Kebuah nembiak lari ari rumah

Ketegal ke deka  dilepas ari dikungkung apai indai enggau diri sebilik ngujungka sekeda nembiak ngelarika diri ari rumah. Sekeda ari sida tu lalu enda ditemu agi.

Penyampau ke ditemu ngelarika diri nya nyadika evidens. Ari taun 2013 ngagai 2016, bisi 4,188 nembiak ke baru deka ngangkatka diri bujang lari ari rumah ke diasaika sida baka ke diau ba baruh punggu. 

Kaul enggau pangan diri sereta pengerindu besulu nya kebuah ke tebalan bendar nyadika dalih sida ngelarika diri ari rumah. Dalam timpuh ke sama mega, 1,330 nembiak mit ninggalka rumah sida ketegal pangan lalu seraban 1,025 betaban enggau sulu ati sida.

Kelimpah ari nya, bisi sekeda nya kira-kira 715 kes nya lari ketegal beserekang penemu enggau diri sebilik.  150 iku lari ketegal nadai ngembuan pengerindu besekula, 101kes ketegal deka ngiga kereja, 64 kes ketegal laya apai indai senentang sapa ke patut ngibun anak sida lalu kepenudi nya 81 kes ketegal nadai tentu dikeibuhka apai indai.  

Nitihka siku kriminologis Asso Prof Dr Geshina A. Mat Saat madahka bisi mega kes nembiak ke timpang pendiau segau-segau nadai temu tuju ngujungka sida enda nemu mulaika diri ke rumah.

Iya ke jai agi nya bisi kes nembiak ditaban laban deka dijual ke ulun tauka dijual keresa dalam tubuh sida. 

Ninting taun beribu-ribu iku nembiak diripotka bisi lenyau. Bisi nya ulih ngemulaika diri lalu bisi mega lalu enda temu tauka ditemu mati. Bisi sekeda kes ke diripot madahka nembiak dibajau lalu dibunuh.

Sapit Menteri Besair Datuk Seri Dr Wan Azizah Wan Ismail madah ngagai raban ba Dewan Rakyat bisi 363 iku nembiak diripot lenyau lalu bedau ditemu kenyau ari taun 2011. Nitihka statistic polis, iya madahka bisi 15,042 iku nembiak diripotka lenyau ari taun 2011ngagai May taun 2019 ngujung penyampau nya 14,679 iku. Wan Azizah, ke mega nyadi Menteri Indu, Diri sebilik enggau Pemansang Komuniti madahka ari penyampau nya 26 ditemu parai lalu ke bukai nya udah ngemulaika diri ngagau sida sebilik. 

Saup ari mensia mayuh nya factor ti patut dikemeratka laban iya ulih nyaup sida ke bekuasa ngiga nembiak ke lenyau nya. Belalauka perati bisi sekeda kompeni besai udah meri respons ti positif ngagai pekara tu. Ambika banding, sepuluh taun ke udah, RHB Banking Group udah bejalaika inisiatif mantu ngiga nembiak ke lenyau ngena chara ngayanka gambar enggau penerang silik pasal nembiak nya ngagai semua pampang bank sida ba serata menua. Siti agi chunto nya polis di Perak ke minta bantu media ngayanka informasyen pasal nembiak ke lenyau. Gambar nembiak ke lenyau nya deka diayanka ba palan rama sereta ba semua penama di serata menua. Kepala polis Perak nya madahka sida serius bendar beratika pekara laban ngasaika bisi nembiak nya ditaban ketegal kes ti enda manah. Nitihka iya, mega deka review genap iti kes dalam timpu enam bulan sekali, beratika indicator tauka informasyen ke baru ti ulih dikena sida nyidi pengelenyau nembiak.

Apai indai patut ngembuan tanggung pengawa nentuka pengelikun anak sida. Sida enda patut ngelempaika tanggung pengawa sida nya ngagai nembiak bukai, pengajar, sida ke berimbai pendiau enggau sida tauka kaban belayan sida.  Nitihka undang-undang the Child Act 2001, apai indai tauka penyaga nembiak negmbuan tanggung pengawa penuh ngagai anak ti diibun sida.  Enti semina nagang anak sida ari ke sesegau sebelah nya endang bedau chukup. Iya mesti disempulangka enggau pengawa ngelatih anak sida senentang nyaga pengelikun diri.  Bisi sekeda nembiak ditemu enda nemu nama diri tauka nama apai indai sida semadi sida udah besekula.  Mayuh ari sida semina ngumbai diri ‘adik’ lalu apai indai sida dikumbai sida ‘apak’ tauka or ‘emak’.

Nya alai, enti ulih nembiak patut diasuh ngena gelang tauka chip penyidi ngambika ulih ngelala identity nembiak enggau penyaga sida. Tu ulih ngemudahka sida ke bekuasa ngiga nembiak nya enti iya lenyau.