Panyun Kenang
Sepengudah genap kali peresa perintah
kitai ulih merati raban media begau baka
burung makai buah kara bekenangka sida ke bulih pemutus peresa ti tinggi.
Gambar bala nembiak sekula disempulang enggau pemutus peresa sida baka Ujian
Pencapaian Sekolah Rendah (UPSR), PT3 (Pentaksiran Tingkatan Tiga), Sijil
Pelajaran Malaysia (SPM) enggau Sijil Tinggi Persekolahan Malaysia (STPM)
ngemenuhka dada surat berita ninting hari.
Batang Kenang
SPM nya dikira peresa ke pemadu iya besai ba raban nembiak sekula sekondari
laban iya tau mega dikira penanggul ti besai sereta berat ti keterubah iya
ditapi sida. Raban nembiak sekula berasai sida iya kena pejal sereta diansak
ngayanka pemutus peresa ti manah. Asil peresa SPM muka jalai ngagai sida
nampung pelajar ngagai ke tinggi agi baka kolej, universiti enggau institut
pelajar ti bukai. Nembiak ti lati ba pemutus peresa deka diberi sekulasip
enggau duit geran dikena sida nampung
program degree ba institut ti tebilang ba menua tasik.
Ari pun kitai udah meratika bala nembiak balat bendar nerima ansak enggau
pejal ari raban apai indai enggau pengajar ke minta sida bulih A enggau naka
iya pemayuh ba SPM. Dalam taun 2017 bisi 443,883 calon bisi ngambi peresa
SPM. Tang penyelai gerah pemutus peresa sekali tu dia Tuai Pengarah Pelajar
Malaysia (KPPM) Datuk Dr. Amin Senin nadai madahka penyampau nembiak serata
Malaysia ke bulih A. Ku iya gerah nya dikenataika Pengarah Pelajar Nengeri diri
empu. Reti nya bisi tusah mimit deka mandingka pengulih genap buah nengeri
semadi mih kitai ngaga analisis pengulih nembiak genap nengeri. Tuju tu nyangka
deka ngurang stres bala nembiak sereta raban pengajar senentang pengulih
bala nembiak sida. Taja pia nembiak ke lati dalam akademik tu semina ngari
kurang ari 2 - 10% nembiak ke ngambi peresa ninting taun.
Ngeramika raban nembiak ke lati tu endang nadai salah sereta bisi rasional
laban sida tu mujur ngayanka pengelati diri ba semua keretas peresa ke diambi
sida. Tang taja pia, kitai patut mega ingat ukai semua nembiak sekula nya pandai
ba sukut akademik. Reti nya, ukai semua nembiak deka bulih A tauka semua A ba semua mata pelajar di
sekula tauka ba peresa ti besai baka SPM etb. Bisi sekeda nembiak sekula
ngembuan penanggul ari sukut fizikal, emosional tauka mental lalu belajar nya
ukai pengering sida. Nembiak ke enda mujur ba SPM semampai ngasaika diri baruh
amat sereta enda diterima komuniti.
Mayuh apai indai enggau bala nembiak mega ngumbai bulih A ba nama-nama
peresa ulih mai pemujur dalam pengidup. Baka ke udah disemat dalam budaya rayat
Malaysia, pengawa ke ngemeratka sistem peresa lalu bulih A nya ulih nyamin
siku-siku individu pengidup ti manah sereta mujur.
Kati amat kini penemu nya? Kati nembiak ke enda mujur dalam pelajar sida
deka enda mujur?
Pemujur tu pekara ti subjektif lalu iya bebida reti ari siku individu
ngagai iya ke bukai. Nya kebuah, bisi deka mar mimit nerangka reti pemujur. Ba
sekeda orang, pemujur nya reti iya ngembuan rumah besai, neriba kerita ti mar
sereta bisi mayuh duit. Tang ba orang bukai, pemujur nya reti iya bisi kereja
ti menyana ti mai pengelantang dalam pengidup – baka bisi pemakai ti chukup
sereta bisi rumah alai ngenduh. Bisi mega orang bukai ke ngasaika pemujur nya
diperatika ari pengerai enggau pengelantang. Enti sida gerai tentu pengidup
sida lantang. Nya kebuah, pemujur nya tau disemaka baka ke meda pemajik indu
laban iya bepanggai ba mata orang ke meda.
Ba sekeda orang, SPM nya jalai nuju pemujur. Ngagai sida ke bulih mayuh A
ba SPM semina mimit aja iya nya kira-kira 2-10% ari penyampau semua nembiak ke
ngambi peresa nya. Mayuh agi nembiak bukai nya bulih pemutus peresa ti jelan ba
SPM. Bisi nembiak nampung pelajar sida ngagai kolej engggau institut teknikal
ke alai sida belajarka pengelandik teknikal enggau vokasional. Iya ke bukai nya
lalu gawa tauka ngemasukka diri ba pengawa dagang lalu bisi nya mujur ketegal
pengarap diri ti tinggi.
Ukai semua nembiak ke bulih A ba SPM nya mujur. Naka kediatu nadai udah
bisi pansik ke madah nembiak ke lati dalam akdemik nya mega mujur dalam
pengidup. Kitai enda patut nyemakaka pemujur enggau bulih mayuh duit sereta
reta nya laban orang ke kaya di dunya pan bedau tentu mujur tauka lantang. Enti
diperatika ari sukut fakta, mayuh ari sida ti mujur nya datai ari nembiak ti
jelan pemandai.
Nya kebuah, nembiak nya empu mih mesti matau sereta ngiga pintu pemujur.
Pengidup dudi hari bepanggai bendar ba sida empu. Nama-nama utai ke ulih
dikerunding sereta diarapka kitai tentu ulih kitai bulih. Anang enda ingat
pemutus peresa SPM ukai pugu penentu pejalai pengidup kitai lalu iya mega ukai
pengujung dunya. Iya mega ukai pelasar penyukat ti amat ngagai pemintar kitai.
Udah bisi chunto nya sekeda enda tembu pelajar tang nyadi orang ti mujur dalam
pengidup.
Pemintar akademik aja enda nyamin pemujur laban iya enda ngira pemintar
mayuh chabang (multiple intelligences) ti dikembuanka nembiak. Uji peratika
orang ke mujur ba menua serata dunya tu. Mayuh ari sida tu enda tentu mujur
maya di sekula tang sida bisi pengelandik bukai ke mantu sida mujur sereta
tebilang ba pekara ti dipasukka sida. Kreativiti, pengelandik bekomunikasyen,
talent, pengeliat ati, pemagas, kur, pengarap ke diri empu enggau ulah ti
positif nya kriteria nuju pemujur dalam pengidup.
Penutup Kenang
Mayuh orang bepikir madahka pemutus peresa ti manah ngujungka bulih pengawa
ti manah lalu tu ulih dikena meli pengelantang enggau pemujur. Pelaba aku semua
kitai setuju, duit aja enda ulih dikena kitai meli pemujur tauka pengelantang.
Pengelantang nya ukai utai ti dituju tang sebengkah ari pejalai pengidup.
Faktor luar baka pemujur enggau reta tengkira meri pengelantang ti enda lama
tang kaul entara pangan diri meri pengerindu, pengaga ati, pemaik enggau
pengelantang sepemanjai maya. Ngagai sida ke enda lati ba SPM sereta enda ulih
masuk universiti anang beguai putus pengarap. Agi bisi pengadang ke patut
disimpan dalam ati. Arap ke diri empu, pengelantang enggau pemujur deka nitih
entudi kita jemah ila.
Tiada ulasan:
Catat Ulasan