Sekula Antarabansa Dipilih Sekeda Rayat Malaysia

Sistem pelajar di Malaysia endang meruan dipegai Opis Menteri Pelajar Malaysia. Taja pia, peranak menua Malaysia ti deka belajar ulih besekula ba sekula ulih milih iya ti dipegai perintah, prebet tauka besekula kediri empu di rumah ke dikumbai homebound school. Sistem pelajar Malaysia dipusatka perintah diungkupka kelebih agi ngagai sekula primari enggau sekondari. Perintah nengeri nadai kuasa dalam kurikulum enggau aspek bukai dalam pelajar sekula primari enggau sekondari. Semua pekara nya ditentuka perintah besai ari baruh pegai Opis Menteri Pelajar (KPM).

Opis Menteri Pelajar mega udah ngelaska bansa sekula ti bisi nya nitihka kategori baka ke di baru tu:

1	Sekula Bansa (National school)	11	Maktab Rendah Sains Mara (MRSM)
2	Sekula Jenis Bansa (National type school)	12	Sekula Buding Penuh (SBP)
3	Sekula Wawasan	13	Sekula Buding Penuh Integrasi
4	Sekula Kluster	14	Sekula Seni
5	Sekula Premier	15	Sekula Amanah
6	Sekula Agama Islam	16	Sekula Pendidkan Khas
7	Sekula Missyen	17	Sekula Transformasi
8	Sekula Bestari	18	Sekula Perebet
9	Sekula Conforming	19	Sekula Antarabansa
10	Sekula Beprestasi Tinggi

Isu ke deka dikupaska aku ditu nya senentang sekula ti dipilih rayat Malaysia ari pemayuh bansa sekula ke udah dirintai di atas. Kebuah tu nyadi isu laban kemaya hari tu mensia mayuh baik nya orang politik tauka rayat selama udu bejaku pasal sekula kemaya hari tu ke udah ukai agi nyadika endur nerenak penyerakup entara pupu raban bansa di Malaysia. Bisi sekeda orang nyalahka sekula jenis bansa (SJK) baik nya SJK Cina (SJKC) tauka SJK Tamil (SJKT) nadai nulung nerenak penyerakup entara bansa laban  semina dua bansa tu aja iya bansa China enggau Tambi aja ke besekula ba sekula bansa tu. Jaku tu ke bendar enda tentu betul ari sukut fakta.

Pansik bisi madahka penyampau nembiak sekula peranak menua tu empu kelebih agi sida ke bepangkat tinggi udah ngelengkaka kurikulum pelajar bansa lalu milih sekula antarabansa tauka International School ke anak sida ninting taun ngujungka sida tu mayuh agi ari penyampau nembiak sekula ari menua luar. Ke bendar International School tu dtumbuhka di Malaysia dikena napi bala anak orang luar ke apai indai sida gawa di Malaysia. Sida tu nyengkaum anak diplomat, sida ke gawa ba prebet, kilang, kompeni minyak enggau ke bukai. Fenomena tu ngayanka tanda tanya laban konsep sekula antarabansa nya munyi ke udah disebut tadi endang dikena napi pelajar peranak menua luar, ekspatriat enggau diplomat menua luar ti bekereja di Malaysia.

Bepelasarka isu tu, dia tuai ti regas ba bidang pelajar tauka tokoh pendidikan bisi pengirau ati ke trend ti enda manahtu laban iya tau nyerara sereta nisih mayuh rayat Malaysia ari sistem pelajar premier di sekula bansa. Kebuah pia, laban iya deka meri empas ngagai pemansang pengelala diri taja pan apai indai ulih nitihka undang-undang Malaysia sepeneka ati milih institusyen pelajar ke anak sida.

Dalam saut betulis Opis Menteri Pelajar madahka diatu bisi 44,575 nembiak sekula peranak Malaysia bebanding enggau 25,220 rayat ari menua bukai ke bisi ngerejista diri sida ba 163 sekula antarabansa di Malaysia.

Ari sukut persin, 64 % nembiak sekula antarabansa nya peranak menua Malaysia, lalu laluh nya peranak menua bukai. Penyampau nembiak ditu empu ke besekula ba sekula antarabansa mega majak mayuh ninting taun, iya nya ari 8,077 dalam taun 2010, niki ngagai lebih 450 % dalam timph kurang ari 10 taun indah enda munyi ku sempama jaku tuai nyau banyak baka lemetak Tinting Kalang, mayuh baka beluh Danau Langkang. Uji peratika pemansang penyampau nembiak Malaysia enggau ari menua luar ke besekula ba sekula antarabansa.

