Chara narak orang Jipun ulih nempa disiplin rakyat

Pengajar, apai indai enggau mensia mayuh meda asil pelajar iya nya nembiak sekula  ke ulih nyadi pekereja tauka komuniti ti kreatif enggau inovatif kelimpah ari nyadi orang ke ngembuan ulah enggau adat basa ti tinggi.

Ulih tauka enda sistem pelajar, pengajar, apai indai enggau komuniti mayuh narak nembiak ngulihka juluk ati baka ke udah disebut di atas? Kebuah pia, laban proses narak nembiak nya panjai sereta begunaka komitmen semua raban orang.

Di Malaysia, nembiak agi dikungkung enggau tisih bepelasarka sekula (PBS) sereta peresa rama tauka peresa perintah. Hal tu mega nyengkaum kurikulum standard iya nya Kurikulum Standard Sekula Primari (KSSR) enggau Kurikulum Standard Sekula Sekondari (KSSM).

Semua nya sama magang ungkup semua nembiak. Pengajar semina bejalaika akitiviti nitihka utai ti udah diperambu. Aktiviti mega sama ngujungka langkah rapat ngajar enggau belajar ke dikena bala pengajar enggau nembiak mega sama.

Ukur pemanah pendiau ke deka diterenak ngagai nembiak mega disebut enggau terang ngujungka kurikulum ke deka diberika ngagai raban pengajar nya dianggap baka bup kudus ti patut dititih sereta ditunda sida.

Tuju pelajar diperatika baka sebengkah proses disiplinka akal. Pemujur dalam akademik nentuka pemujur dalam pengidup. Situasyen ti sama mega nyadi ba nembiak enggau pengelicha universiti. Chara ngelicha enggau ngambi not tetap sama. Nembiak universiti mega enda tau enda ngambi peresa. Katika chara baka tu mantu ngasilka individu ke kreatif enggau inovatif lebuh sida pansut ari rampa dunya sekula ila?

Kelimpah ari ke dekaka asil pelajar, iya nya individu ke kreatif enggau inovatif mayuh mega raban orang  besebutka juluk ati ke deka ngasilka individu ti ngembuan pengelandik bepikir tikas tinggi tauka higher thinking skill. Katika raban pengajar udah besedia enggau semua pekara tu? Nemu tauka enda sida chara bejalaika pekara tu ke tau ngujungka individu ke diasilka sida nya ila kreatif, inovatif lalu ngembuan pikir tikas tinggi?

Bisi mega sekeda ari raban orang ke irau ati enti sida enda mujur ngasilka serak dudi ke ulih bepikir ba tikas tinggi, kreatif enggau inovatif dia menua deka mega puntan baka menasan jalai jelu, labah baka buah merunjau ulu.

Kitai tentu dekaka rayat kitai baka rayat Jipun. Sida udah terang amat ngayanka sida udah mujur nyadika menua sida mansang. Katika pemujur tu bisi kaul enggau pelajar sida? Nama dih bida sistem pelajar di Jipun enggau di Malaysia? Katika tuju pelajar di menua Jipun dikena ngasilka rayat ke disebut nya tauka rayat ke ngembuan adat basa sereta bagas gawa?

Pelajar di menua Jipun enda jauh bida enggau pelajar di menua kitai. Nembiak sekula iya mega dipinta ngambi beberapa bengkah peresa rama dikena sida masuk ke sekula tinggi enggau universiti ti tebilang sereta iya ke bisi prestij. Nembiak mega sama duduk dalam kelas sepemanjai taun lalu pengajar ke mindah kin kitu. Hal nya sigi dipeda sama enggau utai ke nyadi di Malaysia.

Apai indai enggau komuniti Jipun nganggap pelajar nya pekara ti beguna amat. Dikena nentuka pengadang apai indai ulih dijapai dia anak sida belajar enggau bebendar ngambika teulihka pemujur.

