Agi arapka dukun

Dipelabaka nadai enda raban pemacha blog tu enda ninga berita rayat Malaysia ke begau laban penusah besai, iya nya misteri pengelenyau bilun MAS MH370 ti patut terebai ari Padang Bilun Antarabansa Kuala Lumpur (KLIA) nuju ke Beijing seminggu ke udah. Nya alai, sebedau aku ngenang ke ujung agi cherita aku sekali tu,  dulu aku meri basa penyinu ati ngagai sida sebilik enggau kaban belayan ti bisi napi penusah tu.

Sepemanjai minggu ti udah, sekayu dunya udah meratika mayuh bengkah pekara ti bisi nyadi baik nya besai tauka mit. Enti sebedau 8 March peranak dunya balat agi meri fokus ngagai Crimea laban dia mih soldadu Moscow ngeruga pengelikun menua Ukraine tang enda mukai-mukai semua perati nya berubah ngagai Malaysia lebuh berita misteri pengelenyau bilun MH370 nya disadung serata dunya.

Ninting hari mayuh bendar teori enggau peragam senentang penyadi bilun tu. Semua orang ke pandai sereta enda kurang mega orang ke ngaku diri pandai sereta sekeda ke deka ngaku dengah bela mantaika penemu diri senentang pengelenyau bilun tu. Nya alai, lubah agi perintah tetemuka bilun tu, mayuh agi mega berita selebebu ngapa disadung bala orang ba laman media sosial. 

Kelimpah ari nya, mayuh mega ba laman sosial media, baik nya di Facebook tauka Twitter, enggau ba Instagram orang ke besampi (PrayForMH370) ke semua, baik nya sida kompeni penerebai bilun Malaysian Airlines (MAS), perintah Malaysia sereta menua ti bisi enggau ngesah penusah tu lalu iya ke pengabis berat nya bala kaban belayan orang ke ba dalam bilun tu. 

Tang dalam menua kitai ti benung napi krisis tu bisi mega raban ke enggau ngeruh ai, raban ke nyadi raban oportunis, bejualka baju ti bisi tulis "PrayForMH370" lalu dijual enggau rega RM40. 

Baka nya mega sekeda bala indu ke jegit mandangka “selfie” sida lalu nyalahgunaka hashtag nya dikena sida ngiga populariti diri ba sosial media.

Tang ari kesemua nya, iya ti pengabis balat asai ba aku ke nyadi peranak menua Malaysia tu nadai lebih ari raban ke ngaku diri dukun lalu madahka sida nya ulih tetemuka endur bilun nya.

Ngagai bala pemacha dipelabaka aku bisi udah macha ba laman sosial Facebook Hari Dua tu tadi bisi siku orang ke madahka diri dukun ke benama Wan Muhd Safwan. Iya madahka udah tetemuka bilun MH370 ngena jin, ukai tanchut jin tang antu jin.

Nitihka Safwan dalam Facebook iya, madahka ba dalam status iya, iya udah “ngubat 4 pesakit” sekali ari jam 3 lemai sampai ngagai 12.30 malam. Lemi mega perubat. Siku ari pesakit nya ngembuan jin. Dukun nya ngena chara iya empu merintahka jin nya ngasuh iya nyidi bilun MH 370 nengah Kapten Azhari (Zaharie) Ahmad Shah”.

“Bilun udah ditemu lalu maya 'scan' udah mega diambi. Isi rekod enda ulih dibantai ngagai mensia mayuh laban bebasaka kaban belayan sida penumpang nya,” pia ku dukun nya ke dibacha aku ba facebook. 

Terang amat utai tu bula laban keterubah iya, Safwan madahka iya ngena “jin” masuk ngagai tubuh Kapten Zaharie enti nitihka utai ti ditulis iya.

Tang iya empu enda nemu nama bendar kapten bilun nya baka ni kati iya ulih manjung ngaku diri udah tetemuka bilun nya.

Enti amat munyi ku iya nya nama mih iya enda terus aja ke KLIA lalu betemu enggau pemesai ke benung kiruh dalam pengawa begigaka bilun nya?

Lapa ngelakka soldadu langit menua Malaysia sereta raban soldadu enggau raban penyah penusah muai hari ngiga bilun nya ba Teluk Siam (Gulf of Thailand) ke bedandang 320,000 kilometer pesegi?

Lapa mih enda nyaup sida ngiga enti amat-amat iya ngaku diri nya siku dukun? Engka mih deka berundingka rega penerang ti deka kenataika iya.

Kelimpah ari nya mega siti agi pekara ti balat ngenyinuka ati aku ke nyadi peranak menua Malaysia tu, iya nya senentang siku agi orang ke madah diri iya “Raja Bomoh Sedunia VVIP” Ibrahim Mat Zin. Nama kebuah dih? Endaii nadai nemu kitai piak? Dua tiga hari tu pengawa iya nya balat amat ngemaluka menua kitai enggau ulah mapap iya ba KLIA.

Sekeda ulah iya nya baka pengawa ke bebaika mata ginti enggau terupung buluh dikena iya “merati” enggau “ngiga” alai bilun nya. Udah nya iya enggau bala tawing iya bebaika tikai tau ajih ti disempulangka enggau bakul sereta dua igi buah nyiur. Akai dai! Nadai utai ti ngemeli-meli nya nyau baka kartun.

Enti amai Raja Bomoh tu ulih nguna teknik tu ngiga bilun ti lenyau nya nama mih guna perintah serata dunya nengkebang teknologi ti sopistikated ke beungkus bebillion ringgit, tuju iya deka ngiga sereta ngesah penusah tu?

Enti amai Raja Bomoh tu ulih ngiga bilun ke lenyau nya, lapa iya enda ngiga anak mit ke lenyau ketegal diambi orang tauka kerita churi ti suah bendar nyadi?

Ari sukut realiti pengidup kitai, komuniti kitai agi jauh bendar tinggal dalam penemu sains. Sains nya mih siti-siti chara, ba penemu aku ulih nyaut semua pekara ti nyadi ba dunya tu.

Sains nya mih kunchi ngagai semua pekara ti ditanya sereta iya ti enda ulih disaut lalu iya patut terus digiga ulih mensia ngambika ulih nyaut semua pekara sida.

Nya alai nyau munyi ke beli, enti amai dukun tu bisi pengarap ulih tetemuka bilun nya, lapa mih nyentukka sehari tu lalu bedau mega bisi berita? Nama dukun tu ke bendar nganti raban sida ke ngiga nya tetemuka bilun baru iya ngambu dengah madahka diri tetemuka bilun asil ari pengawa ajih iya nya tadi.

Kitai patut ngetu ari ngarapka dukun tu ti baka tu. Sida tu mih ke dikumbai dalam jaku English nya  “charlatans”, pengakal lalu bejualka “snake oil” ngambika bulih untung atas angin.

Nyau udah datai maya alai kitai raban peranak menua Malaysia ngembuan tanggung pengawa ngagai tiris pantis kitai jemah ila, ngadaka peturun ke saintifik sereta ngembuan runding ti rasional lebuh napi sesebengkah pekara. Enti enda, sinu mih ati kitai meda peturun kitai jemah ila agi ulih diakal orang enggau jaku bula, bula banggar ari sida ke ngaku diri dukun.