Keretas Kereja: Konsep Baru Pemansang Rumah Panjai Ba Sarawak

KERTAS KERJA KONSEP BARU PEMBANGUNAN RUMAH PANJANG

DI SARAWAK: STATUS TANAH, URUSNIAGA, PENGUKURAN DAN

PENGELUARAN SURAT HAKMILIK TANAH.

1.            JAKU PEMUKA

Kenyau ari jeman kelia raban bansa Dayak lebih agi Iban endang diau ngentap kediri ba rumah panjai. Rumah panjai tu siti genturung pendiau ke alai bilik orang siku-siku tauka sepintu betampung panjai enggau pangan diri, enda nyalah-nyalah baka rumah teres ke digaga di nengeri. Penyelai rumah panjai enti dibandingka enggau rumah teres, iya bisi endur ke meruan laiu nyadi siti ari identiti rumah panjai iya nya baka ruai enggau payung rumah.

Dalam tiga iti kereja jurai pasal tanah ke udah diatur di zon selatan (Kuching , Samarahan, Sri Aman enggau Betong), zon tengah (Sibu, Sarikei enggau Kapit) enggau zon utara (Miri, Bintulu enggau Limbang) dalam taun 2009 enggau kereja jurai ke bukai ke dulu agi ari nya, dia siti ari penemu ke udah dipesetujuka bala ke bisi enggau ngulu kereja jurai tu iya nya minta rumah panjai disukat lalu dikeluarka enggau pala tanah tauka geran. Taja pia dalam kereja jurai nya kitai nadai berandau tauka bekenangka penguntung enggau penanggul ke tau datai ti sema rumah panjai disukat lalu dikeluarka pala tanah. Kitai mega nadai ngenang baka ni chara ke manah dikena bejalaika atur tu enti sema nyau datai maya kitai nyukat rumah panjai ila, sekali ke disengkaum begulai tauka disukat nitih ke bilik siku-siku tauka sepintu ba sesebuah rumah panjai ti deka disukat.

Nya alai dalam kereja jurai ke sekali tu, kitai patut berandau lalu mutuska penemu bagi nama utai ke amat dikedeka ke raban bansa Dayak ke agi berumah panjai ngambika atur enggau chara bejalaika pengawa tu ila ulih diaduka enggau manah sereta mujur. Enti sema kereja jurai kitai ke sekali tu mutus ke penemu deka nyukat lalu ngeluarka pala tanah, nyadi penemu tauka utai ti deka dikenang aku dalam kertas kereja tu iya nya deka bekunsi enggau semua kitai ke bisi ngulu kereja jurai tu senentang perkara ke tau nyadika lalau, atur enggau chara kitai ngadu sereta bejalaika pengawa lebuh nyau datai maya kitai ke nyukat lalu ngeluarka pala tanah ngagai rumah panjai ke patut ba menua kitai.

2.         TUJU TAUKA JULUK ATI KERTAS KEREJA

Munyi ke udah disebut di atas nya tadi, enti nyema kereja jurai ke sekali tu mutuska penemu deka nyukat lalu ngeluarka pala tanah ngagai rumah panjai, nyadi tuju tauka juluk ati kertas kereja tu iya nya:

Deka meri penerang enggau bejuraika atur sereta chara ti deka dititih lebuh maya kitai nyukat lalu ngeluarka pala tanah ngagai rumah panjai di Sarawak. Enggau penerang sereta penemu ke dipekunsika kitai ditu, kitai bisi bendar pengarap ke "konsep baru" pemansang rumah panjai ti deka dipejalaika perintah tau mujur sereta nguntungka mensia mayuh.

3.         TANAH RUMAH PANJAI KE TAU DISUKAT LALU BANSA PALA TANAH TI DEKA DIKELUARKA

3.1       Tanah Adat Bansa Asal (NCR)

Iya ke bendar reti tanah bansa asal tu udah suah dikenang lalu udah dipejuraika enggau silik dalam randau tauka kereja jurai tanah sebedau tu lalu asai ke enda patut aku nandu nya baru. Asai ke umbas enti semina ngenang ngena jaku pandak nama utai ti dikumbai kitai tanah adat bansa asal nitihka reti ke bisi dikenang ba genteran 2 (Section 2) Undang-undang Tanah Nengeri Sarawak (Sarawak Land Code, Cap. 81, 1957) ke munyi tu :

(i)            Tanah ke udah dikereja lalu dikembuan orang siku-siku tauka peturun iya nitih ke adat bansa asal enggau jalai pengidup raban bansa iya sebedau 1.1.1958 lalu agi meruan datai kediatu.

(ii)           Tanah ke digalau tauka di "rizab" nitihka genteran 6 Undang-undang Tanah Nengeri Sarawak.

