Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.

"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Isnin, 17 Januari 2011

Pantang dalam Budaya Iban


Jaku pemuka

Pantang nitihka Kamus Tribahasa mai reti petik-petik ke diukir ba tubuh mensia baikka iya orang lelaki tauka indu. Bisi sekeda menua ngumbai iya ngena nama kelingai. Pengawa ngukirka tubuh nya dikumbai mantang tauka ngelingai. Sejarah senentang pengawa tu nadai mayuh udah dipansik kelebih agi dalam adat asal orang Iban. Kenang pengarang sekali tu nguji nyerungkai enggau ngelansa budaya bepantang dalam pengidup bansa Iban.


Taja pan bukti-bukti sejarah bepantang tu enda tentu mayuh, tang sejarawan ngaga simpul penemu madahka seni pantang tu udah bisi kenyau 12.000 tahun Sebedau Masihi. Jeman dulu pantang mega nyadi baka ritual bagi suku bansa Maori, Inca, Ainu, Polynesians, enggau bansa bukai. Nitihka sejarah mega, bansa Mesir ke ngasuh pengawa bepantang tu ngerekai ngagai menua bukai ba dunya. Ketegal nya iya mega dititih bansa bukai ba pelilih menua Yunani, Persia enggau Arab.


Endur Tubuh Ti Dipantang

Nitihka pansik, orang Iban enda mudah mantang ukir sebarang endur ba tubuh iya. Ukir ke dipantang ba tubuh orang Iban tau diperatika ba betis, rekung, bau, berang, rusuk, lengan, pah enggau ba tapak jari sereta tunjuk jari. Nitihka ensera, pantang dicherita munyi tu, “...ukir rusuk gerayuk nandan jelayan, kelinggai pah deduyah lapan tangkan,” (Moses Beti, Telajan, 1963)


Tiap-tiap selangkuh tubuh ti diukir tu endang ngembuan reti iya empu. Ambika banding, nembiak ke baru deka nguji bepantang suah agi ngukir sauh ba betis iya. Ukir bungai terung endang dipantang ba bau lalu ukir engkatak ba berang. Ukir ti dipantang ba rekung sama bela dikemeran orang indu enggau lelaki Iban. Pantang orang indu suah agi nya ukir gelang ba dekuan tauka dekuh enggau ba tunjuk.


Motif Ukir Pantang Iban

Munyi ke udah disebut tadi, motif ukir pantang bansa Iban endang ukai utai ke sengapa-kada. Sekeda ari motif ukir nya nyengkaum bungai terung, tajau, engkatak, kala, nabau, sauh, gelang tauka semina tanda titik.
 

Kebuah Orang Iban Bepantang

Sebedau ngarang artikel tu aku bisi berandauka orang ke dikira aku bisi penemu senentang bepantang. Siku ari sida ke dikerandau nya nyengkaum orang indu ke endang bisi pantang ba lengan iya. Kelimpah ari nya aku mega bisi betanya ngagai En. Jimbun anak Tawai ari Majlis Adat Istiadat.


Sechara kasar bisi beberapa kebuah orang bansa Iban tu bepantang dulu suba. Nyadi kebuah nya deka dikenangka ngelansa ditu.


Keterubah iya orang Iban bepantang kelia ngambika sida iya sebulu enggau nabau tauka engkuli. Nitihka jerita, dalam pengarap lama Iban endang segulai sejalai enggau bala antu. Siti ari tanda Iban endang segulai sejalai enggau nabau nya ari ensera Keling Gerasi Nading, Bujang Berani Kempang. Keling tu kenu ku jerita endang purih nabau. Aki iya benama Tambai Chiri Aka Ati Nabau Besirang. Nya alai sida Keling tu ke bendar purih ular tauka nabau. Nyadi kelia Iban nitihka ensera endang berimbai pendiau enggau sida Keling. Ngembuan pantang baka tu nyadika peninding tauka pagar diri ari kachau utai tauka sebarang penyakit.


Kebuah kedua nya tanda diri liat ati natka pemedis. Nyadi kelia orang Iban nadai pekakas ke chukup baka kemaya hari tu. Bisi madahka dawat tauka linsu ke dikena bepantang asal iya ari arang empurung ti dichampur enggau ai tebu. Kereban ke dikena agi balat amat tradisional baka tangkai kayu, jarum enggau penukul mega ari batang kayu. Pemedis maya bepantang nya mih nyadika peransang orang Iban laban ukai semua orang berani sereta ulih ngenatka pemedis maya bepantang. Bepantang ba rusuk nunjukka pengering sereta berani.


Ketiga nya, bepantang nya nandaka orang Iban udah pegi bejalai ke menua bukai. Bejalai tu endang adat asal ke dikemeran orang Iban ari kelia menya. Leo Brereton ke bisi ngaga pansik senentang pantang Iban nulis dalam Tattootime (1982) munyi tu:
Rosette motifs worn by the men on both shoulders are used, especially by the Sea Dayaks, as identity marks. They are often seen on the back as well, in earlier times applied in commemoration of special journeys ... .”


