Pelasar
Buah Kenang
Penemu
ti ditulis aku ditu endang ukai penemu ditengkebang aku kediri tang ulih aku
mansik sereta betanya ari orang ti tuai. Pengawa aku, iya nya nusun iya ngena
jalai tulis ngambi ke penemu nya tau dibacha sereta dipelajarka semua kitai ti
rindu ke penemu pasal Iban. Nya alai, pekara ti deka dikenang aku ditu luas
bendar rampa; enti penemu aku bisi pengurang, bisi penimpang, aku nusun jari
sepuluh minta ampun ngagai bala pemacha.
Carol
Ruberstein, iya nya siku orang putih ti udah mansik enggau jelan penalam pasal
main asal Iban ari bantu opis Muzium Sarawak dalam taun 1973, madahka “…bansa
Iban ngembuan mayuh macham tanda ti dimain sida nyerumba tabuh gendang enggau gung.
Ari semua tanda, ngajat tu siti ari tanda ti pemadu dikerinduka sida sereta
mengkang dipelajar datai ke sehari tu…“
Asal Penatai Ajat
Nitihka
kenang leka ensera enggau sebut leka tusut, main ngajat tu keterubah iya
dipelajarka bansa Iban ari Petara siku ti benama Ulup Baru Lichin, Bujang Ilang
Lengain. Tang cherita ti nyentuk agi enda ulih dipansik laban orang ke tuai ti
ditampung enda ulih madah enggau nyemetak.
Orang Ti Ngajat
Orang
ti ngajat, enda milih indu tauka lelaki, tuai tauka biak. Sebedau mantaika
bungai ajat, dulu sida nyembah meri basa ngagai orang ti ngemata. Udah nya baru
sida ngatur singkang nitihka rentak tabuh. Entepa kiba peling kanan. Chundung
baka ke deka rebah. Bediri baka ke tejingkauka sadau. Meremi baka ke terengkah
ba tikai. Jari dikepai, kaki disingkang. Ama surut, ama mansang. Nerais sereta
engkechit. Merejuk sereta manjung. Terabai dijapai lalu dipegai. Ilang disintak
lalu dibiau. Lesung dipanggum jari dikitau. Pala gilik-gilik. Buah isi
getik-getik. Mata kalik-kalik. Nya mih sekeda bungai ajat.
Suah
orang ngajat siku-siku sekali angkat lalu suah mega orang ngajat beraban bebala
mayuh. Tang taja baka nya, orang ti tampak agi kening suah agi ditarit orang
diasuh ngajat “beranchau tikai” dulu agi ari orang bukai, iya nya orang ti suah
agi pegi bejalai ngagai menua bukai lalu bisi didinga berita udah kala ampit
enggau orang betarak ngajat sekumbang iya diau di menua orang. Tubuh sida suah
penuh laban ukir tauka kelingai ti ngenjing begenarau baka likau ukir sawa ari
pegu nyentuk ke gerempung tapa kaki tauka jari. Agi menya ukir nya tanda sida
nakal nat ke pemedis, lalu ukir ba tunjuk jari ti dikumbai “Tegulun” nya
mandang ka sida udah kala bedengah munsuh.
Ajat
sida ke indu, lemi agi ari gaya. Sida enda engkechit, enda merejuk. Enda ngena
ilang. Enda ngena terabai. Enda manggum lesung. Tang pengelembut sida ngajat,
lingguk punggung enggau kepai jari sida, sema jaku, tau ngasuh sida ke lelaki
enda tesintakka seput, enda engkesap mata.
Bansa Ajat
Ngajat
bepelasarka geraklangkah sereta enggau tuju ngajat lalu tau dibagi ngagai lima
bengkah:-
Ajat Bunuh
Dimainka
pungka lelaki Iban ti beberita landik ngajat, sikar, landik bekuntau tauka udah
kala enggau orang ngayau tauka bedengah munsuh. Ajat tu tau dibagi ngagai tiga
bansa; Pencha, Kuntau enggau Tembung. Ajat tu endang tulin geraklangkah ajat
lelaki ti diumba enggau rentak tabuh ti jampat setipak enggau penyampat jari orang
ti ngajat ti ngenjing betabu-tabu nguji nyilat tumbuk munsuh ti diperagam benung
ngelaban iya. Lebuh ngajat, kadang-kadang pengajat ngena ngepan penuh, mai
terabai ti diukir bechanagir buah “Gerasi”, sereta ilang ti rimbun bejejabung buk
munsuh.
