Sekeda orang ba genturung pendiau kelebih agi baka ba Projek Rumah Rayat
(PPR) baka di indu nenggeri rindu amat bebuaika mayuh macham objek ari ringkat
atas rumah tinggi. Tu siti ari ulah ti enda ulih diterima akal.
Uka semina uras aja, tang mayuh macham objek kering sereta ke tau nganu
baka televisyen, kacha, botol, kerusi enggau
mija ditempalung ke baruh enggau nadai asai salah tauka nangika tekena orang bukai.
Ulah ke enda betamadun nya ngujungka tau ngenataika penusah ti besai agi
lebuh. Ambika banding baka maya siku nembiak lelaki ke berumur 15 taun parai
udah ti ditinggang siti kerusi ti disuspek dibuai ari ringkat atas rumah Blok 102, PPR Seri Pantai di Pantai
Dalam, Kuala Lumpur apin lama ti udah.
Nitihka orang ke tebangka ba Psikologi ari Universiti Malaya, Prof. Madya. Dr. Mariani
Md. Nor madahka, penanggul ti agi majak nyadi ketegal orang ke diau ba
genturung rumah PPR ngembuan mentaliti ti baruh sereta enda nemu pemesai reti
runding ti sivik. Nitihka pansik, mayuh leman program ke ngajar orang ngembuan
ulah ti manah enda bebuaika uras ari ringkat atas rumah udah diatur tang perangai
sida agi ba taka ke lama. Semua agensi nyengkaum Local Council baka Dewan
Bandaraya Kuala Lumpur (DBKL) enggau peranak genturung pendiau nya ngembuan
tanggung pengawa ukai semina nyalahka sepiak raban aja.
Ba menua kitai, kitai betapi enggau raban sida ke ngembuan mentaliti kelas
ketiga lalu mayuh ari sida tu enda ngembuan pelajar tinggi. Taja pia, tikas
pelajar ukai penyuran ti nemban dikena ngayanka ulah siku-siku individu. Ajar
ti manah bendar selalu bepun ari rumah iya nya ari apai indai kitai empu.
Apai indai ngembuan tanggung pengawa ti besai narak sida sebilik awakka
sida bisi ulah ti manah sereta enda tentu ngerundingka diri empu aja.
Enti kitai ke tuai dalam bilik nya ngayanka ulah ti enda manah baka
bebuaika uras sebarang endur, tentu iya
mega deka ditunda bala anak ketegal sida belajar lalu nitih perangai orang ari
chara meratika ulah orang.
Insiden ti udah nyadi baka bebuaika kerusi nya ukai pekara baru. Kitai ke
macha berita tu mega berasai sinu ngenang penusah ti udah ninggang sida nya
sebilik. Pengawa bebuai sereta nempalung
uras tauka objek ari ringkat atas endang suah nyadi ba indu nenggeri kitai tu
nitihka berita ke seruran dibacha.
Nitihka undang-undang mit bekaul enggau hal rumah, sida enda ulih ngereja pekara
nya lalu notis jaku tagang tentu udah diberi sida kunsil.
Nya alai, kimpin ngerakka runding peranak PPR endang patut bendar
dipejalaika. Kelimpah ari nya, sida ke agi enda betanggung jawab nya endang
patut bendar diberi jaku tangkan tauka diukum. Taja pia, semua chara tu ukai
chara mutarka penanggul ti besai. Sida kunsil enggau penerit adat endang ngarap
bendar ulah ti baka tu ulih dibuai laban iya ukai semina ngasuh orang bukai
bebadi tang mega tau munuh nyawa orang bukai.
Nitihka berita, sida DBKL benung masang jarin ba kandang PPR di Kuala
Lumpur dikena ngangkatka tikas pengelikun peranak genturung sesebengkah endur.
Nya kebuah, Menteri Wilayah Persekutuan, Datuk Seri Tengku Adnan Tengku Mansor madahka
atur nya dikena nentuka hal nya enda agi nyadi baru jemah ila. Jarin ti
dipasang nya mungkur 494 buah blok PPR di serata Kuala Lumpur ke nyengkaum kira-kira
80,000 unit rumah.
Insiden ti udah nyadi apin lama ti udah nya kes pemati ti keterubah kala
nyadi tang pengawa bebuaika barang ari ringkat atas rumah endang suah udah
nyadi. Nya kebuah, jaring enda ulih enda dipasang lalu kos dibayar DBKL.
Tiada ulasan:
Catat Ulasan