Ngelepaska ari mentaliti kelas ketiga

KALA tauka enda  nuan bisi peneleba ti baka tu? Lebuh nuan benung neriba kerita nuan tepedaka uras ‘terebai’ keluar ari kerita ba mua nuan? Tauka lebuh nuan mansa endur rumah flat tak enda mukai-mukai tungkus uras ditikau orang ari atas?

Uji peratika sekeda kerita ti ngelanggar atur lampu trafik, ngetu ba kutak kuning. Bisi mega sekeda driba ke gerai nyamai ngengkahka kerita iya ba lot parking kerita ti udah disedia sereta diungkupka driba ke timpang pendiau. Mayuh agi lis ulah ti enda manah ti dikemeranka rayat Malaysia ti tau dikira tetap sereta majak nyadi-senyadi.

Taja pan udah ngaga ulah ti tau nyimaka ati orang bukai, rayat Malaysia ke bansa tu agi ngembuan empedu bangah sereta enda malu-malu nyalahka orang bukai. Iya baka ke ukai penanggul sida nyau nyadi penanggul orang bukai.

Palan ti kamah ba sekeda endur mega dilempai penyalah nya ngagai sida local council, jenayah ba genturung pendiau pan sida ke disalahka nya raban polis, agu rama ti kamah mega salah orang ke empu premis. Baka nya mega penyalah bukai semua dituju ngagai orang bukai. 

Ulah ke ngemeratka diri empu aja sereta enda pedulika pemeresi rama nambahka budaya pengamah ba raban bansa Malaysia. Tu terang bendar mandangka mentaliti kelas ketiga ti agi dikemeranka sekeda ari raban bansa Malaysia.

Palan ti kamah

Uji peratika sekeda taman-taman ngelantangka ati, ba tebing jalai, ba dalam parit, ba dalam agu rama tauka ba dalam lif, nadai tau nadai uras ari ti pengabis mit ba puntung insap, kulit ruti kulum, nyentukka iya ti besai agi baka polistirena, empelus barang sereta mega lampin guna buai anak mit.

Cherita ti baka tu sigi amat sereta belalauka peneleba sida ke kala diau ba endur flat kos baruh di indu nengeri kitai Malaysia.

Kelimpah ari napi penanggul berebutka palan engkah kerita, iya ti pengabis kritikal nya penanggul bebuaika uras. 

Dini-dini endur bisi uras. Ba tebing lif, dalam parit, ba tangga, ba palan engkah kerita, palan engkah motosikal, jalai pejalai kaki, semua tu tau ngasuh mata pedi meda kelimpah ari nyium bau but ke tau ngemediska lubang idung. 

Enti sema deka engkah kerita, kitai patut bejimat enggaika kena tinggang uras ti dibuai ari penjan rumah. Kadang-kadang kuah tedai utai empa pan dibuai ke baruh. Bisi mega sida ngambi chara ti mudah lalu ngelumuka uras ba tangga nyau sampai beulat taja pan palan alai bebuaika uras endang bisi disediaka ba baruh flat.

Ba runding simplistik sida tu, pengawa meresika genturung pendiau nya sigi tanggung pengawa orang ke nyaga flat nya laban ku sida, sida ke diau dia endang udah mayar ninting bulan.

Bah, nama mih ke dikumbai mentaliti kelas ketiga? Nama bida iya enggau mentaliti kelas keterubah? Mentaliti kelas ketiga mai reti runding ti baruh sereta bepikir nengah runding ti sempit. Di baruh tu dirintaika sekeda 10 chunto ulah ti bepelasarka mentaliti kelas ketiga:


1. Ba pasaraya, sepengudah ngena troli lalu ngemasukka barang ke dalam kerita, troli nya lalu  ditinggalka pia aja ba tempat parking. Tu seruran ngempang kerita bukai.

2. Parking ngempang. Tentu kitai suah meda kerita ti parking ngempang belakang kerita kitai ngujungka kitai enda ulih pansut.

3. Berebut-rebut masuk lif sereta enda pedulika pengguna ke deka pansut ari lif nya.

4. Muai uras sebarang endur sereta mega muai uras ari penjan kerita.

5. Enda ngetu ba garis zebra. Ba Malaysia utai ti nyelai nya lebuh orang ke deka ngelayang jalai nguna garis zebra nyau dipejal bekompromi enggau driba kerita laban irauka nyawa diri enggaika dilantak sida.

6. Enda ngena tali pinggang pengelikun tauka semina ngena lebuh tepedaka polis tauka lebuh bisi pengawa nyekat jalanraya ba mua.

7. Bekereja semina ketegal duit aja lalu ukai bepelasarka passion, pengerindu tauka pengelandik.

8. Begedika pemujur orang bukai. enti ulih iya deka semua mensia nya sebaka tikas enggau enggi iya, enda lebih. Enti bisi iban ke pandai agi tauka manah agi dia iya nguji deka ngelabuhka orang nya ngambika sama tikas enggau enggi iya.

9. Rinduka pemerindang aja lalu enda tentu rinduka pekara ti bisi tukuh educational. Pemerindang ti dikerinduka mega iya ti ari kelas baruh sereta enda ulih ngangkatka runding tauka minda.

10. Kelalu jampat puas ati enggau pengulih diri empu lalu enggai ngemansangka diri ketegal ke ngasaika diri udah chukup enggau nama utai ke bisi.

Enti semua utai tu enda berubah kitai pan enda ulih ngenataika diri ba tikas world class lalu besemekih enggau orang bukai enti kitai majak ngembuan runding ti baka tu. Upang mih kitai baka seludang embawang balu enti runding enggau ulah kitai enda mansang sereta maju. Ulah enggau perangai rayat Malaysia endang tau disimpulka baka pengerebah kayu nitihka penyundung.