Ajat Semain
Dimain
sida ke biak dikena merindang lemai, lebuh nyambut temuai, tauka dikena lebuh
bepekit ka pengelandik ngajat. Ajat tu dimain ngena langkah ti liut-lembut
diumba enggau taboh “anyut ai”. Lebuh ngajat. kepai jari enggau tubuh sereta
singkang kaki pengajat berupai bendar lembut, ngenjing giau-giau enda
salah-salah baka daun nyiur ditiup angin begadai-gadai.
Ajat Iring
Dimain
sida ke biak dikena ngiring temuai, raban orang ti ngambi indu, bala pengabang,
pemesai tauka dikena ngelaluka Petara bejalai niti rumah lebuh Iban bisi
begawai. Ajat tu mega suah disebut Ajat Titi Ruai. Rentak tabuh ti dikena ba
ajat tu sama enggau rentak tabuh Ajat Semain.
Ajat Nanggung Lesung
Dimain
pungka lelaki ti gagah nanggung lesung ngena penguat rang enggau ngeli. Ajat tu
nyau deka sama enggau pengelubah ajat Semain lalu utai ti mida ajat tu ari
bansa ajat bukai iya nya laban ajat tu beguna ke lesung. Ajat tu nunjuk ke
pengering pengajat manggum lesung ngena ngeli iya sereta ngengkah belubah-lubah
lesung nya tadi ba tempat asal, sambil ngepaika jari sereta ngentakka kaki nitihka
rentak tabuh.
Ajat Kelulu
Dimain
orang ke bungah lebuh bebuti dikena nembuka gawai ti alai sida ngeluluka ulah
pangan diri, ti dikenatai ngena pengelandik geraklangkah lebuh ngajat. Ba ajat
tu, pengajat enda tentu pedulika pemanah rentak tabuh, lalu enda mega begunaka
ngepan ti penuh. Utai ti pemadu beguna iya nya pengelandik enggau pemungah
ngeluluka ulah pangan diri sambil nitihka rentak tabuh. Ambika banding, sida ke
indu suah ngajat ngeluluka ulah lelaki ke buyan lari ke jelu maya ngasu. Sida
ke lelaki suah ngajat ngeluluka sida ke indu ti ngelusu nutuk, nyumai tauka
ulah indu beribunka anak sida. Geraklangkah sida ke ngajat endang digaga
dikelulu kena ngasuh orang ketawa.
Kelimpah
ari lima batang ajat ti udah dikenang nya, agi mega bisi bansa ajat bukai ti
mit-mit sereta nyau nadai tentu dikingat ka agi baka Ajat Pama, Ajat Kera, Ajat
Gerasi Tunsang, Ajat Tempurung enggau Ajat Turun Tupai. Semua bansa ajat nya
tadi, dimain ngena tabuh ke lubah laban iya nyau deka sebaka enggau gaya Ajat
Kelulu.
Rentak Tabuh
Nyadi
penyampau tubuh orang ti nebah tabuh dikena ngajat bisi empat iku. Siku ari
sida nempap Gendang tauka dedumbak, siku nabuh Tawak, siku nabuh Bebendai lalu
siku nabuh Engkerumung. Lebuh betabuh, iya ti nabuh Bebendai belabuh dulu laban
dikena nentuka penyampat rentak tabuh, ditimbal Gendang, ditangkan enggau Tawak
lalu dientudi ke Engkerumung.
Ari
dinga pending orang ti enda teleba, rentak tabuh dikena ngajat munyi ti dua
bansa aja, iya nya rentak lubah enggau rentak jampat. Iya ke bendar, tabuh
ngajat bisi mayuh bengkah baka Ayun Lundai, Ai Anyut, Sinu Ngenang enggau
Tanjak Ai. Tabuh tiga bansa ti keterubah nya lubah rentak lalu suah dikena Ajat
Semain, Ajat Iring enggau Ajat Kelulu. Rentak tabuh Tanjak Ai tu jampat lalu
dikena ba Ajat Bunuh.
