Penyelai bansa Orang Asli

Majoriti sida tu bekulit chelum, bebuk geletang lalu ngiaska pala sida ngena pengias ti dikumbai Tempok. Pekara ti disebut nya tadi endang sinonim bendar enggau utai ke nyadi ba menua kitai. Raban sida tu kemerah amat, nyamai ditanya lalu seruran besedia nyaup bala orang ke matau sereta nujah kampung tauka niki bukit ke minta bantu sida nyadi pemalin jalai.

Pengidup sida endang semak amat enggau kampung sereta rampa pala menua. Bisi orang nganggap sida tu raban ke agi jauh tinggal pemansang komuniti ke moden sereta sofistikated. Realiti iya enda baka nya laban Orang Asli tu ukai raban ke tinggal pemansang. Sida tu komuniti eksklusif ke bepegai teguh ba budaya, adat enggau pengarap ti semampai diturunka ngagai serak ke baru. Penyelai sida mega entara elemen ke ulih narit ati raban temuai ke menua tu. Agi mega Malaysia endang tebilang enggau pengarap, budaya enggau pupu raban bansa.

Di menua Malaysia penyampau Orang Asli bisi lebih 200,000 iku. Sida tu mungkur tiga raban komuniti ti besai iya nya Negrito, Senoi enggau Melayu Proto. Raban tu dibagi ngagai 18 sub etnik komuniti ti nyengkaum etnik Kensiu, Kintak, Termiar, Semai, Kuala enggau Kanaq.

Opis Pemansang Orang Asli tauka Jabatan Kemajuan Orang Asli (JAKOA) nya entiti ti nentuka raban tu semampai mansang sereta maju. Agensi tu mega nentuka penyelai budaya Orang Asli ulih narit ati sektor temuai menua. Pengawa eko temuai ke dipejalaika Orang Asli dikira agi baru. Aktiviti pemansang modal mensia dipejalaika dikena numbuh malin temuai ari raban bansa sida tu.

JAKOA mega meransang komuniti Orang Asli ngaga home stay di genturung pendiau sida empu laban sida tu endang tebangkar dalam eko temuai sereta budaya ti nyelai ngambika ulih dibantai ngagai temuai ti datai. Entara genturung pendiau Orang Asli ti bisi program home stay nya baka Kampung Gop laban bisi bunga rafflesia ba kandang endur nya. Tu ulih narit penatai temuai datai ngagai genturung menua sida.

JAKOA mega meransang mensia mayuh datai ke genturung menua Orang Asli di serata menua kitai ngambika ulih nemu pengidup enggau budaya sida ti unik nya. Taja pia, JAKOA minta mensia mayuh madah ngagai sida  sebarang aktiviti ti deka dipejalaika ke bisi mungkur Orang Asli sekalika nya ba peringkat nengeri tauka pelilih menua. Langkah tu dipinta ngambika JAKOA ulih mantu temuai ti datai kia nerima kerejasama ari sida ba genturung menua nya laban bisi sekeda ari bala sida tu agi malu deka betemu enggau orang luar.

Enti mensia mayuh majak ngatur program komuniti ba genturung menua  Orang Asli, iya ulih mai empas positif ari sukut pemansang ekonomi enggau pugu infrastruktur ti diguna raban tu. Misi humaniti ti dipejalaika sekeda raban ambika banding baka nyaup ngangkatka penemu senetang pengerai, pelajar enggau pemansik ulih mengemansangka aktiviti sosial komuniti Orang Asli kelebih agi ngagai sida ke diau jauh di pala menua.