NGINJAU jaku Paulo Freiredalam bup
iya, Pedagogy of the Oppressed, madahka “pelajar enggau budaya intelektual nya instrumen ti tau ngasuh
mensia mayuh ransing bejaku”. Sebengkah ari pengawa intelektual iya nya meri
jaku pejah ti nadai besekat ti ulih muka runding mensia mayuh ke konvensional senentang
sebarang isu politik.
Pasca PRU14 ke baru tu
tadi udah pengawa bepilih besai tembu dipejalaika udah ngayanka penuduk
intelektual bisi rajai mimit lebuh betapi enggau isu ke deka ngemaduka sebuah
gerempung ke dikumbai Majlis Profesor Negara (MPN).
MPN nya sebengkah entiti ti
betuaika raban elit profesor ari genap bengkah universiti di Malaysia.
Gerempung tu ditumbuhka perintah ke lama suba dalam taun 2010.Tu
gerempung kolektif sosial ke keterubah iya ditumbuh dalam sejarah menua. Iya nyadi
payung ngagai mudal mensia ke berega amai, ngembuan pelajar tinggi lalu disempulang
enggau nilai tambah ti luar biasa, iya
nya, raban profesor.
Nya
alai tanggung pengawa MPN nya nyerangkung meri idea, ngadarka strategi lalu
ngaturka pengawa ungkup pemanah menua enggau rayat bepelasarka peneleba enggau
penemu. Nya kebuah genap iku raban MPN nya dikumbai ‘Pemikir Menua’. Tuju rama Majlis
Profesor Negara ditumbuhka ngambika ulih ngumpul sereta ngenyamaika perintah
ngempungka sida ke tebangkar dalam bidang akdemik. Tuju iya ngambika dikena
mantu perintah dalam program pemansang menua enggau bansa. Enti diperatika enggau
silik, MPN tu ditumbuh dikena nyapai tuju ti spesifik iya nya dikena
- meri input penau ari sukut akademik enggau profesional, dalam mayuh leman bidang, ungkup guna advokasi publik kelebih agi dikena negapka pelasar polisi menua sereta bejalaika program ti udah diperambuka perintah.
- meri servis chara lalau enggau runding ti baru dikena ngangkatka daya semekih menua dalam mayuh bengkah bidang di peringkat nasional enggau antarabangsa.
- nyadika kustodian, tauka pemegai amanah, pengelati enggau integriti akademik sereta profesional bala profesor dalam menua tu.
- meri peluang ngagai raban elit ke tebangkar ba bidang penemu tu ngenjuk penau sida dikena malas semua fasiliti, bantu sereta pengelantang ti udah diasaika sida ngelama tu.
Pia
ku penerang senentang MPN ke bisi ayan ba laman web MPN empu.
Jaku gerah pasal pengawa ke
deka ngemadamka MPN nya dibantaika Menteri Besai ke baru ba mua mayuh kena 22
Mei 2018. Hal tu ukai semina ngayanka krisis enggau pematut institut nya
ditumbuhka tang mega mai mesej ti terang senentang ulah intelektualisme ti
kelalu meraya ke udah diidap raban sida ke pandai ba menua kitai kemaya hari tu.
Individu ke dikumbai intelektual
nya endang patut ngembuan daya pikir ti analitikal enggau kritis lebuh mantaika
sanding penemu iya ngagai mensia mayuh. Taja pia enti tak semina nyadi raban
akademik nya ukai jamin automatik ngasuh orang nya nyadi intelektual ti tulin
enti iya nadai ngembuan penteba ke udah disebutka tadi.
Anggap rama ke madahka
fungsyen enggau pengawa intelektual semina dilempaika ba bau raban akademik di universiti tau dianggap enda
nemban. Enti dipeda ari sukut realiti, raban intelektual ukai semina mungkur
sida profesor enggau pengelicha universiti aja tang mega semua orang bukai ba dalam
sektor komuniti ti bisi gasa ba bidang penemu enggau pelajar. Reti nya, tu mega
nyerangkung semua tingkat penuduk komuniti.
Dulu menya universiti nya mih pugu laman penemu tang kemaya hari tu universiti
nyau diperatika ukai agi penyambung tradisyen intelektual nya agi. Era personaliti
pemikir baka sida Profesor Syed Hussein Alatas, Profesor Diraja Ungku Aziz,
Pendeta Za’ba mayuh mantaika idea-idea baru ti diterenak ke dalam runding
mensia mayuh. Raban intelektual maya nya menya ukai semina bepikir lalu
ngenjukka pengiruh diri tang mega ulih ngubah struktur komuniti ti meku sereta
dimalai idea-idea dogmatisme ngagai iya ke pragmatik agi. Ambika banding, Syed
Hussein Alatas dalam Mitos Peribumi Malas balat bendar nyakal
runding orientalis Barat senentang pemai ulah orang Melayu ke dikumbai sida
bansa ke ngelusu. Pendeta Za’ba kala mejah seruri tukuh dependency orang Melayu ngagai diri empu lalu ditangkan mega enggau
orang ke tebangkar ba bidang ekonomi iya nya Ungku Aziz ke udah ngenjuk idea
iya senentang pengawa ke deka numbuhka koperasi enggau Tabung Haji. Kedua-dua
buah agensi tu mengkang idup nyentuk ngagai sehari tu. Kedua-dua agensi tu mih
nyadi institut ekonomi ke ngemerat daya idup komuniti.
