Agi arapka dukun tusun kedua

Tabi pemacha. Betemu baru kitai dalam kenang pengarang sekali tu. Nyadi kenang pengarang sekali tu agi nampung buah runding senentang pengawa peranak menua Malaysia ke agi balat arapka dukun tauka manang. Nama kebuah cerita tu agi dikenang baru ba tusun kedua? Ukai pia, barang ku kita pemacha mih madah pengarang tu kiraka syok kediri empu. Enti asai enggai agi macha cherita tu nadai salah mega, enda ngasuh ati pengarang tu nyima. Cherita tu agi dikenang laban budaya peranak Malaysia agi mayuh ke arapka dukun enti bisi sesebengkah pekara nyelai nyadi ba pengiduo sida.

Pengawa Dukun Ibrahim besampi ngena ‘tikai terebai’ baka gaya Tan Sri P Ramlee dalam filem ‘Laksamana Do Re Mi’ nya ba penemu penulis ukai pengawa ti ngalitka ati laban nya mih realiti pengidup raban bansa Melayu, enda ngira sida nya ba nengeri tauka ba menua pesisir. Semina ti ngemidaka nya diatu nya serata komuniti dunya udah nemu.

Cherita tu disambung sereta dibantaika baru ba tusun kedua ukai madahka aku nyukung pengawa ti digaga dukun tu tadi tang semina deka bejuraika enggau lenak agi kaul dukun enggau realiti pengidup raban bansa Melayu.

Ibrahim ke ngelar diri iya Raja Bomoh nya siku ari beratus-ratus tauka nyangka beribu-ribu dukun ke bisi dalam komuniti kitai.

Ambika chunto, orang-orang Melayu enti bisi bala kaban belayan sida sakit nyelai tauka misteri kelimpah ari ke hospital sida deka ngena ubat tradisional enggau bedukun nyadika alternatif. Enti nadai orang minta tentu nadai mega orang meri tauka nyediaka perubat ti baka nya. Amai enda?

Ba menua pesisir enggau genturung pendiau ti jauh ari pasar, dia dukun nya mih ke balat agi diarapka enti dibanding enggau bala doktor di klinik tauka hospital. Ba raban orang politik mega arapka dukun. Kenu ku kaban aku, sida tu ke balat agi begunaka dukun. Betanding dala pengawa bepilih besai,  nguna dukun, betanding ba pengawa bepilih parti pan begunaka dukun.

Baka kemaya hari tu di Malaya nya benung musin kemarau, kala enda kita ninga dukun ujan disebut-sebut tau ngasuh ujan?

Nama utai ti baru sentang pengawa begunka dukun ti dih?  Semina ke bebida sekali tu nyangka raban komuniti antarabansa udah dipantaika enggau ‘resia’ pengidup raban bansa Melayu.

Enti kitai bejaku pasal dukun tu, ukai semina Melayu aja ke beguna, China, India, Iban, Kadazan enggau bansa bukai pan sama.

Tang diatu ke pengabis untung nya nadai ngilah tudah Ibrahim. Promosyen chara pecuma ba tikas nasional enggau antarabansa deka ngasuh Ibrahim tu laku lalu mayuh orang deka begunaka servis iya jemah ila. Iya tu mih tau disempamaka kitai baka orang ke bidik nemu basik enda betulang, untung nemu adung enda bekengkang.

Enti ngelama tu orang ke begunaka servis iya semina ari Malaysia, tang enggau promosyen ti  besai nyentuka media baka BBC pan bisi ngaga ripot senentang dukun tentu mayuh agi orang deka begunaka servis dukun Ibrahim kelebih agi ari menua baka Singapura, Brunei enggau Indonesia.

Pengawa dukun nya amat dipeda baka ke beli tang nya mih chara iya mutarka penanggul tu indah enda baka puyu ti bedebu nutu keruh, sida perintah enggau raban ari menua bukai mega ngena chara sida empu mega begigaka bilun tu enda salah-salah baka tuman ke ngereman nyungkap ambuh. Taja pia kitai sama-sama majak besampi ngambika penusah tu tau diputar enggau jampat.