(iii)          Tanah di menua ulu ke alai adat bansa asal udah dikelala lalu udah dikembuan tauka dipenyadi lalu diberi permit nitih ke genteran 10".

Tanah ti bansa tu enda tau enda ditentu ke Opis Tanah enggau Penyukat (Jabatan Tanah dan Survei Sarawak) dulu dikena nentuka iya endang amat tanah bansa asal.   Pansik dikena nentu ke tanah tu amat tanah bansa asal deka dipejalaika nitih ke pelasar undang-undang ke seruran dikena Opis Tanah enggau Penyukat Sarawak.

Kelimpah ari tanah nya ke udah ditentu ke bisi tanah bansa asal, Tuai Rumah mega dipinta nentu tauka netapka tanah nya endang amat tanah orang ke ngambu nya tadi. Tu dikena nyeliah ke penyarut enggau penusah ari ke nyadi jemah ila.

Bansa Pala Tanah Ti Dikeluarka

Sebarang tanah ti udah ditentuka bisi tanah bansa asal ti nyema disukat deka dikeluarka enggau pala tanah nitihka genteran 18. Pemanah pala tanah ke bansa tu, orang ke bempu tanah tu enda dipinta mayar sebarang ungkus, baka bayar nyukat, nadai premium, nadai chukai tauka bayar bukai. Iya deka nyadi tanah bebayar enti nyema orang ke bempu iya nyual ngagai orang ke, ukai peturun iya tauka diri sebilik. Siti agi pemanah pala tanah ke bansa tu iya nya iya nadai timpuh mati (perpetuity), reti nya iya deka semampai laku belama-Iama iya.

3.2       Tanah Rezab Bansa Asal (Native Communal Reserve)

Tanah ke dikumbai tanah rezab bansa asal tu iya nya tanah ke udah ditetapka munyi ba genteran 6 Undang-undang Tanah Nengeri Sarawak ke alai :

(i)            Menteri tau netapka (declare) sebarang tanah perintah nyadi Tanah Rezab

Bansa Asal,

•       Dikena raban bansa asal ke ngembuan adat enggau chara idup ke sebaka.

•     Undang-undang enggau adat siti-siti raban bansa nya bisi besangkut paut enggau ngulihka tanah, mindahka tanah tauka kuasa iya ba tanah nya   nyengkaum rumah tauka sebarang kerangka ke bisi ba tanah nya.

(ii)           Tanah ke udah ditetap ke nyadi tanah rezab bansa asal (Native Communal Reserve) deka dijaga sereta dikemata ke nitihka undang-undang tauka adat siti-siti raban bansa nitih ke guna ke udah ditetapka.

Sebarang tanah rezab tauka tanah galau bansa asal tu iya nya tanah ke udah digazet perintah nyadi tanah ke genturung tanah rumah panjai tauka siti-siti genturung rumah ke udah lama diwan deka diperunding lalu tau disukat ngambika ulih dikeluarka enggau pala tanah. Bansa tanah nya (status) pan deka dipansik Opis Tanah enggau Penyukat lalu sapa orang ke bempu ambu dia deka ditetapka Tuai Rumah tauka Tuai Raban Bansa ba menua nya. Ti sema tanah tu udah kala digazet nyadi ke tanah rezab tauka tanah galau bansa asal, dia iya patut dikeluarka dulu ari gazet, udah nya baru pala tanah ulih dikeluar ngagai lot tauka pintu bilik ke udah disukat tadi.

Bansa Pala Tanah Ti Deka Dikeluarka

Tanah ke bansa tu sama deka dikeluarka enggau pala tanah nitih ke genteran 18 Undang-undang Tanah Nengeri Sarawak baka tanah bansa asal ke bukai.

3.3       Berumah Di Tanah Perintah (Encumbered State Land)

Tanah perintah iyanya tanah ke ukai diempu orang siku-siku lalu ukai mega tanah ke dikumbai kitai tanah bansa asal (NCR) munyi ke udah diterang ke dulu agi ari tu tadi.

Di serata Sarawak bisi mega genturung rumah panjai ke digaga ba atas tanah perintah tang udah lama diwan sesebengkah raban bansa. Enti nyema perintah ngemendarka genturung rumah panjai ti baka tu disukat lalu dikeluarae enggau pala tanah, bansa pala tanah ti dikeluar iya nya nitihka genteran 13. Pala Tanah ke bansa tu semina bisi timpuh idup ke semina 60 taun aja ti dibandingka enggau pala tanah bansa asal ke nadai timpuh mati. Kelimpah ari nya, dia pala tanah genteran 13 tu deka bisi bayar premium, chukai tanah, bayar nyukat enggau tanda belian sereta bayar nyendiaka pala tanah.

