Kemaduka budaya xerox

SEMPAMA kulat tumbuh sepengudah ujan nya jaku sempama orang Melayu, baka nya mih dagang tauka kedai chelak ti sinonim enggau nama xerox. Industri bepelesarka pelajar tu endang nyadi palan ti diperebutka orang kelebih agi bala nembiak institut pelajar tinggi (IPT) kenyau ari suba.

Ke selalu nyadi nya, pengelicha ngerintaika bup ti patut dibeli bala nembiak institut pelajar tinggi nyadika sanding penemu sida maya licha. Taja pia, rega bup tu mar. Nya kebuah sida nembiak tu berasai ‘tesepit’ entara dua pekara, deka meli lalu bempuka bup sanding penemu ti asal tauka terus bekelimat lebuh nguna duit ringgit.

Dalam perspektif ekonomi, isu tu bekaul enggau teori kos telepas ke alai bala nembiak balat agi deka milih chara fotokopi laban asai ke enda tebelika bup ti original nya. Taja pan baka nya, bala nembiak mega patut nemu bup sanding penemu ti disalin nya siti pengawa jangka panjai penulis karya akademik nya. Iya diasil ari penemu, peneleba enggau pansik penulis ke udah ngabiska mayuh jam, titik peluh enggau buah penemu dikena iya bekunsi enggau mensia mayuh kelebih agi sida ke belajarka bidang lelemu ti sama.

Kati nadai kini bala nembiak tepikirka asil ilmiah tu ari sukut undang-undang ti ngembuan nilai hak pengempu ti bendar ngagai penulis nya? Nangkannya mega, patut ditanya katika raban penulis tu patut tauka enda nerima perais ari asil titik peluh sida empu?

Baka nya mega hak kompeni penyelak ti udah bebendar nyual bup tu. Nya alai, lebuh asil ilmiah baka tu temu disalin sengapa, dia iya nya sebengkah ari chara ngerumpak ti bebasa ngagai hak pengempu penulis asal. Tu mih sebengkah hal ti enda beretika amai ke benung nyadi maya arena keilmuan ti chukup mulia iya nya IPT.

Ukai semina nya, kelimpah dipeda nyadi siti penyalah ari sukut undang-undang, dalam pengarap mega iya mega salah lebuh asil karya ilmiah dichelak baru enggau  nadai pemendar penulis tauka kompeni penyelak.

Nya kebuah, semua orang patut ngembuan tanggung pengawa ngiga jalai mutarka penanggul fotokopi tu ari majak nyadi.

Entara alternatif ti deka dikenataika penulis nyengkaum pekara tu: keterubah, semua raban kelebih agi nembiak IPT patut nemu hal tu ari sukut betul salah pekara tu ari sukut pengarap kelebih agi ari perspektif Islam.

Kedua, minta pemendar ari penulis enggau kompeni  ngeluarka bup maya deka ngaga salin ke baru.

Ketiga, IPT nambah kuantiti bup sanding penemu ba librari sida ngambika iya ulih diinjau sereta nyadika sanding penemu sepemanjai maya sida belajar.

Keempat, nembiak patut kreatif ngena kereban ba internet lebuh begigaka bup sanding penemu betukuh elektronik.

Kelima, pengelicha mesti terit lebuh nentuka hal befotokopi enda majak nyadi. Sida patut meri jaku tangkan enggau lalau ngagai nembiak sida.