ENTI
dulu suba tentu kitai kala ninga jaku dalam dikena nerangka pengerapit kaul
siku mensia enggau mensia bukai. Jaku dalam ke disebut iya nya ‘baka
belangkas’. Jaku dalam nya enti diperatika baru bisi bendar tau dikena ba
konteks kemaya hari tu. Jaku dalam nya ulih dikena kitai ngayanka pengerapit
kaul mensia enggau telefon binching.
Pagi,
lemai, siang enggau malam, mensia enggau telefon binching rapit amat enggau
pangan diri nyau ‘baka belangkas’. Mensia semampai enda ngelekaka telefon ari
jari sida. Di nengeri, di pasar, di menua pesisir tauka dini-dini endur kitai
ulih meda mensia mayuh enda ngira umur, tuai tauka biak bepegai sereta bepedaka
telefon binching sida. Mayuh orang ngasaika diri enda genap pengidup enti gajet
baka telefon pintar nadai dikembuanka sida.
Siti
sindrom ke dikumbai Nomofobia berengkah pansut dalam taun 2010. Sindrom tu
diberi ngagai orang ke enda ulih beserara ari telefon binching sida. Obses
ngagai gajet baka telefon binching, tablet enggau komputer pangku seruran nyadi
ketegal ke alai bala mensia mayuh enda ulih ngeleka Internet, media sosial,
aplikasyen enggau games. Semua utai tu endang bisi mai empas ti enda manah
ngagai mensia mayuh. Pengawa ke gian telefon pintar nya mih pun kebuah 11 juta
rayat Malaysia kemaya hari tu betapi enggau penanggul enda ulih tinduk maya
malam hari. Tu meri empas negatif ngagai pengerai enggau produktiviti sida.
Utai
ke balat agi ngenyitka ati nya, ari pemayuh sida nya tadi nyau deka empa juta
orang bisi ditemu ngidap penyakit insomnia kronik. Sida tu ke bendar patut
diperubatka tang sida enda ngubat diri tauka enggai ngajung diri berubat.
Nitihka pansik, penanggul tu nyata amat serius. Reti nya satu pertiga penyampau
peranak menua tauka ari tiap tiga iku
rayat Malaysia bisi siku ari sida napi penanggul enda ulih tinduk ketegal
gajet.
Enti
nadai langkah rapat dikena nagang sereta ngubat penyakit tu iya tau mai empas
negatif ngagai modal mensia enggau produktiviti. Isu gian gajet tauka skrin tu
udah nyadi penanggul global laban iya mungkur semua peringkat umur enda ngira
tuai tauka biak.
Entara
empas negatif ngagai raban nembiak mit ulih dipeda ari pengelemi sida ba
pengelandik sosial, mar deka berinteraksyen, ulih ke agresif lalu ngembuan mata
ti rabun. Ba orang ke tuai, empas negatif nya
nyerangkung penanggul krisis ruang bilik tauka rumah tangga sereta
penanggul produktiviti ti majak kurang. Empas ngagai komuniti ulih dipeda ari
penanggul pengerai, penanggul enda ulih tinduk, gemu sereta penanggul pemindah
ke majak pasif.
Orang
ke gian bekenaka telefon binching kelebih agi baka sida ke gian bemain games
tau ngasuh adrenalin enggau dopamine
sida niki. Empas orang ke tinggi dopamine tu tauka disemaka baka orang ke udah
gian dadah kokain.
Sebengkah
pansik ari Universiti Maryland, Amerika dalam taun 2011 ngagai seraban nembiak
sekula di Britain, Amerika enggau China madahka sida ke gian gajet nya endang
sebaka enggau orang ke gian dadah. Bisi siku responden madahka diri berasai
gatal tubuh enti nadai bepegaika telefon. Nya kebuah raban pemansik madahka
gian ke baka nya endang enda jauh baka orang ke gian kokain.
Raban
komiti Gerempung Doktor Islam madahka orang ke gian telefon nya tauka dikumbai
gian gajet nyadi lebuh iya nya kelalu ngeringak ngerindangka diri bayam gajet
ngujungka sida sanggup ninggalka rutin batang pengawa sida ambika banding baka
makai enggau tinduk.
Sekeda
ari sida ke kelalu obses enggau telefon pintar nya balat bendar irau ati
kelebih agi maya sida betapi enggau penanggul tauka bebadi ba dini-dini endur.
Taja pan empas ari pengawa ke gian gajet
balat agi betukuh psikologi sereta diperatika enda bangat balat baka ke
gian kereban kimia tang ujung-ujung iya sigi nuju ngagai empas ke sama.
Uji
peratika anak mit kemaya hari tu enti enda diberi gajet bisi sekeda ari sida
nyau enda nemu meri timbang penemu agi. Sekeda ari sida nyau sanggup nyamah
apai indai sida. Nya mih gajet sigi tau ngasuh gian baka ke gian dadah. Semina
ke deka ditemu kitai iya nya taka ni pengerusak ke nyadi ketegal gajet.
Nitihka
orang ke tebangkar dalam bidang psikologi madahka orang ke ngena telefon
binching maya malam tau ngachau peninduk sida ketegal penampak ti dipanchar ari
telefon nya terus tama ke dalam mata ke lalu nganjung signal ti salah ke dalam
untak. Iya meransang sebagi ari untak ke benama superchiasmatic nuclei dani.
Kelimpah
ari nya, penampak ari gajet mega ulih ngurangka hormon melatonin. Hormon tu
ngasuh kitai tinduk enggau jenak. Taja pia enti iya nyau mimit dia orang nya
deka ngasaika diri enggai tinduk. Tu ngujungka ngachau jam biologi individu
nya.
Nya
alai, dalam hal tu pengguna enda ulih enda pintar mida nama pekara ti berat
enggau enda dalam pengidup sida ngambika enda gian bayam telefon binching.
Tiada ulasan:
Catat Ulasan