Kebuah keempat bisi kaul enggau kebuah ketiga. Ukir ke dipantang ba tubuh ulih nyeritaka peneleba siku-siku dalam pengidup iya. Bisi pantang orang nuliska nama endur ke kala digusungka iya lebuh ke bejalai ngagai menua jauh. Aku empu kala meda pantang ‘Sandakan’ dipantang ba lengan siku orang tuai Iban. Iban ke keterubah nepan bilun mantangka rusuk iya enggau gambar bilun. Nya dua iti chunto nandaka sida udah kala bejalai ngagai menua bukai sereta nyeritaka peneleba dalam idup diri. Motif bunga terung nya suah agi dikena nandaka diri udah bejalai jauh ngagai menua bukai. Motif nya mega nandaka lelaki ke udah ngangkat diri bujang sereta udah keluar ari baruh apai indai.


Indu Iban ke bepantang ba tunjuk nya nandaka sida nya indu ke landik ngebat tauka betenun. Kelimpah bepantang ba tunjuk, orang indu mega bepantang ba dekuan tauka dekuh. Bisi pantang nya mega nandaka diri udah gerai ari sakit.


Pantang mega nanda orang Iban nya udah kala enggau ngayau sereta kala bulih dengah. Nama pantang tu dikumbai tegulun. Tegulun dipantang ba belakang tapak jari enggau ba tunjuk. Nya nandaka orang nya udah kala bedengah bulih pala. Pengawa bepantang tegulun tu suah dipejalaika maya tauka udah Gawai Enchabung Arung. 


Kelia orang Iban enda bepantang sebarang laban ke diikat enggau adat sereta pengarap. Orang tuai ke dipeda agi bisi pantang ba tubuh diatu pan nyau kurang semina bisi ditemu ba sekeda endur aja. Taja pia kemaya hari tu kitai ulih meda mayuh amat nembiak redak bansa Iban ke dipea bisi ukir ayan sebelah lengan enggau tubuh. Sida ke bepantang tu ukai semina orang ke lelaki aja tang mega bala sida ke indu. Taja pia kebuah orang Iban bepantang kemaya hari tu ketegal pisin tauka nyadika siti ari chara nganta. Mayuh agi ukir nyangka rindu agi orang indu dara meda bala bujang. Pia mega bala sida ke indu. Bisi sida nyadi ukai semina bepantang ba lengan tang ba dada tauka ba belakang pinggang sida. Motif ukir mega enda tentu nitihka motif tradisional agi. Motif bungai terung ukai semina dipeda ba tubuh orang bansa Iban aja tang mega orang bansa bukai baka orang putih mega dipeda bisi ukir pantang bungai terung laban kemaya hari tu pantang nya lebih ngagai fesyen tauka trend.


Jaku Penutup

Kenang pengarang senentang pantang dalam budaya Iban tu semina ngelansa aja. Ngagai bala bukai ke bisi ati deka mansik enggau silik pengawa endang nadai ditagang. Enggau kenang tu kitai sereta kelebih agi nembiak rebak baru ulih nemu menggal mimit senentang pantang dalam budaya orang Iban. Laman web nyangka bisi mega ngenang senentang pekara tu tang mayuh agi dalam jaku English enggau sekeda nya dalam jaku Melayu. Enggau kenang tu mega, aku ke ngarang kenang tu minta pemacha ngampun aku ketegal pengerapas penemu enggau semua penyaru aku ke disadang bisi ayan dalam karang tu. Aku besedia nerima tegur, bantah tauka tambah penemu ari bala pemacha mayuh ke tau pulaika pemetul enggau pemanah pengawa tu ngambika iya tau nyadika pesaka bansa Iban. 


Penyanding Penemu
1. Jimbun anak Tawai, Majlis Adat-istidat Sarawak
2. Timothy Salang, SMK St. Augustine, Betong
3. Mary Gassan, SMK Kanowit, Kanowit
5. Leo Brereton, Tattootime (1982)
6. Berita Harian ____
7. Utusan Malaysia _____
8. Kamus Tribahasa, Sarawak Iban Writers' Assoc., 2010

3 ulasan:

  1. "The motif and meaning of Sarawak tatoos are incredible and the elements and meaning are well connected. Traditional tatoos of Sarawak were one of the most beautiful in the world." - Dr. Lar Krutak, American Cultural antropologist, photographer and writer.

    BalasPadam
  2. “Maybe the indigenous people could do a research on local tattoos or start a foundation to preserve the history behind them. In the long run, I believe this will inspire the younger generation to document them as well.” -
    Dr. Lar Krutak, American Cultural antropologist, photographer and writer.

    BalasPadam
  3. Kunjung ke Laman Warisan Parang Ilang dan Terabai Iban di parangjohnny.blogspot.com

    TUKANG PARANG SIBU SARAWAK - PARANG ILANG IBAN , PARANG NYABOR, PARANG LAPAH DAN TERABAI

    Kami menerima tempahan Parang Ilang & Terabai, Parang Nyabor,Parang Sarawak dan Terabai Sarawak. Tukang Parang kami berpengalaman dalam hasil kerja tangan sarung kraf serta ukiran besi parang yang telah menerima Anugerah Khas-Tukang Ulung pada Hari Kraftangan Kebangsaan 2011 anjuran pihak Kraftangan Malaysia. Hubungi Johnny Barangan (013-8486337 atau 013-8437611) untuk tempahan dan pertanyaan.Alamat Bengkel Kami : Rmh Singgai Pasai Bon, Batu 16 Jalan Oya, 96000 Sibu, Sarawak.

    BalasPadam