Lalau Guan Eng nuju kepala menteri Sarawak baru

Kepala Menteri Pulau Pinang, Lim Guan Eng  bisi bendar pengarap ke tawing baru ari Sarawak, Tan Sri Adenan Satem ke ku iya ulih mai ubah pemansang ti manah agi.

Lim madahka tiga pekara ti ulih dikerejaka Adenan, siti ari nya minta perintah besai mayar royalti minyak enggau gis ke  tinggi agi.

"Nikika bayar royalti ari 5% ke 20% deka mantu Sarawak ngembuan jalai raya enggau infrastruktur ti manah agi baka ke ba Semenanjung Malaysia," ku iya.

Adenan, 70, sebedau tu kala nyadi menteri tugas-tugas khas Sarawak, besumpah mangku pengawa nyadi kepala menteri Sarawak kelima ba mua Yang Dipertua Negeri ke lama, Tun Abang Muhammad Salahuddin Barieng di Astana Sarawak di Kuching.

Iya ngantikan Taib ke udah nya besumpah nyadi Yang Dipertua baru, udah ti mangku pengawa nyadi kepala menteri sepengelama lebih tiga dekad.

Kelimpah ari royalti minyak, Lim mega minta Adenan nentuka BN ngamatka manifesto pengawa bepilih ti udah  lalu iya nya nyemakaka rega barang enggau servis entara Semenanjung, Sabah enggau Sarawak.

Lim madahka enda rentang enti udah setaun BN besemaya tang rayat Sarawak agi mayar rega ti tinggi agi enti dibanding enggau rayat ba Semenanjung Malaysia.

Iya nambahka jaku iya madahka naka penyinu enti semaya BN dalam manifesto taun nyin kemari iya nya "Satu Malaysia, Satu Harga" semina semaya baka kepayang ngadaka dilah.

Pengari Parlimen Bagan nya mega minta Adenan munaska penyeranta rayat di Sarawak, iya nya nengeri ketiga pengabis miskin di Malaysia.

"Mayuh ari bala peranak menua enda ngasaika ai paip, elektrik enggau servis sentang pengerai.

"Taja pan Sarawak nengeri kedua ngembuan Keluaran Dalam Negara Kasar (KDNK) per kapita ti tinggi di Malaysia iya nya RM33,000, tang Buletin Statisitik Sosial ngerekodka Sarawak semina bisi 7 klinik desa enti dibandingka  212 servis pengerai ke udah disediaka perintah," ku iya.

Lim madahka Sarawak nya nengeri kedua tinggi ngembuan pengereja pengawa ti nadai pelajar formal nangkanka Sabah, iya nya kira-kira 22.6% ari semua pengereja pengawa ba nengeri tu.

Ku iya, Bank Dunia ngelaskaska 35.4% peranak di nengeri tu ngembuan pelajar tikas baruh ti dikira naka nemu macha.

"Enti Adenan ulih mutarka tiga pugu pekara nya di Sarawak, era perintah iya deka nyadi balat agi signifikan enti dibanding enggau sejarah kepala menteri ke udah-udah," ku iya. – The Malaysia Insider, 1 Mac, 2014.