Nadai Kaki Sereta Fakta Senentang Cherita Pengidup Pemun Pasar Raya 99 Speedmart

Nunda ku jaku tuai pemujur enda datai pia aja enti nadai dikereja. Baka nya mega enggau cherita pengidup siku tauke pasar raya ti jelai berita iya nya 99 Speedmart. Pemujur tu ketegal rega barang ti murah bebanding enggau pasar raya bukai.

Nyangka agi bisi bala kitai ke bedau ngelala sapa ke bendar tulang belakang tauka tauke pasar raya 99 Speedmart tu. Diatu cherita pasal tu udah viral ba laman sosial lalu meri peransang ngagai mensia mayuh ke bepikir sida nadai juluk idup laban bisi menawa.

Tauke tauka orang ke keterubah ngemunka pasar raya 99 Speedmart Sdn. Bhd. nya benama Lee Thiam Wah lalu iya udah ngayanka ngagai kitai nadai utai ti enda ulih digaga dalam pengidup tu munyi ku orang, ‘enti deka alah enda’. Aram kita bela  macha fakta senentang pengidup iya ke nyangka tau merangsang sereta ngasuh kitai semua gagit!

Lee Thiam Wah ada dalam taun 1964. Kenyau ari mit iya diserang sakit kronik ke ngujungka iya nadai kaki agi. Penyakit ke diidap iya nya dikumbai penyakit polio. Penyakit ke ditapi iya kenyau ari iya agi mit ngujungka iya nadai kaki lalu udah nya enda ulih enda ngena kerusi roda. Apai iya bekuli ngaga rumah, lalu indai iya bedaja. Iya bisi 11 iku diri menyadi.

Ketegal sida sebilik ke nadai chukup duit maya nya dia iya besekula semina naka primari 6. Pia mega, maya iya agi mit, indai iya kala nanya iya, "Nuan timpang pendiau lalu enda ulih besekula tinggi. Enti nuan enda bebendar gawa, nama mih penyadi enggau nuan ila?" Taja pia, iya tetap baka sempama tekura ke enda mantul ngapa enti bedau tepantup ba bandir. Iya enda mudah putus pengarap sereta badu sekerat jalai.

Ketegal pendiau iya baka nya dia iya nadai chara bukai kelimpah ari bejualka pemakai rumpas ba tisi jalai dikena ngulihka belanja kena ngidupka diri. Pengawa iya nya tadi ngenataika asil lebuh umur iya 23 taun, iya ulih ngumpul RM5,000 dikena iya nyadika mudal muka sebuah kedai runchit di Klang.

Utai ke diperambuka iya kedai runchit iya nya makin lama makin besai. Dalam taun 1993, iya lalu nyual kedai runchit iya nya enggau rega RM88,000! Duit nya lalu nyadika mudal iya muka pasar mini ti keterubah.

Maya agi keterubah nya, pasar mini nya semina dibuka ba Klang lalu nagit bala pemeli ke begaji mit enggau mega bala pekereja menua luar ti ngembuan kos daya idup ti minimum. Strategi makit sida majak tegap lebuh sida ulih narit ati bala pemeli ngena tagline  "Dekat lagi murah".

Ngena jereki ke belimpah ruah sereta enda putus-putus datai dia iya lalu nukar nama pasar raya mini iya nya ngagai 99 Speedmart dalam taun 2000. Naka taun 2018, pasar raya 99 Speedmart udah bisi 1,000 buah pampang ba serata menua Malaysia.

Nitihka Lee Thiam Wah, iya bepegai ba prinsip ti semampai dipegai iya kenyau ari mit iya nya ‘Your Only Limit Is You’. Taja pan iya diansak badu besekula ketegal penanggul ti enda ulih diseliahka tang pekara nya mimit ba iya lalu nadai ngelemika semengat tudah tuai angkat gawa bebendar agi dikena ngidupka diri sereta mantu ngelempung penanggul sida sebilik.   Kena ngemunka pengawa sigi ukai pekara ti mudah. Munyi ke disebut tadi, iya berengkah enggau pengawa bejualka pemakai ba tisi jalai tang hal tu mimit pan nadai ngasuh putus pengarap.

“Laban peluang pelajar aku ke sekat ba tengah jalai dia aku enda nemu mayuh pekara senentang industri bukai. Aku milih industri runchit ketegal ba aku nya mih pengawa ke pengabis mudah dikereja laban aku semina begunaka produk lalu udah nya ulih berengkah bejualka produk nya", pia ku iya lebuh ti dikerandauka pengarang berita The Star.

Enti individu ke timpang pendiau baka Lee Thiam Wah ulih ngubah nasit iya bah baka ni kitai ke regas sereta nadai penimpang tu?  Munyi ku jaku tuai, ‘enti deka alah enda, enti enggai bisi pan dikumbai nadai’, tempik dada, tanyaka penenguk nyawa .

Sanding Penemu:

Murni Azman,Tiada yang mustahil dalam hidup ini. https://says.com/my/seismik/fakta-tentang-lee-thiam-wah-pengasas-pasar-raya-99-speedmart

Facebook Rosalwanne Roslan