Bida enggau di Malaysia, nembiak di Jipun belajar ari pagi nyentuk ke lemai, berengkah ari jam 8.30 pagi datai ke jam 4 lemai. Udah nya sida lalu ke kelas tambah tauka masuk aktiviti kokurikulum sampai ngagai jam 6 lemai tauka lebih. Indah hari Enam mega sida nurun ke sekula laban bisi aktiviti sekula.

Hal tu mih ke ngasuh nembiak di Jipun nya bagas. Proses narak nembiak bepun ari tadika lalu ditampung ngagai sekula primari, sekondari enggau pelajar tinggi. Genap iti institusyen tu endang bisi tuju enggau kebuah sida narak sereta ngajar nembiak.

Ba tikas keterubah sekula primari iya nya ari Taun 1 ngagai Taun 3 endang nadai peresa. Sida semina fokus ngagai narak nembiak ngembuan adat basa, beulah manah, bepengelandik lalu ulih mantu dalam pemansang ekonomi menua enggau pengelantang rayat. Pekara tu ukai semina baka kepayang ngadaka dilah aja tang mega dikerejaka sida. Nembiak diajar chara ngemasaka orang bukai sereta ngemeratka pemeresi. Ambika banding sida empu ke meresi bilik kelas, agu enggau kandang sekula. Sida nadai ngaji tukang tuchi enggau tukang kebun. Sida mega ngena kasut ke diungkup ba dalam bilik kelas, makai beserumpu enggau pangan diri sereta pengajar. Menu pemakai sida disediaka tukang sumai sekula ke profesional.

Asil ari nya tadi ngasilka rayat Jipun  ti bebasaka orang bukai, ulih gawa beraban, bagas, nemu nyaga pemeresi, ngembuan ulah ti manah sereta ulih bekereja dalam mayuh bengkah situasyen ke tau ngasuh stres. Semua pekara tu dipelajarka sida lebuh sida agi di sekula.

Dalam proses belajar baka tu, ulih tauka enda individu ti diasilka nya nyadi kreatif enggau inovatif? Kebuah pia, laban bisi sekeda orang mejah sistem pelajar Jipun. Sida madahka sistem pelajar Jipun enda ulih ngasilka individu kreatif enggau inovatif. Dalih ke diberi sida nya nembiak Jipun nadai ruang enggau awak kena sida ngaga utai ti dikira kreatif tauka inovatif. Nyangka sistem pelajar Jipun ulih ngasilka nembiak ti bepikir tikas tinggi laban fokus sida balat agi ngagai hal akademik.

Kelimpah ari nya tadi, menua Jipun mega mujur dalam Program Nisih Nembiak Antarabansa (PISA). Sida diatu ba penuduk ke pengabis atas ba hieraki menua Gerempung Kerejasama Ekonomi enggau Pemansang (OECD) lalu dikira lati ari sida bukai. Baka nya mega, fokus diberi ngagai Matematik enggau Sains kenyau ari nembiak nya agi di sekula. Ketegal Jipun menua ke mansang amat dalam teknologi enda ngalitka ati meratika bala nembiak sida ulih meda peluang kereja enti sida mujur dalam bidang Matematik enggau Sains. Ngembuan penemu ba bidang Matematik enggau Sains ulih ngasuh sida nampung pelajar ba tikas ke tinggi agi baka ba bidang injinir enggau perubat.

Kreativiti enggau inovatif deka nyadi kediri empu lebuh sida berengkah bekereja. Kebuah pia, laban iya beguna dikena sida nentuka produk ti diasilka sida nya tau mai penguntung ngagai kompeni enggau menua sida.

Chara Jipun narak nembiak nyadi rayat enggau pekereja ti manah patut bendar diteladanka kitai. Tang taja pia, iya begunaka komitmen semua orang baka bala apai indai, pengaji pengawa enggau komuniti. Sebedau Perang Dunya Kedua, rayat Jipun seruran beperang enggau pangan diri tang sida mujur ngubah budaya enggau chara idup nengah ubah pelajar ti dipejalaika sida enggau bebendar.