Nulis Artikel

Panyun Jaku

Tuju karang tu ditulis laban kira deka bekunsi penemu enggau bala pemacha kelebih raban nembiak chara nulis artikel ti betul sereta engkeman ngambika ulih dikena maya diasuh pengajar nulis, lebuh nyaut tanya ba peresa tauka lebuh bisi peluang enggau pekit nulis karang. Kelimpah ari nya mega, peneleba penulis ke kala enggau kus nulis berita, kus nulis bup teks sereta nulis karang kreatif dipelabaka ulih dikena penulis bekunsika penemu kelimpah ke kala enggau orang ngeruh ai masuk pekit nulis esei ‘Kenegaraan’, bup teks enggau bup ti bukai.  

Batang Kenang

Ke bendar mayuh pekara ti tau nyadika lalau lebuh nulis artikel. Tang ke sekali tu penulis semina bebagika penemu senentang empat pekara aja ti tau nyadika lalau lebuh nulis artikel.

1.      Lebuh ngepunka karang selalu bepun enggau chara terus. Reti nya enda ngena jaku ke bebelit munyi orang ke bejaku ba mua mayuh ti ngena jaku sebar sereta jaku bebungai ngambika didinga bala peninga nya bisi basa sereta manah. Tang lebuh nulis artikel kitai enda ibuh ngena jaku sebar tauka jaku ti bebungai. Nambahka nya mega artikel ti ditulis kitai nya bisi elemen personal ngambika orang ke macha nya berasai rapat enggau artikel ti dituliska kitai nya. Artikel kitai nya mega ditulis enggau gaya ti enda bangat terit tauka lebih ngagai elemen merindang.

2. Kedua nya lebuh nerus tauka majak pengawa nulis artikel. Bisi sekeda pekara mega ti patut dikingatka kitai. Gaya tauka stail ti betul iya nya ngena ayat ti pandak sereta jaku ti ditemu orang mayuh. Kitai ukai deka mandangka pengelandik kitai ngena jaku nyentukka orang ke macha artikel kitai nya nyau enda meretika pekara ti dituliska kitai. Nambahka nya mega tulis mih dalam genteran ti pandak ngambika nyamai dibacha sereta diperetika orang ke macha artikel kitai nya. Lebuh ngerembaika penerang tulis mih dalam siti genteran siti pekara lalu kena jaku penanda kaul penemu baka kelimpah ari nya, nangkanka nya, udah nya, besenutuk enggau nya sereta enggau jaku bukai ti engkeman.

3. Pekara ketiga ti patut ditemuka kitai nya lebuh nutupka artikel kitai nya. Endang baka nama-nama utai mih nama bisi pemuka tentu bisi penutup, baka nya mega enggau artikel ti dituliska kitai. Tutupka karang kitai nya enggau jaku ti pandak tang naritka ati pemacha. Bai sida pulai ngagai pekara ti udah dikerandauka dalam artikel kitai nya lalu gaga simpul runding senentang pekara ti udah dibantaika kitai nya tadi. Anang sekali-kali nutup karang kitai enggau chara ngenyit tauka ngena komen ti nadai pengujung.

4. Kepenudi bendar nya tip tambah. Dikena ngasilka karang ti semitan, bala nembiak kelebih agi patut diiring chara ngena struktur ayat ti udah dipelajarka iya sereta ngena nya enggau chara ti betul. Dikena nembiak ngasilka karang dia pengajar patut bendar betanya saut enggau bala nembiak senentang pekara ti deka ditulis, gambar, cherita tauka penerang lalu saut ti diberi bala nembiak nya ulih nyadika isi tauka batang pekara lebuh sida nulis artikel nya. 

Penutup

Enggau sekeda anak penemu ti bisi dibantai ditu, diarapka raban penulis kelebih agi raban nembiak sekula ulih ngena penemu nya nyadika malin lebuh nulis karang bansa artikel.