Nama utai ke nambah ba kos daya idup kemaya hari tu?

Tu mih entara tanya ti suah nyadika ramu jaku lebuh bejuraika daya idup kemaya hari tu. Baka ni nuan bekelimat, baka ni kitai bulih duit lebih, nama ke dibuai ari belanja kitai, nama guna kitai nyimpan duit?

Tanya sigi mayuh tang balat agi ketegal pengibuh kitai senentang kos daya idup ti majak niki sepemanjai maya. Tu mih kadang-kadang ngasuh sida ke tuai nya enda tentu meretika pekara tu bebanding enggau rebak kediatu. Kebuah pia, laban maya taun 1970 suba nyentuk ngagai 2005 endang nadai telefon pintar. Taja pia kitai maya nya agi ulih  muka tauka ngelawa media sosial tauka laman web tang ungkus data maya nya udu mar enti dibandingka enggau diatu. Kemaya hari tu kompeni telekom nyau belaban enggau pangan diri beberika barang pechuma enggau pakej ti murah laban ke deka berebutka bala orang bebelika servis telefon ari sida. Bisi maya suba, indah muka WhatsApp pan bebayar.

Berebak enggau maya nya mega, Astro pan bedau tentu regas baka iya ti diatu. Bisi mega kompeni tv bukai baka Mega TV tang penyampau bayar enda bangat mayuh baka diatu lalu diatu tv baka ke udah disebut nya tadi disempulang enggau servis bukai baka iFlix, Netflix tauka Lulu. Iya ti ngalitka ati mega maya nya suba, Astro dikira utai ke enda tau enda dikembuan kelebih agi ba bala sida ti rindu meda main bol. Semua pekara bukai nya enda tentu beguna tang semina main bol nya aja. Nya alai kitai bisi meda sekeda orang nya sanggup meda program main bol tu ba restauran indah maya jam 3 pagi.

56K modems nya pekara biasa tang caj tauka bayar iya nyau baka bom. Diatu nyau deka selampur orang udah bisi broadband. Pengajar enggau pengelicha ngarapka bala nembiak iya bekomunikasyen nengah sistem pesan enggau emel, bekunsika pelajar enggau pekara ti deka dibantai nengah cloud. Maya tu mega bala nembiak dalam raban ngambi note ke dipending sida nengah teknologi tu. Anang enda ingat mega, dulu suba kitai nulis ba atas keretas tang diatu kitai naip ba komputer personal, ba telefon pintar tauka terus ke kafe siber nembuka pengawa ke diberi pengajar tauka pengelicha.

Ketegal semua nya enggau ulah ke enda ulih nerima informasyen ti lubah dia mesin faks tauka teleks udah enda tentu dikena agi laban dekaka gajet ke jampat agi. Semua pekara tu ngasuh produktiviti berega lalu baka nya mega kos daya idup.

Diatu mayuh orang udah nadai hari nyediaka perarau diri empu di rumah tauka pulai ke rumah merarau baka ke seruran digaga kelia. Diatu mensia mayuh balat fokus ngagai makai ba luar. Hal ke begunaka laki bini bela gawa, ngaji orang beribunka anak sereta tambah enggau kos bukai baka meri duit belanja ngagai apai indai udah majak nambahka kos daya idup kemaya hari tu.

Berebak enggau nya mega, kereban ke ngasuh pengidup nyamai ari selama mega nyau majak mayuh. Uji kitai meratika barang ke dibeli orang nya baka injin kena ngaga ruti paun, kali letrik kena nguring mayuh macham bansa pemakai, oven enggau mayuh agi kereban dapur bukai. Nitihka pansik ngelansa, kira sepintu bilik enda kurang ari lima kali setaun bebelika barang tu. Nama agi sida ke diau ba apartmen tauka kondominium tentu bebelika injin ngerangkaika gari laban ke enda chukup endur alai ngeredaika gari. Tu mega nambahka kos daya idup.

Kitai mega anang enda ingatka gaya hari kitai ke bisi maya iya hari nya balat amat angat. Dia tentu kitai begunaka airkon. Semua kos tu ayan ba bil letrik enggau bil ai kitai semadi mih kitai diau ba menua Selangor ke alai bil letrik tauka ai nya bisi murah mimit ketegal diberi perintah rebet.

Baka nya mega kos daya idup bukai nyengkaum bayar pupuk kerita, chukai jalai, insurans, tol ngagai sida ke nengah jalai betol, bayar endur engkah kerita, minyak sereta kekadang saman balat ngemediska pala sekeda ari kitai kemaya hari tu.

Telefon pintar kemaya hari tu mega nyau disangking enggau mayuh leman apps. Tu mega bisi kos ninting bulan. Lalu diatu mega kedai tauka orang dagang udah berengkah nerima kad debit, tv mobile enggau filem bebayar, main virtual ke bebayar sereta mega berita tauka majalah atas tali.

Ngagai sekeda ruang bilik tauka apai indai ke enda sempat bebelika barang ba pasar raya sida ulih bepanggai ba servis chara online ke disediaka Tesco, Jaya Supermarket, Honestbee enggau HappyFresh. Indah sida ke udah lelak pulai ari kereja lalu lembau deka pansut makai di luar ulih nguda pemakai sida nengah chara online ba FoodPanda, McDonald tauka UberEats. Baka nya mega enti udah nadai awak deka bebelika barang ba pasar raya dia kitai ulih meli chara online ba Lazada, Zalora tauka AliBaba. Ngagai sida ke ba kelas penuduk pengidup ti tinggi sida nyangka  bebelika barang online ba menua luar baka ari Asos tauka Mr Porter. Kerita mega ulih dibeli nengah online.

Semua utai ke udah disebut di atas  nerenak siti runding ngagai kitai – iya nya lebuh kitai bejakuka kos daya idup, leka jaku ‘daya idup’ nya patut diperundingka enggau lenak. Nama ke bendar nyadika gaya idup orang Malaysia kemaya hari tu? Lalu nama reti utai ke disebut lebuh kitai bejaku pasal kos daya idup udah niki?