Idea tunda enggau ‘original̓’

Anang selalu ngudah utai kenu ku sekeda orang. Anang jampat nyalin idea orang bukai. Aku suah bendar meda sereta ninga kereban ke ditengkebangka ba blog aku disalin tauka disebut orang baik nya ba surat berita tauka ba media bukai. Nadai salah enti kitai ngambi idea tauka utai orang ketegal deka bekunsi penemu tauka dikena ba pelajar sekula tang anang enda ingat meri kredit ngagai orang ke empu kereban nya.  Enti nitih kitai patut ngerembaika kreativiti kitai empu ngambika kitai ulih nyeliahka diri ari dikapit sereta dirempah penemu orang bukai. Tu ngujungka reputasyen orang ke nyalin nya nurun enti dibandingka enggau orang ke empu karang nya tadi.

Isu plagiat tauka nyalin pengawa orang udah suah didinga sereta balat bendar nyadi kemaya hari tu ketegal penengkebang idea ukai semina diperatika sesebengkah raban aja. Nama pengelebih enti kitai ngasilka buah runding diri enti kitai ulih niru idea orang bukai? Aram kitai ngerintaika pengelebih enggau pengurang ulah baka tu nengah perati individu ke bekuasa enggau ari sukut undang-undang.

Enti sema nuan nya nembiak sekula tauka nembiak institut pelajar tinggi, tentuka sekeda ari pengawa ti diberi pengajar tauka pengelicha nya digaga  sereta ditembuka asil ari buah runding diri lalu  ukai nyalin ari bakih tauka ari media bukai. Ba sida ke udah bekereja, nama-nama idea ti dibantaika ngagai bos nyangka nya endang enggi diri empu lalu bisi nya mega diambi terus ari pun penyanding bukai. Baka nya mega ba bala pedagang, sida nya entara raban ke udu bekaul enggau pengawa nyalin hak nengkebang.

Chara kitai begari nya siti ari chunto rutin besehari-sehari ti ulih dikaulka enggau isu tu. Taja pia, iya enda bangat serius enti dibandingka enggau pengawa enchuri idea orang bukai lalu ngambu nya nyadi idea diri empu.

DIBARUH KUASA UNDANG-UNDANG 

Dua akta  ti ulih disakumka enggau isu tu iya nya akta hak cipta enggau akta hal dagang. Kedua-dua akta tu bekaul enggau idea nyalin sereta ngenchuri identiti enggau asil  pengawa orang bukai.

AKTA HAK CIPTA - Akta Hakcipta 1987 diubah ngagai Akta Hakcipta (Pindaan) 1997. Entara pugu kebuah pekara tu diubah iya nya ketegal penanggul pemindah karya kuasa penengkebang nengah Internet. Ba artikel aku tu aku nganti rambai jaku hak cipta nya enggau rambai jaku kuasa penengkebang. Akta kuasa penengkebang 1997 tu dikena negapka akta ti endang udah bisi sebedau tu. Iya ngungkupka kuasa ngagai pemesai polis ulih ngena waran ti dikeluarka majistret, tama rumah tauka premis sebarang maya dikena iya ngiga sereta ngerampas nama-nama salin utai ti ngelanggar kuasa penengkebang lalu ngena kuasa nya mega nyerungkai tempat nya.

Entara bansa karya ti dibaruh akta tu nyengkaum karya litericha, muzik, seni, filem, rekoding bunyi enggau siaran. Anang ngemudahka hal tu ketegal bisi timpuh maya ditetapka ungkup akta tu.

Enti diperatika ari sukut rama, kuasa penengkebang ke bisi ba karya litericha, muzik tauka seni kelimpah ari gambar bisi diungkupka ba penengkebang nya sepemanjai iya idup lalu mega 50 taun sepengudah iya mati. Ba karya bansa bukai, timpuh maya kuasa penengkebang nya dikira sampai 50 taun sepengudah karya nya berengkah dikeluarka.

AKTA HAL DAGANG – Ba baruh Akta Hal Dagang 2011, individu ti ditemu salah nyual barang tiru ulih ditinggang ukum mata duit RM10,000 bagi genap iti unit barang ti dirampas tauka diukum jil enda lebih ari tiga taun.

