Budaya nya pemansang chara
bepikir enggau chara idup ti udah maju. Nitihka Koentjaraningrat (1970) madahka
budaya nya asal iya ari leka jaku Sanskrit ‘budhayah’ , ti diambi ari leka jaku
‘buddhi’ ti mai reti budi tauka akal runding. Budaya tau mega mai reti pekara
ti bisi kaul engggau akal runding lalu tau mega dikumbai semua pekara ti bekaul
enggau ulah enggau asil ulah mensia ti teratur nitihka atur ulah dikeulih
nengah chara belajar.
Taylor (1871) madahka
reti budaya nya siti sistem kompleks ti ngundan penemu, pengarap, seni, ulah, undang-undang,
adat sereta pengawa bukai ti diulihka
mensia dalam raban komuniti iya.
Budaya nya siti chara
idup ti dinamik diwariska sesebengkah komuniti. Reti nya dalam budaya bisi
elemen nerima enggau nyakal pengawa tauka pekara ti digaga sesebengkah komuniti
dalam sebengkah pengidup ti mungkur penemu, pengarap, seni, adat,
undang-undang, ekonomi enggau sistem simbol ti diempu semua dalam raban nya.
Budaya mega chara
pengidup ti silik seraban mensia. Dalam budaya, mayuh aspek mit ti disebut
tauka diserara dikena mansik mensia senentang sistem politik, ekonomi,
pengarap. Reti budaya nya semua sistem mensia ti enda kediri tang ngembuan
kaul.
Budaya raban bansa
Iban seruran mansang sereta dinamik ti mungkur chara mensia berinteraksyen baik
nya entara mensia enggau mensia, mensia enggau rampa menua tauka mensia enggau
kuasa empelias tauka kuasa ti enda ulih dipeda. Budaya raban bansa Iban udah
lama pegari baik nya ba mua komuniti menua Sarawak tauka komuniti menua luar.
Dulu kelia, raban
bansa Iban balat agi dikumbai Sea Dayak tauka Dayak Laut. Tang enti dipansik,
raban bansa tu jarang amat ke diau ba menua ili tauka tebing tasik. Raban bansa
Iban nya peranak tetap ke diau mendam ba rumah panjai di menua pesisir Sarawak.
Nadai enda orang nemu rumah panjai Iban nya beramuka kayu tebelian ti bekualiti
tinggi sereta tan lama. Nya alai enda alit ati enti agi bisi rumah panjai raban
bansa Iban ke beumur 90 taun sereta gi tegap.
Atur digaga dikena
nentuka chara ulah ti ulih diterima komuniti. Pengidup bemalinka adat asal,
tradisyen sereta pekara-pekara selama ti udah diterima bala mayuh. Tuju atur tu
dikena nyaga, nusun atur ulah tiap-tiap anak buah ba rumah panjai. Adat asal
rumah panjai dipegai tuai rumah dikena nanggam pendiau enggau ulah begulai
enggau diri sama diri awakka mai penyelap, pengerai enggau pengelantang ke diri
serumah. Tuai Rumah nya mih tuai ke megai rumah panjai sereta mutar tiap-tiap
penanggul ba rumah panjai nya.
Gaya ulah ti diterima
komuniti nya nyadika malin ti mesti dititih ngambika ukum ulih diletak ngagai
pengawa ti bisi ngelanggar atur sereta adat berumah panjai. Nya alai sapa-sapa
anak nembiak ke enda nitihka atur sereta adat tau ditinggang ukum tauka
ditunggu nitihka pemesai siti-siti penyalah lalu ukum suah agi dibayar ngena
tajau. Semua atur ngembuan ukum nitihka ti udah diletak dalam tusun tunggu lalu
suah agi bepanggai ba atur logik tauka enda.
Nilai enggau norma
sereta pengarap mega bekaul enggau budaya. Pengawa enggau pengarap suah nguing
runding sereta ulah raban bansa Iban ti ngasilka peneleba lalu iya diterima
nyadika penemu. Nya alai dalam raban bansa Iban, gaya ulah amat dikemeratka.
Nya mih kebuah, gaya
ulah siku-siku orang nya diperatika belalauka definisyen individu dalam
komuniti nya bepelasarka adat asal ke udah nya ngeletakka ukum ti patut
diterima orang nya.
