Pengidup Bansa Mentawai

Sub etnik Mentawai nya entara bansa orang asal ti agi ngemeran gaya idup primitif lalu agi diau dalam kampung jerung jauh ke dalam di Indonesia. Bansa tu mega tebilang ketegal ukir pantang ba tubuh lalu ngemeranka pengawa ngenajamka ngeli sida laban pechayaka iya tau ngasuh sida manah agi dipeda.

Penyampau sida tu kira-kira 64,000 iku lalu diau di kampung sereta ngena pengelandik ngasu beburu lebuh begigaka pemakai. Alai sida bansa Mentawai diau dikumbai Umas. Umas tu digaga ari buluh, kayu enggau rumput. Genap buah tempat diau sida mega dirias enggau keruntuk jelu ke diasu sida.

Raban bansa Mentawai nyengkaum sida ke indu ngembuan pantang ti nyelai sereta tatu unik ba tubuh sida. Pantang nya ngelaika penuduk sida dalam komuniti nya. Pantang tu digaga nengah chara tradisional; iya nya ngena jarum enggau kayu. Proses nya bala pedis.

Diau ba kampung jerung ke jauh ari nengeri ngasuh pengidup bansa Mentawai tu unik lalu jarang amat ditemu orang dunya luar. Taja pia siku tukang gambar  ti agi biak sereta orang ke empu menua benama Muhammad Fauzy Chaniagom dikemendar diau enggau bansa sida nya di Sumatera Barat sepengelama empat hari. Peluang nya dikena Muhammad Fauzy, 19  enggau penuh. Iya mujur ngerekod pengidup unik bansa sida nya. Nitihka tukang gambar tu, taja pan sida jarang betemu enggau orang luar, bansa Mentawai ke bendar nya balat kemerah enggau orang. Sida ngelalu temuai enggau chukup siru.

Mentawai nya entara sub etnik orang asal ti agi ngemeranka chara idup tradisional ti dititi ditali ari aki ini sida. Bansa tu enda nerima semua pekara ti bisi kait enggau pengidup moden lalu agi ngetan pekayan tradisional, kereban enggau tradisional nyengkaum pantang sida. Genap iku ari sida ngembuan tanggung pengawa diri empu. Ambika banding, sida lelaki ngasu beburu begigaka pemakai lalu sida ke indu nyaga anak di rumah.

Pengawa berimbaka kampung enggau enda beradat ngujungka raban bansa tu diruga segang pemansang moden ti nyau majak ngempitka pengidup sida.