TUNDA CHARA ORANG JIPUN

Pengawa plagiat nya sebengkah ulah ti negatif nama agi enti kitai nunda 100 persin idea asal sesebengkah pekara.

Dalam bup ‘Kenapa saya tidak berfikir begitu?’ asil karang Ainon Mohd enggau Abdullah Hassan madahka  dikira enda nunda tauka ngupi enti kitai nunda baka chara orang Jipun.

Enti kitai deka bepikir baka sida, kitai mesti nentuka tikas kreativiti tinggi taja pan inovasyen kitai enda setipak enggau enggi sida. Chunto ti nyata ditunda orang Jipun nya dalam hal ngasilka produk. Produk ti pengabis dulu ditunda sida nya oven microwave asil ditengkebang lalu   dijual kompeni Motorola. Pemesai oven nya mesai sebuah jemari.  Taja pia saiz nya enda engkeman enggau komuniti orang Asia. Tu ngujungka kompeni Jipun ngubah baru oven nya nitihka saiz ke mit agi lalu ulih diengkah ba atas mija mit.

Enti nuan empu orang ke gawa bedagang, dipelabaka manah nuan ngerembaika idea ke udah bisi nya nyadi produk ti bekualiti agi lalu ulih nerima peminta mensia mayuh. Chara ke patut nya nyengkaum mansik gaya ulah raban pemeli sereta mendingka sebana sida enti produk asal nya enda ngemuaska ati sida. Asilka produk nuan enggau konsep sama tang penuh enggau penteba ti dikedekaka bala pemeli.

BAKA NI DEKA NGASILKA IDEA BARU?

IDUPKA BARU IDEA LAMA – Nitihka penemu pengarang bup Steal Like an Artist, Austin Kleon senentang isu tu madahka enti kitai ngetu nguji ngasilka sesebengkah pekara reti nya kitai deka telepas ari kuasa nengkebang sesebengkah pekara baru. Nya tau ngujungka  kitai berisiko tinggi agi lalu nitihka pekara ti meri inspirasyen ngagai kitai.

“Idea baru nya gaul tauka ‘remix’ ari siti tauka lebih idea ti ditemu kitai. Ba penemu aku enti tusah ngiga idea ke chulin, kerembaika aja idea ke bisi nya lalu ditambahka enggau buah runding ti baru,” pia ku iya.

PANSUT KE RAMPA DUNYA LUAR – Enti kitai dekaka sesebengkah pekara ti baru dia kitai enda patut ditangkup enggau rutin ti sama. Giga awak dikena kitai pansut sereta bekungsi idea enggau orang bukai  ti enda dikelala. Nyangka semina berandau aja pan ulih meri inspirasyen ti bebida sereta ulih dipugar nyadi idea. Anang enda ngusung kedai bup sereta ngabiska awak kitai dia. Besosial mega entara chara dikena kitai ngulihka idea ti engkeman ari orang bukai ngambika ulih dipegulaika enggau idea kitai empu.

KEREMBAIKA INSPIRASYEN

Enti ngelama tu kitai semina bebasaka sekeda individu ti beberita dalam pengidup besehari-sehari tang diatu awak patut diungkup ngagai kitai empu mega ngerembaika inspirasyen diri. Kitai patut ngiga sesebengkah pekara ti baru dalam pampang ti bebida. Ba pengawa orang ke merindang orang bukai, taja pan iya ba dalam raban penyanyi R &B tentu iya enda milih deka mendingka sebarang genre dikena iya ngulihka inspirasyen melodi ti bebida.

Pelajarka penemu baru lalu kerembaika enggau idea ari mayuh pun penatai.  Enti nuan nya orang ke belajar ba universiti sereta  benung kisuk begagaka ripot semester kepenudi, ‘pulaska untak’ dikena nuan ngerembaika idea ngambika ulih ngaga karya nuan empu asil ari kereja bebendar diri empu, munyi ku penulis tebilang Perancis, Marchel Duchamp. “Aku enda pechayaka seni tang aku pechaya ngagai orang ke ngasilka seni,” pia ku Marchel Duchamp. Uji pereti sereta pikirka reti besilup ari jaku iya nya.