Hari Bansa enggau Hari Pengelepas

Kemaya hari tu peranak menua Sarawak dibantai enggau mayuh leman jerita lama senentang hari bansa enggau pengelepas ari dipegai menua bukai. Pekara tu tau meba runding bala nembiak rebak baru. Uji peratika pekara tu:

- 22 July Sarawak ngingatka hari tu hari pengelepas ari dipegai British Koloni

- 31 August peranak Malaysia dipinta ngerami Hari Bansa bepelasarka 31 August 1957     hari Malaya dilepas ari pegai British Koloni. Orang Malaya ngingatka hari tu hari merdeka. Tu mih tau ngasuh bala nembiak redak charut.

- 16 September diungkupka hari ngingatka Hari Malaysia, iya nya hari Sarawak, Sabah, Singapore enggau Malaya begulai numbuhka perintah Malaysia tauka dikumbai Federation of Malaysia. Hari tu naka kediatu semina diintu di Sarawa tauka di Sabah.

Ni bagi hari bansa enggau hari pengelepas ke suah agi disebut hari merdeka, bela mih kitai berundingka pekara tu. Dalam buah kenang aku sekali tu aku semina bejuraika pekara ti bekaul enggau pengelepas tauka suah agi disebut orang nya merdeka.

Leka jaku merdeka tu datai ari jaku Sanskrit. Nitihka definisyen asal ari jaku Sanskrit “maharddhika”, merdeka mai reti  pengaya (kekayaan), pemesai, peninggi (keagungan) enggau kuasa pemegai (kekuasaan). Enti diperatika ari penerang reti tu dia kitai bela tau nanya pangan diri, katika kitai udah merdeka baka ti udah diterang ngena leka jaku  “maharddhika” nya?

Katikah kitai kaya ari sukut reta tengkira, pemandai enggau ulah?

Ya enggau bedau. Sigi amai kitai kaya agi ari jeman maya kitai dipegai menua bukai baka maya jeman dipegai British tauka Jipun. Taja pia ukai semua. Bisi ke kaya nyau enda ulih dikira pemayuh reta tengkira. Tang bisi ke agi miskin, idup kair pantuk baka manuk - kair pagi  empa pagi, kair lemai empa lemai. Agi mayuh orang Bumiputera dalam kategori “karung index” munyi ke dicheritaka Profesor Diraja Ungku Aziz. Agi mayuh mega rayat kitai ke idup dipanjuk penyeranta.

Baka nya mega enti diperatika ari sukut pemandai enggau penemu. Bisi sekeda nya nyau setipak enggau sida ke pengabis manah sereta terbilang di dunya; sida ke ulih ngelancharka satelit ke siga miga. Cambridge, Oxford, Harvard, Yale enggau IMD nya sekeda kelang endur sida bemain. Taja pia agi mayuh nembiak ke teberayan ari sistem sekula baka ari sekula primari enggau sekondari tauka iya ke bisi degree tang semina ulih gawa ba perintah aja.

Ketiga, katika baka gaya ulah? Minta ampun mih ari punjung pala sampai ke ujung kaki enti aku madahka, nama mih ulah ke ulih ditemegahka kitai? Ngerumpak, nyamun, ngenchuri, makai suap, ngakal, enda mayar utang, ngular, enda bebasaka undang-undang enggau enda bebasaka orang tuai semua nya bisi dikemeranka rayat kitai. Enti bejaku pasal ngeringka bansa iya tu mih ke ngaku diri hero, bejaku pasal pengarap ulih ngalahka orang ke gawa ba bidang tu.

Pemesai, peninggi tikas enggau kuasa (keagungan dan kekuasaan) pan sama. Ya enggau enda.  Nama penyuran dikena kitai nyukat pekara tu? Katika pengaya ti enda ulih kira tauka peninggi penemu enggau rega diri? Tau diperundingka kitai sebuat udah tu.

Nya alai, enti diperatika ari leka jaku ‘merdeka’ rayat kitai agi agi bedau ulih ngenataika diri ba tikas ke dikumbai merdeka. Sama-sama mih kitai beratika pekara tu. Selamat Hari Merdeka, Selamat Hari Bansa sereta Selamat Hari Malaysia.