TAUN	PENYAMPAU NEMBIAK MALAYSIA	PENYAMPAU NEMBIAK UKAI PERANAK MALAYSIA	PENYAMPAU SEMUA
2010	8,077	11,852	19,929
2011	9,956	13,203	23,159
2012	15,625	16,381	32,006
2013	19,749	18,727	38,476
2014	22,229	19,525	41,754
2015	26,238	20,088	46,326
2016	35,401	22,301	57,702
2017	37,218	17,436	54,054
2018	41,815	22,862	64,677
2019	44,575	25,220	69,795

(Berita Harian)

Pemansang nya ngayanka tanda tanya katika tau tak mayuh agi nembiak lokal kelebih agi anak sida ke begaji 20 % keatas (T20), ‘nyerara’ diri ari kurikulum pelajar bansa.Bepelasarka tu dia kitai meda sukut atur pejalai sekula antarabansa di Malaysia baka ti udah tepawah ari tuju asal penumbuh sekula tu, iya nya meri ungkup pelajar ngagai raban ekspatriat ti ngentapka diri ba menua tu.

Ari sukut bayar pelajar di sekula antarabansa nitihka diberitaka ulih datai ngagai RM50,000 setaun bepanggai ba fasiliti ke disediaka ba sekula nya.

Opis Menteri Pelajar madahka pugu faktor penumbuh sekula antarabansa nyadi kena narit menua bukai beranakka puku di Malaysia lalu ngujungka menua tu nyadi hab pelajar ba rantau dunya sepiak kitu. Penumbuh sekula antarabansa nitihka polisi nya dikena meri ungkup pelajar ngagai raban ekspatriat di Malaysia, tang taja pia perintah mega meransang sektor prebet ngambi bagi enggau regas dalam bidang pelajar.

Nambahka nya mega sekula antarabansa ti tegap sereta tebilang mega milih Malaysia nyadi indu kampus sida ba peringkat ASEAN enggau Asia. Tu tau bendar ngelakuka menua kitai nyadi palan pelajar ti ditapatka nembiak ari menua bukai.

Nitihka atur, sekula antarabansa ulih milih kurikulum British, Amerika Syarikat, Australia, Kanada enggau International Baccalaureatte, tang mata pelajar ti mesti diajar nya subjek Bahasa Melayu, Sejarah enggau Pendidikan Islam nembiak sekula menua tu empu.

Opis Menteri Pelajar madahka kebuah apai indai ari kelas jelan penatai pemisi nganjung anak sida ke sekula antarabansa laban deka ngambi peluang nganjung anak sida nampung pelajaran ba menua tasik sepengudah sida tembu belajar di sekula. Sida mega ngiga sekula ti ngembuan pengelandik ti ulih nyungkit penau anak sida, ambika chunto ba bidang kreatif sereta pengelandik bejaku jaku bansa ketiga enggau keempat. Apai indai mega dekaka bilik kelas ti kondusif, perengka main ti chukup sereta ulih napi main kemaya hari tu, penyampau nembiak enggau pengajar ti mimit sereta enggau peluang nambahka pengarap diri nembiak.

Penyampau nembiak lokal ke besekula ba sekula antarabansa ti majak niki ari taun ke taun enti nadai dijaga ulih nyelunganka pengawa perintah ti deka nempa menua bansa  di Malaysia. Enti hal tu enda diputarka iya tau nyadi pisa enti enda diperubatka tau nguyum sereta nganu orang ke empu tubuh.

Nya alai, Felo Senior ba Institut Kajian Etnik (KITA) Universiti Kebangsaan Malaysia (UKM), Prof Datuk Dr Teo Kok Seong, terit madahka kurikulum sekula antarabansa nadai meri fokus ngagai pengawa nerenakka aspirasi nasional ngagai nembiak. Indah, kenu ku iya subjek Bahasa Melayu enggau Sejarah ke mesti diajar di sekula antarabansa mega bedau chukup tegap dikena nempa pengelala diri anak Malaysia dalam raban sida nembiak lokal ke bela belajar ba institusyennya. Genap taun, nyau majak mayuh nembiak ari menua tu empu besekula ba sekula antarabansa. Enti nitih utai baka tu enda patut nyadi laban pekara tu ulih nisih sereta nyeraraka sida ari aspirasi nasional ti mayuh diterenak nengah kurikulum bansa. Lebuh mayuh peranak menua tu empu majak ninggalka kurikulum bansa, dipelabaka pengelala diri ke nyadi anak Malaysia deka mega kurang tauka nadai agi laban sida ditempa nitihka kurikulum luar, sekalika ari United Kingdom, Amerika Syarikat tauka Australia.

