Alexander Graham Bell nya orang ke nengkebang kereban telekomunikasyen
ti dikumbai telefon. Kereban ti ditengkebangka iya udah dikemansangka agi lalu
dimoden nengah pengawa ti nengkebang telefon binching ke tau mega dikumbai telefon
selular. Dalam era ti sofistikated baka pemansang sains enggau teknologi kemaya
hari tu, telefon binching nya udah dikira kereban ti enda tau enda dikembuan semua
orang kelebih agi nembiak sekula tauka universiti kemaya hari tu. Telefon binching
nya sebengkah kereban komunikasyen ti tebilang sereta nyau majak mansang enda ngira
rega iya. Kebuah pia, laban nembiak kemaya hari tu ulih ngembuan telefon binching
ti sofistikated nitihka teknologi kemaya hari. Mayuh amat bansa telefon binching
ti bisi dijual ba pasar di menua kitai baka telefon binching benama nokia,
samsung, iphone, blackberry enggau ti bukai. Enti diperatika enggau silik, pengawa
ti bekenaka telefon binching ba nembiak sekula tu udah mai mayuh leman empas
ngagai nembiak sekula nya empu. Nama empas
ti diterima bala nembiak sekula enti sida nemu ngena telefon binching
nya enggau menyana tauka enda?
Endang enda ulih disakalka agi pengawa ti bekenaka telefon
binching mayuh ngenataika pemanah ngagai raban nembiak sekula. Siti ari pemanah
iya nya telefon binching ulih dikena berandau enggau orang ke dikesayau ke jauh
ari mata tang semak ba ati. Kemaya hari tu, bisi raban nembiak sekula ke
nampung pelajar ba sekula ti jauh ari tempat alai sida diau lalu sida tu diau
ba buding baka ba Sekula Beasrama Penuh enggau MRSM. Sida enda ulih enda
beserara sementara ari bala sida sebilik laban ke deka bejalaika tanggung
pengawa sida nyadi nembiak sekula sereta ngamatka juluk ati sida sebilik ke
deka bulih pemujur dalam pengawa besekula. Nya kebuah, sebuah telefon binching nya
ulih nyadika medium dikena mantaika pengelenggau sida. Ninga nyawa apai enggau
indai udah tentu ngasuh ati sida berasai lantang kelebih agi sida mih ke
pengabis dikelala anak sida nya. Lebuh raban nembiak sekula deka ngambi peresa,
sida deka nelefon apai indai sida ngena telefon binching kena sida ngulih jaku
peransang. Nya alai, pengawa ti bekenaka telefon binching ba raban nembiak
sekula tentu ulih ngerapitka kaul entara diri sebilik indah enda baka sempama isi
enggau kukut taja pan sida diau jauh
ari apai indai. Ari nya, nyata bendar telefon binching nya medium ti semitan
nyadika kereban kaul entara nembiak sekula enggau diri sebilik.
Kelimpah ari nya, pengawa ti bekenaka telefon binching
ulih mantu raban nembiak sekula betanyaka hal-hal ti bisi kaul enggau sekula. Udah
nyadi tanggung pengawa ti berat ba nembiak sekula nembuka pengawa ti diberi
pengajar ngagai sida enti sida deka mujur. Besenutuk enggau nya mega, bisi
nembiak sekula ke enda ulih enda pansut ari luar kandang sekula laban ke deka
ngemanahka nama sekula. Sida tu enggau masuk mayuh bengkah pekit ti diatur Opis
Pelajar Nengeri tauka Opis Menteri Pelajar. Pekara tu mih ti ngasuh sida
nembiak sekula tu enda ulih enggau orang ba aktiviti ngajar enggau belajar di
sekula. Nya kebuah, sida deka nguntik bala tawing sida nengah telefon binching
lalu betanyaka pengawa ti patut digaga taja pan sida nadai di sekula. Reti nya,
semua pekara berat ti dikenataika pengajar lebuh sida nadai datai ke sekula
ulih ditemu sida enggau lengkas nengah telefon
binching. Budaya nyaup pangan diri sempama berat sama ngangkat, lempung sama
nanggung entara nembiak sekula mega ulih diterenak ba raban nembiak sekula. Enti
disimpul enggau jaku pandak, reti nya pengawa ti bekenaka telefon binching ba
raban nembiak sekula ulih ngemudahka pengawa belajar sida.
Tang taja pia, ari pemanah telefon binching tu bisi
mega pengurang. Kebuah pia, laban telefon binching ulih mega mai impak negatif ngagai
chara kitai nguna iya kelebih agi ngagai nembiak sekula.
Siti ari empas negatif iya pengawa ti salah chara nguna
telefon binching iya nya ulih ngasuh prestasi akademik raban nembiak sekula
nyau majak kusut. Pekara tu endang dikira serius laban pelajar nya teras
pengering mensia mayuh ngambika sida ulih besemekih enggau orang bukai ba makit
global kelebih agi ba era globalisasyen ti jampat amat berubah tu. Ambika
banding, nembiak enda ngemeranka pelajar sida laban fokus sida maya ngajar
enggau belajar nyau majak kurang. Nitihka pansik, nyau deka semua nembiak rebak
baru ngena aplikasyen dalam telefon pintar kena ngelawa laman randau enggau aplikasyen
bemain ba Internet ngujungka sekeda ari sida nya gian. Ari sukut implisit,
prestasi akademik nembiak sekula deka kusut ketegal kurang inisiatif lalu semengat
ransing udah baka pengelenyau kapak ti diganti enggau beliung sepengudah ke
gian ke aplikasyen telefon binching ti majak mansang-semansang. Reti nya, gian
ngena telefon binching ba raban nembiak sekula ulih mai empas negatif ngagai prestasi
akademik sida.
