Tisih Bilik Kelas

Tisih Bilik Kelas tauka Pentaksiran Bilik Darjah (PBD) dalam jaku Melayu nya tisih ti dipejalaika sepemanjai maya. Iya dipejalaika lebuh sesi ngajar enggau belajar. Tuju PBD tu dikena ngulihka penerang tauka data sentang pemansang, penau enggau pengulih nembiak. PBD tu balat agi betukuh format iya nya ngemeratka pemansang genap iku nembiak sereta mantu pengajar ngaga diagnostik dikena mansik pemansang pelajar nembiak sepemanjai maya ngambika ulih diperambuka langkah rapat ngajar ti baru dikena napi sebarang pekara ti nyadi ari tisih nya.

PBD tu dulu suba dikumbai Tisih Sekula tauka Pentaksiran Sekolah (PS). Iya berengkah dipejalaika dalam taun 2011. Dalam taun 2016 PS berengkah dikumbai PBD.

Sebedau penatai PBD tisih ke di sekula nya dikumbai Tisih Bepusatka Sekula tauka tampak agi dikumbai Pentaksiran Berasaskan Sekolah (PBS). PBS tu sebengkah pengawa nisih ti betukuh holistik. Iya mungkur pengawa nisih ari aspek kognitif (intelek), afektif (emosyen enggau spiritual) sereta mega psikomotor (selangkuh tubuh). Pengawa nisih tu setipak enggau Filosofi Pelajar Bansa. Nya alai, bisi empat komponen dalam PBS iya nya Pentaksiran Pusat (PP), Tisih Aktiviti Selangkuh Tubuh, Sukan enggau Kokurikulum (PAJSK), Tisih Psikometrik (Ppsi) enggau Tisih Bilik Kelas (PBD).

PBD munyi ke diterang di atas nya tisih ti dipejalaika sepemanjai maya iya dipejalaika maya proses belajar enggau nagajar (PdP) sereta diungkupka semua mata pelajar. PBD tu ukai dikena mandingka tikas pengulih nembiak tang tuju iya lebih ngagai mantu  ngemansangka pelajar nembiak kelimpah ari nyaup pengajar ngemanahka agi ajar sida.

Dalam PBD semua mata pelajar KSSR (Review 2017) Taun 1 ngagai Taun 6. Semua mata pelajar KSSM Pom 1 ngagai Pom 5. Taja pia ripot PBD semina ari Pom 1 ngagai Pom 3 aja.

PBD tu endang besai bendar guna dalam pengawa belajar enggau ngajar. Iya ulih mantu pengajar:

- meransang runding deka nemu (inquisitive), kritis enggau kreatif

- nentuka penguat enggau pengelemi nembiak ba pelajar sida

- nerenak nilai pengarap, ajar manah, estetika enggau patriotisma

- nyidi pemansang nembiak ari semua sukut

- merambu lalu ngubah baru langkah rapat ngajar

- nentuka ajar nya semitan

- berundingka chara ti engkeman dikena mutar sebarang pekara kemaya nya

PBD dipejalaika sepemanjai maya proses PdP sereta digaga sepemanjai taun. PBD dipejalaika nengah mayuh leman langkah rapat nisih baka chara merati, nulis, bejaku, kereja projek, kuiz, besara penemu ba mua mayuh enggau aktiviti pelajar ti bukai bepelasarka Standard Tisih sereta belalauka timbang profesional pengajar.

Tikas pemansang nembiak dalam PBD direkod dalam templat ti udah disedia sereta diripotka Komiti Jamin Kualiti PBD di peringkat sekula dituju ngagai nembiak enggau apai indai. Komiti tu nyengkaum:

- Prinsipal / Kepala Pengajar

- Penolong Kanan Pentadbiran

- Penolong Kanan Hal Ehwal Murid

- Penolong Kanan Ko Kurikulum

- Penolong Kanan Petang

- Penolong Kanan Pendidikan Khas

- Guru Kanan Mata Pelajar / Tuai Bidang

- Tuai Panitia

- Pengajar Lati

- Jurulatih Utama (JU)

- Sapa-sapa pengajar ke dituduh Prinsipal / Kepala Pengajar / JK PBS

Penyuah ripot PBD dikeluaraka dalam setaun nya abis kurang dua kali. Penerang tambah  senentang PBD ulih diambi ari Bup Malin PBD, Laman web http://bpk.moe.gov.my , JPN tauka PPD.