
Primari tauka dalam jaku Melayu nya Pelaporan
Pentaksiran Sekolah Rendah (PPSR). Ripot tu holistik agi, komprehensif
sereta meri penerang ti amat pasal penyadi sereta pengulih nembiak.
Ripot tu ulih diguna
bala ke patut kelebih agi baka raban pengajar, apai indai, nembiak enggau raban
komuniti ngambika sida nemu sereta ulih mantu merambu pelajar nembiak ba tikas
sekula ti nangkan tu.
Kelimpah ari nya,
Gred Purata Sekula (GPS) nadai agi diripot berengkah ari taun 2017 mega baka ke
suah dikereja Opis Pelajar ngelama tu. GPS enda diripot baka ke udah dikena
nyeliahka sekula mandingka prestasi sida enggau sekula bukai. Tu ulih nekan
sida ke bisi kaul enggau pekara tu. Nambahka nya mega, penyadi nembiak ulih
diberi perati beratka agi nengah asil ari pengawa ngajar enggau belajar ti
semitan lalu ukai agi difokuska ngagai GPS ti diasilka ari pemutus peresa ba
tikas pusat.
Taja pia, format
peresa UPSR taun 2017 agi sama baka format UPSR taun 2016. Reti nya nadai ubah
ba tukuh enggau pelasar pekara ti tanya.
Enti diperatika
enggau silik agi endang bisi kaul pemansang nembiak ba tisih bilik kelas enggau
pengulih sida ba UPSR. Tisih ba bilik kelas disebut Pentaksiran Bilik Darjah (PBD) dalam jaku Melayu. Pemansang pelajar
nembiak ba PBD nambahka pengulih sida lebuh ngambi UPSR. Enti pekara ti diajar
nya semitan sereta meruan nyadi dalam PBD, nembiak ulih ngayanka prestasi ti
manah dalam UPSR. Kebuah pia, laban UPSR nya ngenapka pengawa PBD.
Dalam UPSR semina
enam mata pelajar ti ditisih. Taja pia, mata pelajar tu ngarika mata pelajar
bukai ke bisi diambi nembiak ba sekula. Mata pelajar tu ngemeratka pengulih
literasi, numerasi enggau pengawa bepikir.
Tiada ulasan:
Catat Ulasan