Napi berita selebebu ngapa

Kemaya hari tu bala pengguna media sosial di Malaysia nyau bisi nempa siti istilah baru ke dikumbai sida ‘palatau’. Istilah tu nyau majak popular dalam raban pengguna media sosial. Kenu ku sida istilah tu asal penatai iya ari dua leka jaku ‘kepala tahu’ ti dipegulaika dikena ngayanka reti orang ti rindu  bejaku sentang sesebengkah perkara baka orang ke anda dalam hal nya. Iya ti bendar orang nya nadai ngembuan penemu ti dalam bekaul enggau pekara ti disebut nya.

Kenyau ari berita ti ngelekai pasal koronavirus baru (2019-nCOV) ngeruga dunya beberapa hari sebedau pengerami Taun Baru China tu tadi, mayuh amai orang bebali nyadi ‘orang anda’ sereta ngayanka ‘pemandai’ sida nengah media sosial baka Facebook enggau Twitter sereta ruai randau Whatsapp.

Raban ‘palatau’ tu semampai deka ngemansutka penerang ti enda amat lalu bejaku bepelasarka penemu diri empu aja. Sida mega bisi potensi besai deka nyadung berita selebebu ngapa lalu ngemansutka penerang ti betukuh provokatif ukai bepelasarka fakta ngujungka mensia mayuh enda tentu lantang ati ninga pekara nya.

Tang taja pan baka nya ketegal penerang sida di media sosial ke udu sensasional ngujung  iya bulih ‘like’ lalu dikunsi orang mayuh ngujung tu ngayanka persepsyen ti salah. Iya mega tau ngasuh mensia mayuh panik. Ambika banding, ba minggu sebedau tu, bisi gambar tauka video ti enda temu ari ni penatai madahka penyakit koronavirus tu udah ngelekai ngagai sekeda endur ba beberapa buah nengeri di Malaysia. Gambar berita tu disadungka raban palatau. Iya ke amat nya, Malaysia baru naburka jaku gerah madahka proses kuarantin tiga peranak China ke tama ke menua tu ari Singapore nengah Johor. Bedau ditemuka pengamat sida tu bepenyakit, udah begau serata menua ngumbai Malaysia sengaja ngelakka pesakit nya tama.

Tabi puji patut bedar diberi ngagai semua mesyinari perintah ti enggau naka ulih nyekat berita selebebu tu ari majak ngerekai. Ambika chunto, Opis Menteri Pengerai Malaysia (KKM), nengah semua arung media sosial sida enda badu-badu ngayanka penerang nyangkal  ‘berita’ ti nadai temu pengamat ke disadungka raban ti nadai betanggung pengawa nya.

Nambahka nya, KKM mega ngeluarka statistik tebaru pemansang koronavirus di Malaysia enggau ba serata dunya. Sida ngeluarka video pasal chara nagang diri ari dirampit virus sereta penerang berita ari pemesai opis menteri ngambika mensia mayuh bulih infomarsyen ti amat sepemanjai maya.

Suruhanjaya Komunikasi dan Multimedia Malaysia (MCMC) enggau kerjasama Polis Diraja Malaysia (PDRM) mega neritka adat enda meri ruang ngagai penyadung berita selebebu tu ari majak nyadungka berita sida. Ukum ti diletakka ba raban ti marit diri enggau pekara tu patut nyadika  ajar manah ngambika orang enda agi nyadung berita pelesu.

Nitihka rekod, Opis Menteri Pengerai udah mujur nyangkal 19 berita selebebu ngapa ti bekaul enggau isu koronavirus. PDRM mega  udah nangkap enam individu ketegal nyadung berita selebebu pasal penyakit nya. Semua tu tau dituduh baruh undang-undang dalam Seksyen 233 Akta Komunikasi enggau Multimedia 1998. Kelimpah ari nya, laman web Sebenarnya.my mega nyadi palan nyadung penerang ti nemban sentang pemansang isu koronaviru nyangkal sebarang berita selebebu ngapa nya.

Kelimpah ari nya, media lokal mega mantu muntanka berita pelesu tu. Agensi pengeluar berita perintah baka Bernama, RTM enggau Opis Pemadah Malaysia nguna semua platform sida dikena meri informasyen ti nemban ngagai mensia mayuh. Baka nya mega agensi pengeluar berita prebet mega sama bela enggau ngeluarka mayuh macham informasyen ti bisi kaul enggau koronavirus sereta ngakunka pengamat berita ti dikeluarka sida ungkup pemanah semua.

Kitai ke rayat selama tu mega patut sama-sama ngembuan tanggung pengawa nulung perintah enggau enda nyadung berita tauka informasyen ti bedau temu pengamat ngambika menua kitai likun sereta selamat.