Apai
indai nya mih pengajar ti keterubah lalu nyadi tukang tarak sepemanjai maya
ngagai anak sida ari sida iya mit nyentuk ke besai. Dalam hal tu, apai indai
nyadika pun penyakang ke anak sida datai ngagai sida ulih ngidup kediri. Taja
pia, sukung tu enda semuti tak ngetu ba nya aja. Apai indai mega nyadi tempat
anak bepanggai lebuh sida betapi enggau sebarang penanggul lalu maya sida begunaka
chara dikena mutar penanggul ti ditapi nya. Ketegal nya, tanggung pengawa apai
indai ngibun ngerengkun enggau narak sida kelimpah ke nyadi tempat alai
bepanggai endang enda ulih dikira enggau sebarang utai baka mata duit tauka
reta tengkira.
Pemesai
rega apai indai ngemesaika anak lalu ngasuh sida nyadi orang ke betanggung
pengawa endang enda ulih dibayar ngena reta tengkira tauka duit ringgit. Bah,
katika semua pekara ke digaga apai indai ke anak sida ngelama tu ulih kini
dibalas semua anak lebuh apai indai sida udah tuai ila?
Kemaya
hari tu kitai kala ninga berita, jari ke kala nayunka wa lalu ngemesaika anak
sida baka ke mai minyak penuh suah
ditempaya bala anak sida enti sida udah tuai. Amat munyi ku orang, siku
apai tauka indai ulih ngibun sepuluh iku anak tang sepuluh iku anak bedau tentu
ulih nyaga apai indai sida ke udah tuai. Baka nya mih nasit sekeda ari orang
tuai ba menua kitai. Sekeda ari sida udah ditempayaka anak sida empu.
Nitihka
ripot ari Opis Pengintu Pengelantang Pendiau Mensia Mayuh taun 2010
madahka ari sembilan buah Rumah Orang
Tuai (Rumah Seri Kenangan) bisi 1,868 iku iya 1,152 iku lelaki sereta 716 indu
diau dia. Penyampau orang tuai ke diau ba rumah nya dalam taun 2012 nya 1,695
iku (1,014 lelaki, 681 indu) lalu dalam taun 2014 nya bisi 1,500 iku (953
lelaki, 637 indu). Dalam taun 2015, bisi 1,585 iku orang tuai diau dia; iya nya
937 iku lelaki sereta 612 iku indu.
Penyampau
orang tuai ke dianjung ngagai palan penyaga orang tuai ke direjista ungkup kategori
pulai hari bisi 2,720 iku (2010). Penyampau tu betambah ngagai 4,644 iku orang
dalam taun 2012 lalu dalam taun 2015 penyampau nya majak niki ngagai 5,714 iku
orang.
Penyampau
tu ngayanka tanggung pengawa ke patut dilempaika ba bala anak tang diatu udah
dipindah ngagai institusyen formal enggau enda formal. Dalam konteks ngibun
orang tuai, pengawa bala anak ke nganjung apai indai sida ngagai palan penyaga
orang tuai maya sida nurun gawa agi ulih diterima. Kebuah pia, orang tuai tu
tetap dibai anak sida pulai sepengudah sida pulai gawa. Bah, baka ni kes orang
tuai ke dianjung bala anak sida diau ba rumah orang tuai (Rumah Seri Kenangan)?
Patut tauka enda raban orang tuai tu napi peneleba idup sida baka tu ba fasa
kepenudi pengidup sida? Agi mega lebuh umur tu mih sida balat ngarapka pengasih
ari anak sida.
Anak
nya mih orang ke dikarapka apai indai nyadi penjamin survival pengidup enggau
penyamin sosial lebuh sida udah tuai. Taja pia, ketegal segang pemansang moden
enggau ubah pengidup dia nembiak rebak diatu balat agi ngemeratka ulah
individualistik kelimpah ari ulah ke kelalu deka nyapai pengidup materialistik.
Tu meri empas ngagai pengawa nyaga apai indai lebuh sida tu udah tuai.
Patut
tauka enda raban orang tuai tu ditempaya ngapa sereta enda dikingatka kitai kelebih
agi baka semua pekara ke udah digaga sida baka pengawa ngibun ngerengkun, narak
sereta ngemesaika bala anak ngujungka sida bulih pemujur? Patut tauka enda?
Mayuh bendar bala anak kemaya hari tu udah enda ingatka tanggung pengawa sida
ke patut ngibun apai indai ke udah tuai. Dalam aspek tu, munyi ku rambai jaku enti
deka ngelenturka buluh manah agi ari tubu. Nya kebuah, sekula ke nyadi gedung
penemu lalu pengajar nya ke nyadi catalyst
transformation penemu patut ngemeran tanggung pengawa ti besai dalam
pengawa narak nembiak senentang pemesai reti adat bebasaka apai indai.