Enti ditimpai ari sukut perambu maya,
nembiak sekula ti ngena telefon binching nadai besekat udah tentu muai jam sida.
Pengawa mina maya tauka ngatur jam sigi beguna amat dikena nempa seregah diri
awakka bisi disiplin lalu ngembuan ulah ti bebasaka genap awak ke udah diberi
Petara. Maya baka mata nyabur ke ulih dikena mumpung pala kitai enti iya enda
enda diguna enggau menyana. Nya kebuah, maya ke agi biak bala nembiak redak
patut ngisi awak sida enggau pekara ti menyana kelebih agi ba aktiviti ti bisi
mai penguntung lalu ukai ngabiska jam bekualiti sida bepedaka skrin telefon binching.
Nitihka pansik ti baru diatu, nembiak rebak baru muai jam sida sekurang-kurang
iya 19 jam seminggu bekenaka peranti ti mar baka telefon pintar, tablet enggau
ti bukai. Ironi iya, nembiak sekula kemaya hari tu balat agi muai awak sida
beranjungka pesan nengah whatsap tauka wechat, berandau nengah online lalu bemain
main ba Internet ti nadai mai sebarang penguntung ari sukut pemansang roh
enggau minda. Nya kebuah, pengawa mina maya nya beguna amat laban makin lama
kitai ngelawa pekara ti enda menuku, makin jauh mih kitai dianyutka ilusyen ke
nadai realiti. Reti nya, pengawa salah guna telefon binching deka muai jam
enggau umur kitai, indah enda baka sempama seratus taun bah datai kapal tetap enda mansa.
Kepenudi sekali, pengawa bekenaka telefon
binching ulih ngasuh nembiak sekula kurang bepengerai. Ketegal pemansang arus premier
ti nadai besekat, nembiak sekula kemaya hari tu nyau majak pasif dalam pemansang
fizikal enggau mental. Mayuh amat jam tebuai laban dikena sida nunga telefon binching
tauka tablet ketegal ke enggai dipeda tinggal dalam arus globalisasyen ti
jampat amat beputar nya. Ketegal nya, penyampau metabolisme ti baruh deka
ngeruga sistem pengelanchar darah enggau proses bebuaika utai ti kamah ari
tubuh. Ba era atom kemaya hari tu, penyampau radioaktif tauka ultraungu udah ngerusak mata nembiak
sekula. Bepelasarka pansik, penanggul penyakit ba raban nembiak sekula baka penyakit
lelak, asma, penyakit mata enggau pending udah majak kronik lalu dipeda baka ke
nadai pengujung. Nitihka pansik ti baru ari 31 iku saintis ke datai ari 14 buah
negara maju nyengkaum Amerika, madahka pengawa ti balat bekenaka telefon binching
deka ngasuh penyakit riman untak. Kebuah pia, laban gelumbang elektromagnet ti
nyadi asil ari telefon binching lebuh tekena ba sel untak ba timpuh maya ti
lama tau ngasuh mutasyen genetik ngagai sel untak. Tu tau ngujungka penyakit riman
untak. Enti utai tu nyadi, tentu pelajar enggau daya idup nembiak sekula jemah
ila deka puntan baka menasan jalai jelu laban sida enda ulih datai ke sekula laban
sida nembiak bisi penanggul ba pengerai. Disimpul enggau jaku pandak, pengawa
nembiak sekula ti udu bekenaka telefon binching deka ngeruga tikas pengerai
sida.
Dikena nutup randau, taja pan mayuh pemanah ti ulih diterima raban
nembiak sekula ari ke bekenaka telefon binching, raban nembiak mega deka nerima
empas negatif ari pengawa bekenaka telefon binching enti enda dikena enggau betul. Enti enda diguna
ketegal pemanah, pekara tu ulih ngerusakka budaya enggau runding nembiak nya
empu jemah ila. Aruh iya nembiak sekula
nya tiang menua jemah ila laban sida deka pandai agi berundingka pro enggau
kontra sesebengkah pekara sebedau iya dipejalaika. Nya kebuah, raban nembiak
sekula mesti pandai bekenaka sebarang gajet tauka kereban ti ditengkebang dalam
dunya sofistikated tu nengah chara ti betul. Apai indai mega patut ngapuh raban
nembiak ti udah gian bekenaka telefon binching ari terus tekelambang singkang. Kebuah pia, laban bala
nembiak balat agi bekenaka telefon binching
ketegal status lalu ukai ketegal ke guna pekara ti berat. Nya kebuah,
apai indai bisi gasa nyaga anak sida ari nguna telefon binching enggau betul.
Enti enda, mayuh bendar pekara ti enda manah deka nyadi ba sida. Kitai ke mensia
patut nyadi tuan ngagai kereban teknologi lalu ukai nyadi ulun teknologi. Nya
alai, kitai semua tentu ngarapka sida nembiak rebak ti mujur lati, tebilang ba
menua kitai dalam mayuh macham aspek ulih nyadi realiti.
Tiada ulasan:
Catat Ulasan