Konsumerisma enggau Finansial: Nama Reti Pengidup Ti Lantang (Tusun Ketiga)

Pekara ti keterubah ke patut dipikirka kitai iya nya senentang pengingin ati kitai ke apai indai tu meda bala anak kitai ngasaika pengidup ti nyamai sereta lantang. Bah nama reti pengidup ti nyamai sereta lantang? Nama nya pengidup ti mayuh duit ngujungka kitai ulih meli mayuh leman utai ti dikedekaka kitai, tauka ngembuan ruang bilik ti lantang tauka kepenudi, ngembuan pemuas ati bekereja?

Nama-nama peragam ti dipikirka kitai pasal pengidup ti nyamai sereta lantang, duit nya enda siti ari pekara ti dikemeratka kitai. Taja pia, mayuh orang arapka pengidup ti nyamai nya enti sida bisi kad kredit, kerita, raban kelab enggau duit. Anggap ti baka tu ukai semina dipeda materialistik tang mega enda betul.

Bisi mega sida ke ba pengujung idup sida merinsa ketegal tekelalu mayuh utang laban ke deka ngulihka barang ti dikedekaka ati. Lebuh udah dipanjuk utang kitai udah enda ulih pansut ari panjuk nya ngujungka kitai empu trauma. Iya mega tau ngasuh kitai lenyau reta tengkira enggau imej diri laban nanggung utang sereta ngembuan pengidup ti semampai nangi nyengkaum ruang bilik ti enda berasai lantang.

Siti ari kebuah orang selalu dipanjuk utang iya nya ketegal sida ngasaika diri patut nitihka arus gaya idup kemaya hari tu. Taja pan enda chukup penatai pemisi, sida sanggup ngena duit simpan lalu nginjau duit enggau penyampau ti mayuh dikena sida ngintu pengerami melah pinang anak sida tauka bebelanja besai lebuh ngintu pengerami maya musin hari besai baka Gawai Dayak, Hari Raya tauka Taun Baru China. Bisi nya sekeda orang sanggup ngena kad kredit tauka berutang dikena nemuai ke menua tasik laban trend orang kemaya hari tu bagas nemuai ke menua luar. Penanggul bukai nya ketegal mayuh orang ngasaika diri sida patut ngembuan barang enggau kereban dikaitka enggau pengidup moden taja pan sida ke bendar enda ulih.

Penanggul sosial mega ngasuh mayuh orang berutang. Ketegal utang mih ngujung sida teparit enggau penanggul sosial dikena sida mutarka penanggul pengidup sida. Penanggul sosial tu tau ngujungka sida gian ngirup arak, ngeruku, bejudi enggau penanggul sosial ti bukai.

Nya alai endang enda ngalitka ati enti panjuk utang nya ulih ngujungka ruang bilik nyau pechah belah. Sekeda apai indai enggai ngaku anak sida laban dikena nyeliahka diri  ari dikachau ah long ti semampai deka nagih utang bala anak sida.

Nya kebuah, pengidup ti nyamai semina ulih diasai lebuh kitai, ukai bank tauka ah long nyaga pengidup kitai empu. Ulih tauka enda kitai madahka pengidup kitai teratur enti kitai seruran digagai bala ah long ke nagih utang kerita enggau kad kredit?

Panjuk utang ulih nyadi ‘pusin ti ganas’ ke ngujungka pemedis kitai ulih pansut ari panjuk nya. Enggau duit ti dikemisika kitai nya kitai mejal diri bebayarka utang ngujungka kitai nadai agi duit ke deka disimpan. Empas ari nya mega kitai nyau dipejal bebendar gawa ari selama tang iya nadai mai kitai kini-kini laban pengidup kitai nyau abis dikena nembuka pengawa bebayarka utang.   Nama reti pengidup kitai enti udah baka tu?  Tusah alai kitai deka idup lantang laban pengidup kitai nyau berabis bekikis bulu betis ukai dikena melanja bala anak sekula tang dikena kitai bebelika barang.

Nya kebuah, bala anak mesti diajar pintar mina duit sida ngambika sida nemu bekelimat sereta merambu nyimpan duit ungkup pengidup sida maya dudi. Besimpanka duit nya chara ti chukup manah dikena ngajar bala anak ngambika sida ngemerat hal pengidup sida maya dudi. Dikena meransang sida nyimpan duit, tentuka sida belajar ngagihka sekeda duit belanja ti diterima sida ninting bulan disimpan. Petua nya chukup muntang iya nyimpan dulu udah nya baru melanja laluh duit ti disimpan nya lalu ukai bebelanja duit lalu nyimpan duit laluh udah nya.

Realiti pengidup nyamai enggau lantang ukai semina bekaul enggau duit aja. Taja pia sigi amat munyi ku orang, kitai enda ulih enda ngumbai duit nya beguna amat laban enti nadai duit pengidup kitai nyadi tusah. Ambika banding, enti di pasar deka kemi pan bebayar.

Siti pelajar ti patut dikemeratka bala anak nya enti deka ngasaika pengidup ti lantang amat dia kitai mesti pintar nyaga pengidup kitai empu. Pekara tu semina ulih dikerejaka kitai empu enti kitai ulih ngatur pejalai duit kitai empu.

Duit ulih dimina enggau manah enti kitai belajar ngemeranka pengidup ti jelan lalu idup enda dikungkung utang. Tu tau ngujungka pengidup kitai lantang ari orang bukai ti idup dipanjuk utang. Nyekat pengingin ati sereta nulak rempah pengidup ti begaya baka orang kaya raja ulih magar kitai empu ngambika kitai semina meri prioriti ngagai utai ti patut aja. Reti nya kitai enda mudah dipugai pengerindu bebeli sereta berutang sepeneka ati. Nya mega madahka pengidup ti bisi reti enggau bekualiti ulih diasai lalu iya jauh berega ari duit aja.