Taja pia bayar premium tu tau dibayar pupuk datai ke 10 taun lalu deka bisi pemendar ari Opis Tanah enggau Penyukat. Laban pala tanah tu ke semina 60 taun, ti sema timpuh nyau deka abis dia iya tau digaga lalu ditampung baru sebarang maya udah ke nerima peminta ari orang ke bempu tanah tu.

3.4       Tanah Ke Bisi Pala (Alienated Land)

Bisi mega sekeda rumah panjai ke digaga di atas sebidang tanah ke diempu orang siku-siku ke endang udah bisi pala tanah. Ambika banding, enti sema rumah panjai ti baka tu deka dikeluarka enggau pala tanah ke tiap pintu bilik, dia orang ke empu tanah  tu tadi deka dipinta ngenataika peminta iya dikena magi (subdivision) tanah ke besai nya tadi lalu nukar guna iya ari tanah kebun ke tanah endur berumah.

Peminta ti baka tu patut dikenataika ngagai Opis Tanah enggau Penyukat ba bagi menua ke deka alai kita diau. Peminta tu tadi deka dianjung ngagai Majlis Perancang Negeri (SPA) mansa indu opis Tanah enggau Penyukat. Tu nya siti ari atur ke enda tau enda dipejalai ke nitih ke bagi X Undang-undang Tanah Nengeri Sarawak.

Tanah ti bansa tu deka bisi dipinta mayar premium tambah (enhance premium) iya nya bayar ke guna tanah ari kelas guna tanah ari guna ke baruh ngagai ke tinggi agi, dalam chunto ditu tadi, ari tanah kebun tauka umai ngagai tanah endur berumah.

Enti tanah tu udah dibagi tauka dipechah, dia lot tu tadi deka dipindah ngagai siku-siku orang ke bempu pintu bilik nitih ba ambu diri empu.

Chara Bukai

Kelimpah ke ari ngenataika peminta baka ke ba atas nya tadi, orang ke bempu. tanah ke alai berumah panjai tu tadi tau nyerahka tanah iya ngagai perintah enggau nadai bebayar. Udah nya tanah tu deka disukat nitihka pintu bilik orang ba rumah nya lalu dikeluar ke enggau pala tanah nitihka genteran 13 lalu bisi deka bebayar chukai tanah.

4.         ATUR KE PATUT DITITIHKA MAYA NYUKAT ENGGAU NGELUAR KE PALA TANAH

Munyi ke udah diperambu lalu udah dikenang di atas nya tadi, rumah panjai deka disukat lalu dikeluarka enggau pala tanah ke tiap iti pintu bilik, nya pan enti sema kereja jurai (seminar) tu sama bela besetuju enggau penemu tu. Tu nya tadi beguna bendar enti nyema ke bala kitai deka beguna ke pinjau mata duit (loan) ari Opis Pemansang Berumah (Suruhanjaya Pembangunan Perumahan) tauka ari gerempung penyali duit bukai baka bank ke ngati kediri.

Siti agi atur ke patut dititih ke sebedau sesebuah rumah panjai nya disukat iya nya, rumah nya nadai penyarut ba entara enggau rumah panjai bukai tauka charut antara anakbiak dalam rumah panjai nya empu. Lebuh ke disukat dia sukat nya deka bejarit lalu nadai orang ba sebentang rumah panjai nya minta kelaung ketegal ke enda besetuju enggau atur tu.

Kelimpah ari nya dia tanah rumah panjai tu udah ditetapka enda diguna kena ngaga pemansang perintah ke bukai lalu di luar ari sebarang tanah rizab tauka tanah galau perintah baka rezab kampong, rizab nyimpan ai, rizab jalai, sungai tauka tanah galau ke bukai ke udah dikemendarka perintah.

Diperambu mega ngambika tanah ti deka disukatka tanah rumah tu ila dipasukka nyadi tanah dalam genturung tanah bansa asal (Native Area Land) dikena nyaga pendiau raban bansa ti nguan rumah panjai nya. Atur tau mega dipasukka ngambika tanah ke udah disukat lalu dikeluarka pala tanah tu semina tau diempu tauka dipindah ngagai orang bukai ke sama raban bansa ke nitih ke adat enggau chara pengidup ke sebaka enggau pangan diri baka ke dikelala Majlis Adat Istiadat. Ambi ke chunto, bilik dalam rumah panjai Iban semina tau dipindah tauka dijual ngagai raban bansa Iban aja.

