Ngerembaika budaya macha

NEMU KITA budaya macha ba menua kitai agi ba tikas baruh ketegal faktor kos daya idup ti tinggi sereta rega bup ti mar?

Tu mih pekara ti bekaul rapit enggau hal survival ke alai Malaysia tu dikumbai menua ti benung mansang lalu rayat iya patut bekereja bebendar dikena napi pengidup besehari sehari ngujungka sida nadai duit dikena bebelika kereban bacha ti mega mar rega.  Bisi nya  mega ngembuan dua bengkah pengawa dikena nampung penatai pemisi. Sida ti baka tu endang udah tentu nadai awak dikena sida macha.Maya peremisi sida tentu ngisika hari sida enggau program pemerindang enggau diri tauka semina belelak udah ti bebendar gawa.

Pengidup kemaya hari tu begunaka tulang kedua-dua melaki bini bekereja ngujungka sida nadai awak narak bala anak ngambika rindu macha. Enti nitihka pelajar, budaya macha tu patut dichemai kenyau sida agi mit.

Nitihka pansik tikas macha orang Malaysia bepanggai bendar ba penatai pemisi tiap-tiap pintu bilik. Enti penatai pemisi sida baruh dia tikas macha mega baruh laban kurang perangsang ngasuh bala diri sebilik macha. Kebuah pia laban sida nadai daya meli mayuh bup laban gaji balat agi diagih ke guna pengidup besehari-sehari sereta mega kos pelajar bala anak.

Anak-anak ke kurang diperansang enggau pengawa macha bup kelimpah ari bup teks sekula ngujungka sida kurang bepenemu sentang mayuh pekara kelebih agi ti bisi kaul enggau pemansang dunya luar.

Nambahka nya mega, palan macha baka librari ba menua kitai agi bedau datai ba tikas ti ulih narit pengerindu raban nembiak redak macha laban bup ti bisi ba librari nya semua ke ‘beberat’ magang.

Macha ukai semina bup akedemik aja, tang mega bup ti tau ngerindangka ati baka  majalah tauka novel. Bup ti baka tu ulih narit ati orang deka macha tang mih tu ke enda tentu bisi disediaka ba librari kitai.

Enti kitai ngambi chunto librari di Singapore jauh bebida laban librari dia bisi nyediaka kereban bacha ti baru. Pengereja pengawa ba librari nya seruran ngaga penasik sentang bup tauka novel ti baru, enti sema iya diterima mayuh sida deka ngemayuhka agi kuantiti bup nya. Enti bup nya udah enda dibacha orang agi, dia sida deka nyual bup nya nengah chara lilung. Ninting taun librari Singapore deka ngaturka program jual murah ngagai bup-bup ke lama-lama. Enggau chara tu, rakyat Singapore balat agi tebuka runding sereta nemu pemansang baru. Tu mih ke patut nyadika chunto menua kitai.

Enti rega bup agi mar dia pengawa meransang rayat Malaysia macha enda tentu ulih dikerembaika.. Pengawa tu tau puntan baka menasan jalai jelu, labah baka buah merunjau ulu. Belalauka pansik ti udah dipejalaika madahka enti penanggul rega bup ti mar enda diputarka dia pengawa ti deka meransangka budaya macha tu enda ulih dikerembaika enggau manah.