Nembiak
sekula patut nemu pengawa apai indai ke udah ngibun sereta narak sida kenyau
ari ada. Nembiak patut diberi penemu senentang pengidup ti ditapi apai indai
sida besehari-sehari sereta penyanggup apai indai sida berambunka nyawa dikena
nentuka pemujur bala anak dalam aspek pelajar ngambika pengidup sida mujur
jemah ila.
Kurang
penemu senentang pengawa apai indai tu ngujungka bala anak tu enda tentu
bebasaka apai indai sida lebuh sida udah besai. Berebak enggau nya, pengawa
nerenak penemu, ukur pemanah pendiau enggau motivasyen patut dipejalaika
sepemanjai maya ngambika raban anak nemu sereta sayauka apai indai sida.
Nambahka
nya mega, bala anak patut dikenyitka enggau penguji ti semampai ditapi apai
indai lebuh ngaturka ruang bilik sida sereta tanggung pengawa anak mantu apai
indai sida lebuh di rumah. Kelimpah ari nya, iya ti besai agi reti nya penemu
nembiak senentang tanggung pengawa sida meri pengelantang ngagai apai indai
sida lebuh apai indai sida udah tuai ila.
Inisiatif
pengajar patut ulih ngasil sereta negapka kaul ti rapit entara nembiak enggau
apai indai sida. Hal tu deka negapka sense of belonging dalam sebuah ruang
bilik asil ari pengerapit kaul entara apai indai enggau nembiak. Taja pia,
pengajar patut nemu sereta meretika pengawa nerenak ulah ti manah nengah proses
belajar enda ulih dijapai enti nembiak enda ulih nerima, mereti, ngaga
analisis, interpret sereta belematika ukur pendiau ti udah dibekalka ngagai
sida. Nambahka nya, enti nembiak enda ulih mindahka penemu nya ngagai iya ti
praktikal dalam pengidup sida tentu pengawa pengajar ke deka nerenak benih
penemu nya semina tebasau pia aja.
Ba
hal tu, nembiak mesti diajar enggau pengelandik bepikir chara kritis ti
engkeman enggau tikas umur sida. Fokus ngagai ukur empati ulih meransang
runding nembiak meda ukai semina ngena minda ti rasional aja tang mega ulih
meda enggau ati sida. Pekara tu beguna amat ngambika penemu ti diiri ngagai
nembiak ulih nukuh ukur humaniti ba nembiak nya empu. Tu ngujungka nilai
humaniti nya ulih diayanka nengah ulah sida.
Pengawa
ngangkatka pekara tu ukai pekara ti mudah dikereja ketegal mayuh pengawa bukai
ti endang udah bisi sigi mayuh. Taja pia, ukai utai ke enda alah dikereja
sereta dijapai juluk ati tu. Pengajar ti nyadi model sereta chuan nembiak tentu
ngembuan peninggi basa ti ulih diteladanka bala nembiak dikena sida ngayanka
basa sida ngagai pengajar.
Nya
alai, elemen tu ulih diguna nyadika senyata dikena ngelenturka nembiak dalam
hal ngangkatka konsep komuniti pengasih. Utai tu mesti bepun ari rumah iya nya
ari apai indai nya empu. Penyanggup pengajar ngamatka juluk ati tu diarapka
ulih ngurang penyampau nembiak ti enda bebasaka apai indai sida kelebih agi
sida ke nempayaka apai indai sida tauka nganjung apai indai sida ke rumah orang
tuai.
Pelajar
nya sebengkah alur ti efektif kena ngubah nasib siku-siku individu. Penemu nya
baka batu gemala ti tau ajih ke ulih mai individu nya nyadi orang ke manah
sereta likun dalam pengidup. Dalam aspek tu, nadai orang bukai ke ulih narak
mensia mayuh enggau tanggung pengawa ti berat ke dilempaika ba bau sida dikena
ngamatka sesebengkah juluk ati ti deka nukuh ruang bilik ti lantang enti ukai
pengajar. Enti kitai enggai agi ninga tauka macha berita senentang apai indai
ke suah ditempayaka bala anak sida, dia nembiak sekula serak kediatu enda ulih
enda dilentur baka ke ngelentur tubu sereta ditarak enggau ukur pemanah pendiau
ngambika sida bebasaka apai indai enggau sida sebilik.
Nya
alai, tanggung pengawa pengajar endang besai amat reti dikena ngubahka senario
tu. Tu mih pemeri pengajar ke ulih mekal nembiak enggau ukur tambah dikena
negapka instistusyen ruang bilik dalam konteks menua Malaysia.
Tiada ulasan:
Catat Ulasan