Meretika bida entara seraka sosial, nyeraraka diri enggau kuarantin

Lekaka dulu sesempa leka pinang tampung artikel senentang konsumerisma enggau finansial laban diatu orang bela begau becherita pasal sebansa penyakit iya nya Covid 19 ti majak ngerekai ngagai serata menua di dunya kemaya hari tu.

Kenyau ari Hari Tiga (18 Mac 2020), perintah udah bejalaika atur mindah betagang ngagai rayat ke diau ba serata menua di Malaysia ketegal penyakit COVID-19 ti majak ngerekai. Langkah rapat tu diambi perintah dikena nagang penyakit tu ari majak ngerekai. Naka kediatu udah bisi dua iku peranak Malaysia udah ninggal ketegal penyakit nya. Taja pia, lebuh kitai semua sama-sama nitihka atur ti dipejalaika perintah nya, agi bisi bala kitai ke bedau tentu nemu enggau terang senentang sekeda terminologi ti suah dikena orang maya penyakit tu nyadi kemaya hari tu.

Nya kebuah, aku ngasaika betanggung jawab bekunsi penemu menggal mit enggau bala pemacha blog tu senentang terminologi ti bisi dikena nya. Terminologi nya naka ulih ngena jaku Iban laban tu mega endang blog jaku Iban tambah mega dikena nambah kereban bacha ngagai bala nembiak ke bisi ngambi mata pelajar jaku Iban. 

Ditu aku nguji nerang enggau ngelansa tiga terminologi ti suah dikena ba meda senentang penyakit Covid 19. Tiga terminologi iya nya

1. Seraka sosial tauka penjarakkan sosial (social distancing)

2. Seraraka diri tauka pengasingan, isolation

3. Kuarantin

Tuju nerang nya dikena nyaup kitai meretika bida entara ketiga-tiga terminologi nya. 

Seraka sosial

Terminologi seraka sosial tu mai reti orang ke enda betabi jari enggau pangan diri, nyeliahka diri ari endur ti mayuh orang betugung sereta nyeraka diri ari orang bukai sereta kepenudi nya diau di rumah enti nemu diri enda nyamai pendiau.

Nambahka nya tauke tauka pengaji pengawa patut meri pemendar ngagai pekereja bekereja ari rumah. Perintah mega udah ngeluarka perintah ngambika semua institusyen ti enda kritikal ditutup baka institut pelajar tinggi, sekula, insitutusyen pengarap baka mesjid, gerija, kuil enggau tuapikong. Opis perintah ukai essential mega ditutup. Atur pengawa lumba enggau main mega dilanjar ke hari bukai. Palan pemerindang sereta palan pengelantang ati baka muzium, teater enggau pengawa bekonsert mega endang  patut bendar  dikinsil perintah.

Giga kereban pengangkut rama ti enda sekut enggau orang mayuh tauka neriba kerita diri empu enti bisi kerita lebuh deka bejalai.

Seraraka diri

Sida ti udah diakun positif COVID-19 ulih opis pengerai endang patut nyeraraka diri ari orang bukai. Pengawa nyeraraka diri tu dipejalaika enti kitai udah ditemu lutur kitai nya sakit, sekalika kitai nya di rumah tauka di hospital. Langkah  napi penyakit bejangkit ti patut dipejalaika enggau rigid agi bebanding enggau
kuarantin.

Pengereja pengawa ba opis pengerai, ambika chunto mesti ngena gari ungkup napi diri ari penyakit nya dikena nyaga diri sida.

Sida ke nyeraraka diri mega mesti ngena tuping dikena nagang droplets ti dipelabaka ngundan virus ari ngerekai ke bukai.

Kuarantin

Kuarantin reti nya diau di rumah lalu enggau naka ulih nyeraraka diri ari orang bukai dalam timpuh 14 hari. Sida ke diau serumah enggau orang bukai enda ulih enda ngiga bilik tauka endur bukai ba rumah nya. Sida mega enda ulih pansut bebelika utai, makai tauka besosial ba luar baka ke digaga sida ngelama tu.

Nambahka nya, sida ditagang tinduk ba bilik peninduk ti sama enggau sida bukai. Baka nya mega agu enti ulih mesti enda bekunsi enggau orang ke udah kena kuarantin nya.

Bejimat mega lebuh bekenaka pinggai mangkuk. Enti pinggai mangkuk nya dikunsi enggau sida bukai, iya mesti dituchi sepengudah dikena.

Nama kebuah kitai patut ngemeratka pekara tu taja pan kitai ukai disengkaum dalam raban ke berisiko?

Hal pengerai rama nya siti aspek ti mungkur mensia mayuh. Risiko ungkup individu nyangka kurang agi nya alai sekeda ari kitai ngumbai pekara tu semina ngenusahka kitai aja.

Taja pia, langkah rapat napi penyakit tu ari terus ngerekai bisi mai pemanah ngagai mensia mayuh. Pia ku penemu Joshua Sharfstein, Mandal Dekan di Johns Hopkins University di Baltimore, Amerika Syarikat. Kitai engka enda ngembuan simptom tang anang enda ingat, kitai mega agi ulih ngerampit orang bukai. Lalu sida tu nyangka dipejal masuk hospital ketegal ulah kitai nya tadi. 

Tu tau ngujung penyampau pesakit bekenaka katil majak mayuh lalu ba awak ke sama mega katil tu diguna pesakit bukai baka pesakit kanser, indu beranak tauka sida ti bebadi ba jalai. Utai ti baka tu mih mai penanggul ti besai ngagai mensia mayuh. Nya alai aram mih kitai sama-sama nyaga pengerai diri lalu anang nyadika tegal ngagai orang bukai.