Siti
ari tema dalam kurikulum pelajar jaku Iban (KSSM) kemaya hari tu nya
konsumerisma enggau finansial. Taja pan tema tu bisi ayan ba bup teks tang ba
penemu aku iya bedau tentu chukup dikena nembiak rebak baru ngulihka penemu
senentang pekara tu. Ketegal tu mih aku ngasaika diri ngembuan tanggung pengawa
bekunsi penemu enggau sida nembiak primari enggau sekondari ke bisi macha blog
aku senentang pekara tu. Sekeda ari artikel ke deka ditulis bepelasarka tema tu
belalauka peneleba aku sereta ari pansik sereta bacha ba bup ke bisi kaul
enggau hal tu.
Nitihka
pansik Gerempung Penguna Pulau Pinang (2006), 8% rayat Malaysia ke bangkrap nya
sida ke berumur entara 20 ngagai 30 taun. Pelaba aku enti bisi apai indai macha
statemen tu tentu sida tekenyit tauka sekurang-kurang iya bisi tanda tanya
dalam ati sida. Nama kebuah utai baka tu ulih nyadi? Nama empas iya ngagai
serak generasyen ke nampung tubuh kitai? Nama penyadi ngagai maya dudi hari
ngagai menua enggau peranak menua kitai?
Utai
ke balat agi kritikal nya penanggul duit tauka nemban agi disebut salah mina
belanja bisi nyadi ba raban ke bepenatai pemisi ti baruh ti kemaya hari tu
dikumbai B40 baik nya di pesisir tauka ba nengeri. Utai tu nyadi nitihka pansik
bepun ari apai indai ti enda nerenak sereta ngajar anak sida chara mina duit
belanja enggau betul kenyau sida ari mit.
Utai
ke tentu amat nya nembiak rebak baru kemaya hari tu betapi enggau penanggul
mina duit ti bebida sereta tusah agi
diatur ari sida serak ke dulu ari sida. Nya alai artikel tu enggau ke nampung
tu aku deka bekunsi menggal mit senentang jalai apai indai ulih ngangkatka
tikas ‘literasi mina wang’ ba raban anak sida.
Tiada ulasan:
Catat Ulasan