Bisi siti pansik udah digaga ngayanka pekereja pengawa
di Malaysia gaga agi maya ba tempat kereja enti dibanding enggau di rumah. Pansik
tu bisi ngalitka ati laban anggap pekereja mayuh ngelama tu madahka sida rindu
agi diau di rumah bebanding enggau ba tempat kereja.
JobStreet.com ngaga pansik sentang pekara tu ngagai pekereja
ba tujuh buah menua. Ari pansik nya madahka Malaysia ba penuduk keempat pekereja
pengabis gaga ngabiska awak sida ba tempat kereja. Pemina menua JobStreet.com
Chook Yuh Yng madahka separuh ari pekereja ti dipansik madahka sida gaga agi ba
tempat gawa.
“Ari 10,143 pekereja Malaysia ti dipansik penemu sida
madahka 58 persin ari sida diripotka gaga enggau pengawa sida.
“Kami udah ngemanahka agi pekara tu ari taun nyin
kemari, kami meda pemansang tu nyadi trend positif tang agi bisi ruang dikemanahka
agi,” ku iya.
Iya madahka bisi tiga faktor pekereja nya gaga ati ba tempat kereja bebanding
enggau di rumah. Kebuah pia, laban lokasyen tempat kereja nyamai agi, kaul
manah enggau pangan ke sama gawa sereta mega reputasyen kompeni. Chook madahka,
entara pugu pekara ti balat ngasuh pekereja nya gaga agi lebuh sida nerima gaji
sereta diterima manah kompeni.
Taja pia, tiga faktor pekereja ke ngasuh sida enda
lantang maya ba tempat kereja mega bisi dibantai responden. Tuju nyengkaum tuai
ke lemi ngatur anak nembiak iya, kurang pemansang karier enggau diberi latih.
“Dikena meri pengarap ke besai agi dalam hal ngaturka
kompeni dia raban pengaji pengawa enda tau enda ludas maya bekomunikasyen. Ba awak
ke sama, ngaga taga program ngemanahka pengelandik bekala dikena ngaulka diri
lalu ngetanka penau ti pengabis manah,” ku iya.
Kelimpah ari nya, pansik nya mega ngayanka pekereja ti
pengabis gaga nya sida ke gawa ba sektor perintah kelebih agi sida ke bisi kaul
enggau bisnes (Telepenyual/Telepemasar), injinir (Injinir Elektrik enggau Sivil)
enggau penyaga pengerai (misi, penolong enggau penyukung perubat).
Tiada ulasan:
Catat Ulasan