Konsumerisma enggau Finansial: Ngasaika Penusah Apai Indai Begigaka Duit (Tusun Keempat)

Ba tusun keempat tu aku deka bekunsika kebuah kitai patut ngasaika penusah apai indai begigaka duit sereta beterima kasih ke sida. Duit nya utai ti pengabis berat ba sida ke begaji mit tauka bepenatai pemisi ke baruh baka orang bumai betupi, orang bedagang mit, orang berikan enggau pengereja pengawa ba opis perintah tauka prebet.

Enti bala anak udah enda nemu penusah orang tuai sida begigaka duit dikena ngidupka sida sebilik sereta ditambah enggau nadai penemu senentang pemesai guna enggau chara mina wang enggau manah tau ngujungka pengidup bala anak jemah ila nyadi penanggul.

Sigi amat enti kitai beratika kemaya hari tu, budaya nitihka trend balat bendar ngerempah sereta manjuk sida nembiak ke rebak dudi. Kitai ulih ngambar dalam runding diri baka ni siku nembiak ari siti ruang bilik ti bepenatai pemisi baruh megai duit RM500-700 dalam jari lebuh iya mutus ati deka badu besekula lalu deka bekereja. Enggau nadai penemu mina wang ngemayuh nya dia kitai ulih terundingka  baka ni mih pengidup iya nya lagi betapi enggau mayuh leman utai ti tau nyadi.

Enti nadai ngadang sereta penemu senentang chara mina wang, nembiak baka tu nadai nemu pengidup nya tau mai pengusut ngagai iya lebuh kena panjuk mayuh macham penanggul duit.

Anak orang bumai, berikan tauka kuli patut nemu mina wang ari mit ngambika pengidup sida sebilik ti tusah nya enda majak berat. Genap sen ti dipelanja mesti diguna enggau bejimat.

Anak ari sida ke bekereja perintah tauka prebet ti begaji mit mega patut diajar ngambika sida nemu pemendar apai indai sida ngidupka sida sebilik. Sida patut nemu pengawa nya ukai utai ti mudah dikereja.

Baka nya mega apai indai ke bedagang mit, nyau  ninting siang malam berundingka hal duit dikena sida melanja anak sida. Tu ukai hal ti mudah dikereja.  Tiap-tiap sen ti digumpul sereta disimpan nya asil ari tulang urat apai indai sida sereta dimina enggau chukup silik. Apai indai sanggup betunggang lupung laban deka meda pengidup anak sida nyamai jemah ila. Nya kebuah, bala anak patut belajar idup minaka wang enggau likun ngambika enda majak ngenusahka apai indai sida.

Utai baka tu majak tusah enti ari mit bala anak udah nemu berutang ketegal bisi pengingin ati sereta deka nunda trend kemaya hari tu. Hal tu tau ngujungka sida rua enggau belanja lalu tau ngasuh pengerai sida enda manah.

Nya alai,  hal mina wang nya sebengkah aspek pengidup  ti ulih nentuka  orang nya deka ngasaika pengelantang tauka enda. Penyilap mina wang ulih ngasuh orang nya ba sengkan pengidup ti tusah sereta semampai ngasaika diri kena tekan belama.