KALA tauka enda lebuh nuan ngagai palan rama ti udah bisi papan tanda
nagang orang nginsap tang bisi tepedaka orang ke enda malu-malu nginsap dia? Kala
tauka enda nuan tepedaka deriba neriba kerita lalu ngelanggar lampu trafik tauka
neriba kerita ba alur emergensi? Suah tauka enda kitai meda orang muai uras
sebarang endur nyengkaum muai uras keluar
ari kerita sida?
Semua tu, iya nya chunto ulah ngelanggar atur ke seruran amat nyadi. Pekara
tu ulih dipeda ba dini-dini endur di Malaysia. Sida ke ngereja pekara tu ukai
semina nadai ngasai diri salah, tang mega nadai berasai malu ke ulah ti enda
manah nya. Tu mih ke ngasuh kitai betanya dalam ati diri katika hal ngelanggar
atur nya sebengkah pekara muntang tauka pengawa ke tauka ngasuh diri gaga ati?
Realiti iya, pengidup kitai mensia endang penuh enggau aturan. Tu mih ke
ngasuh ulah mensia bebida-bida lebuh betapi enggau aturan. Bisi orang bagas
nitihka atur genap maya. Orang ke baka tu suah dipeda orang bukai enggau
runding ti sinikal lalu dikumbai sida orang ke ‘rurus bendul’. Anggap ti baka
tu ke bendar ukai anggap positif tang balat agi anggap ke ngemaleka orang.
Bisi mega sida ke enda tentu ibuhka atur. Sida ke baka tu nitihka atur
"maya sida bisi mood" tauka ngena jaku bukai, nitihka atur maya ke
patut ba runding sida aja. Ambika banding, enti bisi polis, baru sida nitihka atur.
Enti enda, semua aturan deka dilanggarka sida.
Baka nya mega sida ke ‘udu ngelanggar’ tauka hardcore ngagai semua leman atur.
Ba orang baka tu, aturan enda relevan tauka enda engkeman nitihka prinsip idup
iya. Nya kebuah, nama bisi atur, sigi lalu dilanggar iya. Ba individu ke baka
tu, ngelanggar atur nya ngasuh iya temegah ati, lantang sereta berasai besai
ari orang bukai.
Enti diperatika ari sukut rama, bisi atur ti betulis lalu bisi mega iya ti
enda betulis. Aturan betulis nya atur ti udah dipesetujuka raban mensia mayuh lalu
enti enda dititih deka ditinggang ukum. Ambika banding, atur betulis ti bisi
kaul enggau jalai raya, atur kereja di opis, undang-undang menua, ukum-ukum
pengarap enggau ti bukai.
Tukuh aturan ti enda betulis nya dipeda rama agi ari ke betulis. Aturan
bansa tu bisi kaul ti rapit enggau adat
lama tauka budaya sesebengkah komuniti lokal. Ba aturan bansa tu, enti enda
dititih, ukum iya lebih ngagai ukum sosial. Aturan enda betulis tu balat agi
bekaul enggau hal-hal adat basa baka basa maya begulai enggau pangan diri, laki-bini,
nembiak-pengajar tauka basa ulah baka basa maya makai, basa lebuh nerima penemu
tauka pelajar enggau ti bukai. Nya alai kadang-kadang kitai bisi ninga orang
besebutka jaku ‘biar mati anak, anang mati adat’. Aba hal tu, adat bansa diri
mesti ditan lebih agi ari nanka anak diri.
Bah nama dih tuju aturan ditempa? Tuju aturan bisi kaul enggau konsep pemanah.
Ari sukut rama, konsep tu mai reti ‘ngiga pemanah lalu muai penyai tauka
pengerusak’. Dalam sekeda pengarap baka pengarap Islam konsep tu dikumbai sida
‘maslahah’. Dalam penemu Islam, maslahah mai reti ti besai agi iya nya "ngiga
pemanah lalu nulak penyai’ baka ti udah ditentuka Tuhan sida.
Reti nya pemanah ti digiga sereta penyai ti uji diseliahka mesti beriran
enggau pekara ke ditentuka Petara. Konsep maslahah ngemeratka komuniti tauka
mensia mayuh lalu ukai ngemeratka individu siku-siku.
Nya alai, ulah ke nitihka atur endang ngembuan tuju ti deka mai pemanah
sereta nyeliahka pengerusak. Ambika banding, orang ti enda nginsap deka meri
pemanah ngagai pengerai diri lalu ulih mega nyeliahka diri ari penyai iya nya
penyakit. Ukai semina ngagai diri empu aja tang mega ngagai pengerai orang bukai
(raban dalam komuniti) mega ulih dijaga. Nambahka nya angin mega dijamin beresi.
Tu madahka reti aturan ngembuan tuju ti chukup badas. Mensia endang beguna amat
ke atur. Nyau deka semua pengarap ngayanka mayuh leman atur (ukum) ti patut dititih
mensia baka ba sekeda pengarap ti nagang orang ngirup arak, butang, berutang, atur
sembiang enggau ti bukai. Aturan tauka ukum tu digaga Petara ukai tuju iya tak
pia ngapa. Pugu tuju nya endang dikena ngara sereta nusun komuniti nyadi
komuniti ti betamadun lalu idup dalam harmoni.
Rambai jaku tauka sulu jaku ti nyebut "aturan ditempa awakka dilanggar"
endang enda nemban amat. Rambai jaku baka tu suah amat disebut lalu kadang-kadang
iya ditiu enggau ati ti temegah. Enti kitai betatika semua aturan ti digaga
Petara nya, dia kitai berunding enda patut Petara ngaga semua aturan nya semina
dikena mensia ngelanggarka iya. Semua aturan nya digaga Petara laban Iya ke
nemu agi ari kitai lalu nemu kitai mensia endang beguna amat ke aturan nya. Enti
nadai atur, pengidup mensia sebaka enggau pengidup jelu. Enda patut kitai deka
ngemaruhka diri datai ngagai tikas nya.
Nya kebuah, atur mesti dipebasaka sereta dititih. Tiap-tiap kali kitai deka
ngereja sesebengkah pengawa enda ulih enda betungkatka adat. Genap iku ari
kitai ngembuan tanggung pengawa ngagai aturan nya. Nitihka atur mega beguna
kitai nyadika enselan. Dalam hal tu, kitai enda ulih enda meri penuh perati ngagai
diri empu ngambika enda ngaga utai sepeneka ati laban kitai mega patut
berundingka orang bukai.
Sesebengkah atur ti udah ditempa nya enda tau enda dikemata sereta diteritka
enggau adat. Nya kebuah ba hal tu, penerit adat endang diguna amat dikena nentuka
atur nya dititih. Taja pia, pengawa penerit adat ulih dikurangka enti raban
komuniti nya empu bisi ngembuan pengering diri nitihka semua atur.
Pengering ba diri empu nya ke agi kurang ngujung mensia mayuh udu amat deka
ngelanggarka atur enggau ati ti enda rawan sereta nesal. Dalam hal tu, pelajar,
latih diri empu, chunto teladan enggau jaku lalau endang diguna amat kena nempa
pengering diri ngambika kitai nyadi mensia ti bebasa ke atur. Nya alai anang
enda ingatka sempama jaku tuai; agi idup diserayung adat, udah parai dikandung
tanah.
Tiada ulasan:
Catat Ulasan