Nitihka pengingat sida ke tuai, kitai ngangau tauka ngumbai orang bansa Melayu tu Laut. Uji peratika cherita tu; Bisi tuai siku ari ulu Paku undur deka meda sereta betemu enggau bansa ke nguan Nanga Saribas. Baka nya mega siku tuai sida ke di Nanga Saribas deka mudik sereta betemu enggau Iban. Seninjik bendar seduai tu betemu. Tuai Iban Paku nya nanya nama bansa tuai Melayu nya tadi. Laban ke enda nemu jaku Iban diau tuai Melayu nya ngmbai tuai Iban nanya ari ni penatai, iya madahka ari laut. Berengkah ari nya, dia Iban ngumbai Melayu tu Laut dataika sehari tu. Taja pia kemaya tu udah mayuh orang bansa Iban ke ngena Melayu.
Karang sekali tu nguji ngenangka pekara ke suah nyaru penemu bala Iban kelebih agi bala nembiak rebak baru. Baka reti guna leka jaku laut anang saru enggau 'tasik'. Tasik ba jaku Iban tu Laut ba jaku Melayu. Lalu munyi laut ba Iban nya reti iya jaku Melayu.
Guna leka jaku Laut ke salah.
1. Datai kami di Pantai Damai, kami lalu terus mandi ai laut. (niki ke rumah sida lalu mandi)
2. Udah nya kami lalu bekayak ngelingi laut.(sida duduk ba tengah, kitai kayak2 ngelingi sida)
3. Kami makai pemakai laut ke diambi ari laut.(makai utai diempa sida/diambi ari sida)
Ayat di atas patut ditukar munyi tu:
1. Datai di pantai Damai kami lalu mandi ai tasik.
2. Udah nya kami bekayuh ngena kayak ba tasik.
3. Kami makai pemakai ari tasik baka undang, ketam enggau ikan ke ditangkap ba tasik.
Guna leka jaku Laut ke betul
1. Sida ke bejual buntal nya bansa Laut (Melayu) ari Spaoh.
2. Pengetua kami tu bansa Laut (Melayu) ke datai ari Sibu.
3. Mayuh bendar sida Laut (Melayu) nurun nangga haji ngena kapal ari Kuching.
Taja pia nadai salah mega kitai ngena leka jaku Melayu nitihka pemansang kemaya hari tu. Tuju pekara tu ditu dikenang laban enggaika nembiak nulis lalu ngena leka jaku laut baka ba chunto di atas tadi. Nya mih penanggul nembiak ke ngambi mata pelajar Bahasa Iban laban terunda-runda nitih leka jaku ke tebalan agi dikena sida. Nya alai nyadika tanggung pengawa bala pengajar madah penyalah nya ngagai nembiak. Pengawa raban bala pengajar mantaika hal tu ba sekeda laman web endang manah laban iya meri peluang ngagai nembiak ke bisi macha laman web beratika penyalah ti digaga bala nembiak bukai.
Endang patut nembiak ngena leka jaku Melayu lebuh sida nulis dalam Jaku Iban senentang bansa Melayu laban nya endang leka jaku ti dikena kemaya hari tu. Leka jaku tu nadai tentu nyadi isu semina sida selalu saru selalu kaju lebuh nyebut tasik (laut) lalu danau (tasek). Tu mih pengawa pengajar.
Leka jaku 'laut' dikena ngumbai orang Melayu semina dikena ba beberapa buah endur aja di Sarawak. Orang kilah ke pelilih menua Kuching, Sri Aman enggau Betong ke suah agi ngena leka jaku tu.
Sama mega enggau leka jaku Dayak. Suah agi orang ba menua pesisir endang ngena leka jaku Dayak dikena sida ngumbai orang Iban. Ba penemu aku pekara tu ulih diubah di sekula lalu dituju ngagai bala nembiak rebak baru.
Seraya enggau nya mega leka jaku iban ba sesetengah menua dikena nyebut reti orang. Uji peratika chunto tu; Mayuh amat iban ba pasar Satok sehari tu. Bala nembiak Iban ari pelilih menua Sri Aman, Kuching enggau Samarahan enda nemu reti nya enti sida nadai kala begulai enggau orang Iban ari Batang Rajang. Sida ngena leka jaku orang dikena nganti leka jaku iban.
Uji peratika leka jaku "iban" nitihka pengingat Pengajar Richard Boon lebuh iya ke ngajar ba menua Song urung taun 1987-89. ‘Benung aku enggau bala nembiak sekula meda TV lemai siti, enda mukai-mukai TV bisi penanggul - ngenyit padam. Dia bala nembiak lalu ngerara TV nya,’ ku Pengajara Richard.
‘Apu!! Agi ka meda bala iban nya tadi...,’ku nembiak iya.
‘Ess! Nadai iban dia tadi,’ ku Pengajar Richard jampat nimbal sida.
‘Saru, cikgu. Ukai iban. (Tang) orang, cikgu,’ pia ku siku ari bala nembiak dia nerang ngagai iya.
Belabuh ari lemai nya, Pengajar Richard ngelala leka jaku iban ti mai reti "orang" tauka "mensia" baka kitai tu, enda milih sapa-sapa (bansa, jalai pengarap, chura kulit, etb... )
Nitihka Pengajar Timothy Salang, leka jaku Iban tu endang leka jaku lama ke endang dikena ari kelia. Kemaya hari tu semina dikena kena nunjukka bansa Iban. Taja pia enti ke menua Batang Rajang, agi bisi orang ke ngena leka jaku iban tu. Uji peratika reti leka jaku iban ba chunto di baruh tu:
1) Semina kami ke manang aja ulih meda enggau nangkap semengat, kita ke iban enda.
2) Mayuh bendar iban di pasar seharitu tadi. Chukup bansa, bisi China, India, Laut enggau ke bukai.
3) Nama tak nadai mayuh iban ba Kampung Hulu nya. Kini ke penunga bala sida?
(a)Ayat lumur 1 mai reti, semina sida manang aja ulih nangkap enggau medea semengat, kitai ke rama tu enda ulih.
(b)Ayat lumur 2 mai reti pupu raban bansa.
(c)Ayat lumur 3 mai reti nadai tentu mayuh orang.
Nya mih pekara ke dikenangka pengarang sekali tu iya nya senentang leka jaku laut, dayak enggau iban. Pengarang ngarapka raban pemancha ke bisi saru, bisi kaju senentang pekara nya bisi teulihka penemu ari kenang tu.
(Diambi sereta dibali ari http://forum.engkabang.net/)
Tiada ulasan:
Catat Ulasan