Polis Balat Agi Stres Ari Pengajar

Kereja mayuh sereta seruran gawa maya luar jam gawa tauka on call ngujungka mayuh raban polis berasai kena tekan tauka stres enti dibanding pengereja pengawa perintah ke bukai baka lutur, misi, pengajar tauka bomba.

Pemerat pengawa ti mayuh tu nyengkaum kereja lebih jam ke mesti digagaka sida ketegal ke enggau raban dalam operasyen. Pengawa tu suah bendar dikereja maya luar jam gawa iya nya entara jam 5 lemai datai ke 6 pagi.

Asil pansik Opis Pengerai Mensia Mayuh Pusat Berubat Universiti Kebangsaan Malaysia (PPUKM) madahka responden ngasaika diri ditekan lebuh dianjung nyaga pengelikun ba sesebengkah endur, lalu maya diasuh enggau raban penyaga pengelikun ke menua tasik tauka seruran diasuh gawa maya kemisi rama nyengkaum musin pengerami.

Pansik ti dipejalaika dalam taun 2007 nyentuk ke 2009 madahka 53.7% ari 453 sampel pansik ba enam buah balai polis di Wilayah Persekutuan ditemu bisi stres ba tempat kereja. Penyampau tu mandangka polis diau ba penuduk  ke pengabis atas ngalahka enam agi gerempung bukai baka bomba (4.3%), pengajar (45.8%), misi (42.3%) sereta lutur (40.7%).

Asil pansik nya mega mandangka 61.1% raban polis ke bepangkat sarjan ke atas balat agi stres enti dibandingka enggau raban bepangkat baruh iya nya baka koperal (56%) enggau konstabel (51.3%).

Datuk Akhbar Satar, iya nya orang ke landik dalam kriminologi sereta mega penganalisis jenayah madahka stres ke diidapka raban polis nya bepun ari tiga faktor iya nya profesion polis nya empu, atur tauka polis dalam gerempung polis sereta penanggul ke dikembuanka individu.

Bekereja nadai tentu jam tauka 24 jam sehari begulai enggau on call sebarang maya, kelimpah ari ke enda tau enda nitihka perintah orang ke tinggi tau bendar ngeruga pengerai sereta pengidup raban polis. Nambahka nya, sesetengah kes ti ditasatka sida baka kes bunuh tauka iya ke bisi marit orang ke bisi kuasa kadang-kadang tau bendar ngasuh sida berasai kena tekan sereta mega nerima risiko digapka orang jai ukai semina ngagai diri empu tang mega ngagai sida sebilik.

Akhbar madahka, raban polis ke ngembuan stres tau teulihka penanggul penyakit mental ngujungka mayuh pekara ke enda tentu dikerindu nyadi nyengkaum munuh pangan diri, munuh diri sereta salah guna kuasa ngujungka nyawa orang bukai tau bebadi. Besenutuka enggau nya mega, enti sema tikas stres nya nyau datai ba taka kritikal, senyata ke dikembuanka sida ulih nyadika kereban dikena bejalaika pengawa jai nyengkaum pengawa makai suap.

Taja pia, ku iya, stres dalam pengawa polis nyadi ketegal sida suah dilabel orang ke suah makai suap enggau peragam ti negatif mensia mayuh nuju sida. Taja pan sida bejalaika pengawa tang orang ke nuduh raban polis nya korup endang enda amat laban sida ke bisi ditemu bejalaika pengawa jai tu semina mimit amat. Di Malaysia, mensia mayuh jarang amat muji polis taja pan sida mih ke nyaga pengelikun  ti ngasuh kitai ulih mindah kin kitu. Enti dibandingka enggau di Amerika Syarikat, iya enda sama baka ke diasaika raban polis di menua kitai.

Taja pan bisi jenayah mengga mit ke nyadi ba menua kitai, tang ari sukut penyampau penusah tu agi ulih dijaga ari majak nyadi ketegal pengawa nginau ke dipejalaika polis ba mayuh tempat ke bisi orang jai munyi ku Akbar ke kala diau dua taun di Detroit, Amerika Syarikat, iya nya bandar ke ngembuan penyampau kes jenayah ke pengabis tinggi di menua nya. – Berita Harian