Gela ‘profesor kangkung’
ke diberi pemesai politik ngagai raban akademik balat agi ngasuh krisis
pengarap mensia mayuh ngagai raban intelektual nya nyau majak kurang. Mensia
mayuh udah enda tentu ngayanka basa sida ngagai raban profesor tu. kebuah pia
laban bisi sekeda profesor balat nyundungka diri nyadi penyukung ngagai
komen-komen elit politik ke betukuh eskapisme.
Hal tu udah nyadi pekara
selama lebuh sida bela bepanggai ba pangan diri iya nya entara raban politik ke
bekuasa enggau intelektual. Sida tu tau disemaka keli sama keli ke saum isi
selubang ansang. Ambika banding, elit politik begunaka bala pemikir ngetanka
gasa sida lalu baka nya mega sida raban intelektual ke semampai ngarapka karier
sida enda diketuka raban politik. Nya kebuah, pansik ti digaga atas nama
akademik suah agi ngemeratka sekeda raban elit politik.
Suah mega raban intelektual
nya empu ke nyadi reaksioner kelebih agi lebuh sida kena panjuk pengawa sida
empu maya proses meri respons ngagai raban orang ke ngelaban penemu sida. Dalam
hal tu raban intelektual enda patut nyaup raban penguasa ke minta sida nyadi
instrumen ngenanka sekeda parti politik. Lebuh raban intelektual udah marit
diri dalam proses tu, sida lalu nyadi balat pasif kelebih agi maya betapi
enggau ulah sereta atur penguasa ke enda rentang; iya ke bisi niki nibung
enggau niki pinang. Taja pan raban parti ke merintah udah beralih baka upih
ganti mayang sepengudah 10 Mei, krisis budaya baka tu agi mengkang betandu.
Elit enggau penyukung
parti politik ke megai kuasa kemaya hari tu kala didinga kitai suba lebuh sida
agi nyadi penyakal deka ngenanka idea ke madah raban akademik patut lepas ari
dipegai sapa-sapa. Tang ulah ke sama iya nya alergi enggau jaku pejah seruri
tauka kritikan ari orang bukai. Nya alai, maya tu mih awak dikena sida ke intelektual
nyadi pengimbang ti neutral agi ngagai perintah enggau penyakal lebuh
ngenataika penemu.
Di Malaysia, intelektual enggau
mensia mayuh dianggap baka komponen ti enda segulai sejalai. Ulah mensia mayuh
ti fanatik lalu kelalu bepanggai ba elit politik nyadika sanding penemu tau
nasalka budaya bepikir enggau tajam. Tu
balat agi dipeda kelebih agi ba budaya bepenemu baka macha enggau ekstensif
sereta pengawa matau penemu baru enda dikereja chakah agi dalam unit ke mit
dalam komuniti baka institusyen diri sebilik.
Nya kebuah, enda ngalit
ati enti krisis intelektualisma ukai semina diidap raban sida ke ari baruh
dalam tingkat komuniti tang mega mungkur sida ke ba peringkat pelajar tinggi. Krisis
baka tu nyau majak ngerekai ngagai raban nembiak universiti.
Nilai akademik ukai agi
dipeda pekara ti ‘mar’ dikereja laban iya nyau datai ba kategori ke dikumbai
pekara ti sengapa kada aja. Kebuah pia, laban utai nya diatu nyau ulih dikomoditika
tauka dijual beli. Indah, karang ti ditengkebangka raban pemansik semina ngambi
penemu ari sanding penemu ti nadai autoritatif. Tu ngayanka pengelemi
raban graduan kemaya hari tu laban pengawa intelektual udah enda diperetika
enggau lurus ati sereta enda dikemeran nitihka etika. Nya kebuah, degree kemaya
hari tu ukai agi siti pengulih ti valid sereta lati laban mayuh ari ke bulih
degree nya bala sida ke bisi utai ari sukut material lalu bisi ‘penuduk
politik’. Sida bela berumpak ngulihka degree nengah pintu belakang. Tu mih ke
dikumbai ‘budaya intelektual ti pelesu’. Reti nya enti diperatika ari sukut
komprehensif, budaya intelektual kemaya hari tu udah enda ngasilka pekara baru
tang semina nyalin lalu ngena baru idea-idea lama.
Sepekara hal ti patut ditemuka
kitai enda ngira ari ni parti politik ti merintah sida elit politik deka
semampai ngayanka watak noble man lebuh
sida ba mua orang mayuh. Tu dikena sida nguingka psikologi runding mensia mayuh nengah chara
beberika ‘ubat bekulitka coklat’, ngujungka runding mensia mayuh tebius nyadi
tengkering sereta kena pugai ‘penemu pelesu’ senentang realiti ke amat nyadi ba
rampa mensia mayuh. Tu ngayanka hal intelektual nyau majak beserara ari realiti
lalu nguji nempa peragam kediri empu. Taja pia, pengawa raban intelektual ke
deka ngenjuk penemu ba dalam dunya pikir ari mayuh sukut bidang agi majak
diguna dikena ngaku pengawa individu mensia dalam hal bepikir.
Tiada ulasan:
Catat Ulasan