Kereban budaya nya
kereban tauka utai bukai ke diguna dalam pengidup raban bansa Iban. Kereban tu ti
diempu tauka ditengkebang sereta ngembuan reti
iya empu lalu ulih nyadika simbol dalam pengawa selama tauka ritual lalu
kadang-kadang iya ngembuan tikas etika ti tinggi.
Nitiha Noria (2011)
budaya raban bansa Iban ulih dikategorika ngagai dua bengkah, iya nya:-
Budaya Artifak
Budaya artifak tauka
budaya kereban nya mungkur rampa ti besai laban iya nyengkaum kereban-kereban
fizikal. Kereban tu ngembuan komponen ti chukup senentang aspek chara tauka
jalai ngena iya. Pekara tu udah lama diwaris raban bansa Iban ari peturun aki
ini kelia laban iya nyereminka identiti tauka pengelala bansa sereta angkatka
komuniti Iban nyadi komuniti ti pegari nama tampak rita.
Utai ti dikumbai
budaya artifak nya nyengkaum nama-nama utai tauka objek ti ditengkebang mensia.
Ambika banding baka kereban seni, senyata dikena ngasu baka peti tauka panjuk,
tukuh rumah, tekstil baka pua kumbu, kereban dikena nyumai baka periuk-genuk, enggau
utai ti bukai.
Enggau nya budaya
sesebengkah raban bansa nya ulih diperatika enggau terang ari sukut tikas sosio
fizikal raban bansa nya.
Budaya Mentifak
Budaya mentifak tauka
budaya ukai kereban dalam raban bansa Iban ulih ditimpai ari sekeda sukut. Budaya ke disebut nya semua sistem ti
ditengkebang nengah chara abstrak, spiritual enggau ritual.
Budaya mentifak tu
dipraktik sereta dipejalaika setipak enggau norma sida. Iya ulih diperatika
baka arap ke petara, arap ke utai mistik enggau penti pemali ti bisi ngelinggi
sida. Raban bansa Iban balat bepegai ba falsafah ukum adat asal dalam pengidup
sida. Tu ulih dipeda ari adat asal ti udah lama dikemeranka raban bansa tu.
Kelimpah ari nya, sida
udah ngaga adat dikena nyaga, nusun atur, nerima sereta nulak nilai-nilai
enggau norma ti belaban enggau atur gaya pendiau selama pengidup sida. Raban
bansa Iban endang tebilang enggau ulah ti ngemeratka adat basa enggau penyiru
ti udah dikemeranka serak ganti serak.
Pekara nya nyadi tegap
lebuh sida udah ngulumaika iya enggau idea sereta ideologi ti ulih diterima
komuniti bukai. Pemujur tu ketegal sida ngembuan penemu ti tinggi dalam aspek
tu. Penemu tu dikunsika sereta dikena enggau bala bukai dalam raban seraya ti
bejalaika tanggung pengawa ngagai diri sebilik, komuniti enggau bansa iya.
Budaya mentifak dalam
raban bansa Iban dianggap siti pesaka budaya ti beguna taja pan iya enda ulih
dipeda enggau nyata tang iya tetap dikemeratka. Tukuh budaya tu asil ari
runding enggau falsafah raban bansa Iban nya empu.
Besenutuk enggau nya
mega, struktur sosial raban bansa Iban ulih diperatika ari pengidup sida ba rumah panjai. Raban bansa Iban idup dalam
entiti ti pengabis tegap. Pekara tu ulih
dipeda lebuh sida ngayau kelia ngujungka sida digela pengasu pala mensia enggau
Bujang Berani Pulau Borneo.
Penyanding Penemu
Majlis
Adat Istiadat Sarawak. 1993. Adat Iban.
Kuching, Sarawak: Jabatan Ketua Menteri
Richards,
Anthony. ‘Iban Augury’. Sarawak Museum
Journal. Vol.XX, 1972
Tugang,
Noria, 2011. Tembikar Dalam Budaya Iban
Di Sarawak, UNIMAS, Universiti Malaysia Sarawak
manah amat tu kena kami ke nembiak benung ngambi kus bahasa iban ba ipg
BalasPadam