5.         ATUR NYUKAT

Sukat bilik ba rumah panjai deka nitihka pemesai tauka buka siti-siti bilik nyengkaum ruai, enda nyenyalah baka rumah kedai ke terus ngagai kaki lima. Sukat tu deka naka pengujung tiang rumah aja lalu tanah ke ngelingi rumah deka disukat nyadika payung rumah. Tanah ke alai rumah dikeluarka enggau pala tanah siti sepintu lalu tanah payung rumah deka digagaka nyadi tanah galau (Native Communal Reserve) payung rumah. Pemesai tanah payung rumah ke sebaka deka nitihka atur ti deka ditentuka Majlis Adat Istiadat bechuanka adat siti-siti raban bansa.

6.         NAMA KEBUAH NYUKAT LALU NGELUARKA PALA TANAH

Atur enggau perambu ti deka nyukat lalu ngeluarka pala tanah ke tanah rumah panjai tu deka dikena bejalaika konsep tauka chara baru ngemansangka rumah panjai ke diaduka perintah mansa Opis Pemansang Berumah (Suruhanjaya Pembangunan Perumahan). Enti tanah tu udah disukat, dia perintah deka bejalaika tulung dikena ngulihka jali duit tauka pinjau dikena ngaga tauka nyeruri rumah panjai. Tu mega deka ngemudahka orang ngadai pala tanah sida dikena ngulihka jali duit ke diguna ari Opis Pemansang Berumah tauka bank ke ngati kediri.

Kelimpah ari nya dia penyarut antara diri sama diri senentang tanah deka nyamai agi diputar laban ke bisi pala lalu deka likun agi. Pala tanah ulih nunjukka rekod sapa ke bempu tanah tauka siti-siti pintu bilik lalu nyamai deka ngaduka "surat kuasa" (transmission) ti bisi pemati, ti deka mindahka nama pengempu tanah, nginjau duit (loan), nyewa enggau perkara bukai.

Tambah mega tu tau mantu sida ke dipadu ke ngemata ke pemansang enggau pengelikun rumah panjai(JKKK) ti sema deka merambu pemansang baka minta projek ari perintah tauka agensi bukai.

7.         JUAL BELI TANAH RUMAH PANJAI

Jual beli tanah rumah panjai ti deka dikeluarka enggau pala tanah ulih ditagang tauka diperatika enggau bejalai ke atur ke ngengkah ke sekat ba pala tanah nya, empu. Ambika banding enti sema orang ke bempu tanah nya deka nyual, ngadai tauka nyewa ngagai orang bukai, dia sida deka diasuh minta pemendar dulu ari perintah baka Opis Tanah enggau Penyukat tauka opis bukai. Atur ti baka tu nya endang kena perintah nyaga kuasa enggau ambu siti-siti raban bansa tauka orang siku-siku.

Kelimpah ari nya perintah mega tau bejalaika atur netap ke sebarang jual beli tu semina antara raban bansa ke sebaka, baka Iban nyual ngagai Iban lalu enda tau ngagai raban bansa bukai nitihka penetap ke udah dipejalai ke Majlis Adat Istiadat Sarawak. Perkara ti baka tu patut di pejurai ke enggau dalam ba kereja jurai ke sekali tu ngambika ke kitai tau bulih siti penemu enggau jaku penetap ke tau nyadika lalau enggau pelasar lebuh nyau datai maya kitai ngaduka pengawa ke nyukat tanah rumah panjai ila.

8.         PENGUJUNG JAKU

Semua kitai patut udah bisi gambar dalam ati diri baka ni atur tu deka dipejalai enti tu ti dikedeka ke kitai ke ngemeranka rumah panjai. Sebarang anak penemu ke dibantai ke dalam kertas kereja tu ukai pemutus penemu kepenudi, tang semina dikena muka runding bala ke bisi ngulu kereja jurai tu. Semua bala ke bisi ditu dipinta berandau ke utai ke udah dipejurai enggau silik sereta meri penemu diri ngambika kitai ulih ngalus sereta ngelurus ke iya lalu besetuju enggau siti penemu ke tau nyadi ke pelasar enggau lalau perintah sebedau ngaga sebarang penetap udah tu ila. Lebuh ke berandau dia kita enda patut melakangka sebarang penetap ba Undang-undang Tanah Nengeri Sarawak enggau adat sereta chara pengidup siti-siti raban bansa. Ba ujung ari, dia kitai ngarap kediri ulih ngaduka utai ti dikedeka ke bala mayuh enggau alus sereta mujur ngambika tau nguntung. ke anak biak enggau raban bansa kitai empu awak ke sama mansang lalu setipak enggau bansa bukai ba semua pengawa.

Penyanding penemu:

Kertas Kerja Konsep:  Konsep Baru Pembangunan Rumah Panjang Di Sarawak, Anthony Abol, Pegawai Tadbir Tanah, Jabatan Tanah dan Survei, Kuching 2010.