Anak kemaya hari tu sanggup ngaga apai indai sida baka bank

Endang enda ulih disakalka agi bisi jaku ke madah apai indai sigi enda sanggup meda bala anak sida idup tusah. Nya kebuah mega apai indai sanggup meri nama-nama utai ke dipinta anak sida.

Enti apai indai udah neleba anak enggau penyamai sereta enda kala ngasaika pemedis dia anak tu deka nyadi serak dudi ke enda tuai runding sereta enda ulih bediri kediri. Dipelabaka mega kitai kala ninga orang ke udai besai tuai madahka sida ngaga apai indai sida baka  ‘bank’ tauka atm.

Ukai semina ari sukut melanja sida sekula, tang mega nyengkaum meli kerita, rumah baru sereta duit kena melah pinang. Utai ke ngenyinuka ati iya nya lebuh bala anak tu diperatika nadai ngasai diri salah tauka malu minta apai indai nanggung pengidup sida sepemanjai maya.

Kelimpah ari nya, bala anak tu baka ke nadai empedu malu ngaga apai indai sida baka ‘bank’ laban ditemu sida apai indai endang bisi duit pinchin tauka KWSP. Bala anak deka nginjau duit nya lalu apai indai ke irauka bala anak idup tusah sanggup meri duit pinchin enggau KWSP ngagai bala anak.

Nitihka pansik orang ke tebangkar dalam bidang sosial madahka, udah nyadi pekara selama apai indai di Malaysia ke udah tuai nanggung penanggul duit bala anak dataika sida mati. Ba setengah hal baka pekara melah pinang enggau meli rumah, bisi sekeda  anak minta semua belanja nya ditanggung apai indai laban kedalih ti nadai chukup duit ketegal ke bedau bekereja tauka nadai duit simpan.

Nambahka nya nitihka, Tuai Menua, Perbankan Runcit dan Pengurusan Kekayaan HSBC Bank Malaysia, Lim Eng Seong madahka belalauka pansik ke beramuka jaku ‘Napi Pengidup Jemah Ila’ tauka ‘Mendepani Masa Depan’ apai indai di Malaysia diadarka ba penuduk keempat peringkat global dalam pengawa nulung anak sida ke udah besai iya nya dalam hal beberika duit lalu menua  Emiriah Arab Bersatu ba di penuduk ti pengabis atas. Nitihka pansik nya, bidang pelajar nya pekara ti pengabis mayuh dibantu apai indai (69 persin), lalu ditangkan enggau 41 persin nyaup ari sukut kos pengidup besehari-sehari nyengkaum bil utiliti, barang dapur lalu ungkus kena nyeruri utai ti jai ba endur diau. Kelimpah ari nya, sida mega mantu ari sukut perubat enggau kos nyaga pengerai ngeli (38 persin) lalu 27 persin ba kos alai diau tauka rumah siwa.

Taja pia, trend baka tu enti nunda enda patut dikereja bala anak. Kebuah pia, laban apai indai udah ngibun ngerengkun, ngintu bala anak kenyau sida agi mit. Enti nitihka lebuh udah kitai ke anak tu udah besai kitai patut malas pementas enggau pemanah apai indai nengah chara beberika duit ngagai apai indai lalu  ukai mejal sida nanggung pengidup bala anak sampai ke sida danjan dibai bulan.

Apai indai mega patut narak bala anak idup ngati kediri lalu ukai kelalu besempikut ba orang bukai. Apai indai mesti meri peluang bala anak sida ngasaika peneleba idup tusah maya begigaka duit ngambika sida belajar reti tanggung pengawa lalu awakka sida tuai agi runding.