Krisis dunya: Fokus ngagai asil lokal, kurangka import

Dikena aku mungkal artikel sepungudah taun baru 2020, aku nguji nguse pekara ti nyadi ngelingi rampa pengidup kitai besehari-sehari kelebih agi iya ke bisi kaul enggau ekonomi diri enggau menua kitai. Pekara tu bisi dibacha sereta diambi sereta dibali aku ari surat berita. Arapka artikel nya ulih nyadika lalau kitai sebuat lebuh berandauka krisis ti nyadi ba dunya kemaya hari tu.

Dunya kemaya hari tu napi mayuh macham krisis baka penanggul kampung angus, peninggi tikas ai tasik, konflik perang, pengamah rampa menua enggau ke baru nyadi iya nya penyakit Novel Koronavirus ti majak ngerekai. Taja pia, di menua kitai Malaysia, krisis ti patut bendar ngirauka ati nya datai ari pugu utai iya nya utai ke diempa kitai besehari-sehari tauka jaku mudah nya pemakai.

Kitai tentu bela udah nemu menua kitai mayuh bendar bepanggai ba import barang pemakai lalu risiko nya kadang-kadang nyadi penanggul sida ke mekal pemakai enti menua pengeluar barang pemakai nya betapi enggau penusah kemarau tauka ampuh bah – ambika chunto maya ‘rega bawang mirah ke niki tinggi ’ bedau lama ti udah. Iya nyadi ketegal bawang nya kurang ba menua pengeluar. Statistik Menteri Betanam betupi enggau Industri Asas Tani mandangka bisi nambah penyampau import pemakai ninting taun. Nitihka rekod sida RM224.7 bilion dalam timpuh lima taun ari 2013 ngagai 2017, iya nya niki pukul rata 7.2 persin setaun iya nya ari RM38.8 bilion taun 2013 ngagai 51.3 billion taun 2017.

Nitihka orang ke anda ba bidang ekonomi betanam betupi enggau pengeraja asal, Prof Datuk Dr Mad (RPT: MAD) Nasir Shamsudin madahka menua kitai ngembuan Penyampau Subsisten Diri (Self Sufficiency Level (SSL)) agi kurang lalu empas ari nya menua kitai nyadi pengimport beresi pemakai enggau defisit timbang dagang pemakai ti niki ari taun ke taun.

Raban pengajar ba Universiti Putra Malaysia (UPM) mega enggau bekunsi penemu madahka dalam taun 1990 defisit timbang dagang pemakai menua kitai direkodka semina RM1.1 billion tang niki ngagai RM8.5 billion taun 2006 lalu majak niki tinggi agi ngagai lebih RM18.6 bilion dalam taun 2018. Trend nya majak niki ketegal penyampau peranak menua kitai mega majak tinggi lalu peminta pemakai udah berubah antara nya ketegal gaji ke niki.

Taja pan Malaysia ulih dikiraka ba penuduk ti manah iya nya ba tangga ke-28 ari 113 buah menua nitihka padah Global Food Security Index 2019, tang tu ukai ‘lisin’ ungkup menua kitai terus lantang sereta nadai ibuh deka ngambi inisiatif dikena ngurangka import pemakai.

Sektor betanam betupi ba menua kitai ulih dibagi ngagai dua iya nya agro-pemakai enggau komoditi industri utai tanam  mayuh diguna ba industri betanam betupi baka sawit. 5.8 juta hektar tanah dalam taun 2018 udah ditanam enggau pun sawit. Hal tu nyadi ketegal untung ari komoditi industri tu lebih agi ari pengawa ngeluarka pemakai. Tu ukai reti nya untung dalam sektor ngeluarka pemakai enda ngasuh untung. Iya tetap nguntungka menua tang ari sukut relatif iya penguntung ari komoditi industri betanam betupi nya tinggi agi  ari pemakai. … ambika chunto, RM1 ti nyadika puku diperanakka ba sawit besai agi untung enti dibandingka enggau RM1 ti diperanakka ba pengawa ngeluarka pemakai.

Berindik ari nya, kiraka  udah chukup datai maya endur meratika pengawa beranakka puku ba bidang ngeluarka pemakai nyadika asil untung sosial ti deka mai penguntung ari sukut pengelantang rayat enggau pengelikun menua.

Enti kitai meratika ari sukut polisi menua ti udah maju baka Amerika Syarikat enggau menua bukai, sida meda pengawa beranakka puku ba bidang ngeluarka pemakai tu endang amat mai penguntung sosial lalu iya dikemeratka sida mega. Kebuah pia, pansik udah madah enti tiga hari aja menua enda  chukup pemakai dia penyarut deka nyadi sereta rayat deka betapi enggau isu keberuran.

Ba pengawa ngurangka import, polisi guna tanah ulih dipejalaika iya nya nengah chara ngungkupka kandang tanah endur betanam betupi dikena pengawa ngasilka pemakai kelimpah ari ngangkatka raban entrepreneur.

Nitihka informasyen ari opis bagi Industri Tanaman, Ternakan dan Perikanan Opis Betanam betupi enggau Industri Asas Tani madahka import agi beguna nyadika penabat maya utai tanam lokal nya kurang sereta dikena nyatupka peminta ungkup barang pemakai ti enda ekonomik diasilka ba menua tu baka buah enggau sayur temperate, gandum enggau gula. Taja pia, ba pengawa ngurangka menua kitai balat bepanggai ba import, opis menteri udah ngatur singkang ti proaktif nentuka pengawa betanam betupi enda mega tinggal setipak enggau pemansang teknologi enggau Revolusi Industri 4.0. Kelimpah ari nya, opis menteri deka majak meri fokus ngagai program betanam betupi moden setipak enggau juluk ati perintah nuju Wawasan Kemakmuran Bersama 2030. Entara chunto pengawa betanam betupi moden ti udah dipejalaiaka nya pemansang pakej teknologi betanam betupi dikena ngeluarka padi, pemansang betanam betupi ba pasar enggau pemansang kilang utai tanam baka pengawa nanam ngena chara rampa menua ti dijaga nengah pemansang kilang utai tanam ti disikap enggau sistem Internet of Things (IoT).

Menua kitai enda ulih selama jeman balat bendar bepanggai import pemakai baka sempama jaku tuai, arapka semata, baka bebubu. Udah chukup datai maya endur perintah meratika pengawa beranakka puku ba bidang ngeluarka pemakai nyadika asil untung sosial ti deka mai penguntung ari sukut pengelantang rayat enggau pengelikun menua.