Bisi
mega rentak tabuh bukai ti enda besangkut-paut enggau ngajat baka rentak
tinggang punggung ti ditabuh maya ngambi indu enggau rentak tabuh rayah dikena
ngerandang jalai.
Ngepan Dikena Ngajat
Ba
senentang pengawa ngajat ti betuju dikena merindang ati temuai, lebuh bepekit, lebuh
ngalu Petara tauka lebuh pengawa melah pinang, pendiau orang ke ngajat berupai
bisi penimpang enti iya enda ngena ngepan asal Iban ti chukup. Nyadi sekeda ari
ngepan nya baka tu :-
Orang
lelaki ngena sirat panjai. Suah bechura mirah. Tauka bebungai-bungai lalu
bepayaka kain ti disungkit. Iku sirat dikelapung ngena gerunung puru ti manah
bendar munyi lebuh engkechit sereta ngentakka kaki sambil nyintak duku ilang ke
ditangkin. Pala ditangkupka ketapu rutan ti diujakka lelanjang bulu ruai,
langgai tajai tauka bulu kenyalang. Bebaju kebat dikumbai Baju Burung ti beukir
mayuh leman. Dada disengkabung ngena gagung kulit remaung raras tauka beruang
rambai. Rekung dikungkung marik rantai. Berang dipasuk simpai pirak tauka simpai
tapang. Ilang ti ditangkin bejejabungka buk munsuh ke begelung bauh
ngelegetang. Terabai ti dipegai bekenarau penuh ukir. Betis dipasuk enggau
engkerimuk ti digaga ari pirak sereta diselat ngena unus ti digaga ari runut
aping pengerang.
Sida
ke indu ngena kain sungkit ti ditating enggau ringgit pirak. Punggung dikungkung
rawai rinyai nungkat ka kerigai rusuk marang, dililit ngena lampit pirak. Dada
dibap ngena selampai ti diburai enggau leka marik bekengkang. Pending disumping
ngena antin mas. Pala diujak ke sugu tinggi. Dekuan nyeritan dikungkong gelang.
Buku ali dikungkung ngena gerunchung temaga tauka pirak.
Tuju Ngajat
Nyau
deka ba tiap-tiap pengerami kitai Iban, pengawa ngajat endang enda kala
tinggal. Agi kelia, kelimpah ari dikena merindang ati, mandangka penyikar
bekuntau bepancha, bebuti maya melah pinang enggau ngelaluka temuai, ngajat tu
mega dikena merindang semengat padi tauka dikena bebasa ke iya. Nitih ke
pengarap Iban kelia, enti Iban siru ngintu padi, dia antu padi deka begulai
enggau sida lalu ngujungka bulih padi.
Lebuh
Gawai Batu, Raja Simpulang Gana, dikangau ngena leka pengap enggau sampi. Lalu lebuh
iya datai, iya dialu ngena piring sereta main asal baka ngajat. Baka nya mega
enti bisi temuai. Iya disambut ngena basa. Lebuh lemai ari, iya diperindang
ngena ajat.
Simpul Kenang
Semua
bansa bisi ngembuan, nyimpan sereta mandangka main asal diri. Kelimpah ari
nunjukka pengeraja bansa nya ba main asal, iya mega ulih nyerakupka bansa nya
laban sida bisi ngembuan sereta bepenemu ba main ti sama. Nya alai, ngajat
sereta main asal ke bukai patut bendar dipelajar sereta dikembuan bansa Iban
dikena ngelai bansa diri, dikena mandangka pengeraja main asal sereta dikena
berakup. Lebuh ke belajar ngajat, kitai mega belajarka jalai basa enggau jalai
ngemas diri ba mua orang mayuh. Main asal tu mega tau narit ati orang nemuai
ngagai menua kitai ti tau mai penatai pemisi. – Dibali ari karang Jimbun Tawai
Tiada ulasan:
Catat Ulasan