Enti sekula antarabansa terus diberi kuasa nerima nembiak lokal, iya mega deka nyadi seraka ti besai entara anak ‘orang ke bisi’ enggau anak peranak selama ke besekula ba sekula perintah. Nya kebuah, endang patut Opis Menteri Pelajar megai kuasa nagang penyampau nembiak lokal besekula basekula antarabansa, nambahka nya lalu mulaika tuju ke bendar penumbuh sekula antarabansa nya laban baka kediatu sida balat agi ngira penguntung ari tuju asal penumbuh sida.

Enti nitih ke patut semina peranak menua luar tauka ari raban ekspatriat aja diberi pemendar besekula dia lalu sida ke peranak menua tu patut diletakka atur masuk ti terang, iya nya semina sida ke ada sereta besai ba menua tasik ketegal apai tauka indai sida ke gawa ba menua luar.

Tokoh pendidikan, Tan Sri Dr Abdul Rahman Arshad, pechaya ‘pengelepas’ ti diberikaperintah ngagai nembiak lokal besekula ba sekula antarabansa deka bendar ngemuntanka pengawa ngidupka penyerakup perpaduan nasional. Kelimpah ari nya, iya mega tau ngasuh pekit ti enda badas entara sekula perintah enggau sekula antarabansa.

Pekit baka tu enda rentang ungkup sekula perintah kebuah pia laban udah tentu sekula antarabansa ngembuan pun penatai duit belanja ti chukup besai ti ngujungka sida ulih ngereja nama-nama pengawa ke dekaka sida.

Besunutuk enggau nya, Chairman Kaunsil Penyanding Pelajar Bansa (MPPK) ke dulu suba mega madahka guna pengawa nisapka sistem pelajar bansa awakka setipak enggau ubah jemah ila dipejalaika kena nentuka apai indai nembiak bisi pengarap lalu enda mai anak sida ‘lari’ ari kurikulum bansa.

Berebak enggau nya mega, Dekan Sekolah Pendidikan dan Sains Kognitif Asia e- University (AeU), Prof Dr John Arul Phillips, enggau terang madahka apai indai balat agi deka milihsekula antarabansa laban medium ti dikena belajar nya jaku English lalu kelimpah ari nya, sida bisi fasiliti ti chukup. Apai indai mega rindu agi ke kurikulum enggau rapat chara ngajar di sekula antarabansa ti meransang nembiak bepikir chara kreatif, bebanding enggau kurikulum bansa ti kelalu meri fokus ngagai peresa.Kurikulum ti beteraska peresa semina nyekat kreativiti minda nembiak lalu udah nya kitai mega nyerara sereta nisih sida dalam kelas nitihka pemutus peresa. Uji peratika nama penyadi ngagai nembiak ti ba kelas ujung dalam kandang 11 taun sida besekula ba sekula perintah.

Amat pan operasi sekula antarabansa kemaya hari tu bisi ‘tepawah’ mimit ari polisi pelajar bansatang kitai patut bisi pengarap pekara tu enda meri empas negatif ngagai penyerakup nasional laban kaul enggau integrasyenentara pupu raban bansa sekalika sida nya Melayu, China, India tauka Bumiputera Sabah Sarawak tetap agi meruan dikemeran sereta bisi ba sekula antarabansa. Atur ke meri peluang ngagai rayat Malaysia besekula ba sekula antarabansa patut diteruska lalu kitai arap bendar perintah bejalaika atur ti betul baka rayah nitihka gendang, begau nitihka terantang.

Perintah mega enda ibuh nyekat penyampau nembiak lokal belajar basekula antarabansalaban sida mega deka meri asil ngagai pemansang menua. Taja pia, endang patut agi enti rapat  ngajar di sekula perintah nya nunda sereta neladan rapat ngajar ke dikena ba sekula antarabansa.Kurangka pemayuh peresa lalu praktikka rapat ngajar abad ke-21 ba semua sekula, baik nya ba nengeri tauka ba menua pesisir. Kepenudi sekali, tentuka sekula perintah nya ulih ngasilka nembiak sida ulih nengkua jaku English enggau manah.